ମୁମ୍ବାଇ: ୨୪ ଘଣ୍ଟା ନ ପୁରୁଣୁ ତା’ର ଘୋଷିତ ନିଦେ୍ର୍ଧଶନାମାକୁ ପ୍ରତ୍ୟାହାର କରି ନେଇଛି ବିସିସିଆଇ । ଶୁକ୍ରବାର ବିସିସିଆଇ ଘୋଷଣା କରିଥିଲା ଯେ ମୁମ୍ବାଇର ୱାଙ୍ଖଡେ ଷ୍ଟାଡିୟମରେ ହେବାକୁ ଥିବା ଆଇପିଏଲ ମ୍ୟାଚ୍ ଦେଖିବା ପାଇଁ ଆରଟି-ପିସିଆର ନେଗେଟିଭ ରିପୋର୍ଟ ଆବଶ୍ୟକ । କେବଳ ବିସିସିଆଇର କର୍ମକର୍ତ୍ତା, ଆଇପିଏଲ ପରିଚାଳନା ପରିଷଦ (ଗଭର୍ଣ୍ଣିଂ କାଉନସିଲ)ର ସଦସ୍ୟ, ବିଭିନ୍ନ ରାଜ୍ୟ କି୍ରକେଟ ଆସୋସିଏସନର କର୍ମକର୍ତ୍ତା ଓ ପ୍ରାୟୋଜକଙ୍କ ପ୍ରତିନିଧି ୱାଙ୍ଖଡେ ଷ୍ଟାଡିୟମରେ ପ୍ରେସିଡେଣ୍ଟସର ବକ୍ସରେ ବସି ଖେଳ ଦେଖିପାରିବେ । ତେବେ ମ୍ୟାଚ ଦେଖିବାକୁ ଆସିବାକୁ ହେଲେ ଉପରୋକ୍ତ ଅଧିକାରୀ କୋଭିଡର ଆରଟି-ପିସିଆର ପରୀକ୍ଷା କରାଇବେ । ଏହାର ରିପୋର୍ଟ ଯଦି ନେଗେଟିଭ ଆସିବ ଏହାକୁ ସେମାନେ ୱାଙ୍ଖଡେ ଷ୍ଟାଡିୟମରେ ଫାଟକରେ ଦେଖାଇ ଭିତରେ ପ୍ରବେଶ କରିପାରିବେ । କାରଣ ମୁମ୍ବାଇ ସହରରେ ଦିନକୁ ଦିନ କରୋନାର ସ୍ଥିତି ଗୁରୁତର ହେବାରେ ଲାଗିଛି । ବିସିସିଆଇର ନିଦେ୍ର୍ଧଶନାମା ପରେ କିଛି ସଦସ୍ୟ ଅସନ୍ତୋଷ ବ୍ୟକ୍ତ କରିଥିଲେ । ଫଳରେ ଶନିବାର ବିସିସିଆଇ ଏହି ନିୟମକୁ ପ୍ରତ୍ୟାହାର କରିନେଇଛି । ବିସିସିଆଇ ଅଧିକାରୀ ଓ ସଦସ୍ୟଙ୍କୁ ଆଉ ୱାଙ୍ଖଡେ ଷ୍ଟାଡିୟମ ଫାଟକରେ ଆରଟି-ପିସିଆର ରିପୋର୍ଟ ଦେଖାଇବାକୁ ପଡ଼ିବ ନାହିଁ ।