ବରଗଡ଼ ଜିଲ୍ଲା ଅମ୍ବାଭୋନା ଥାନା ଅନ୍ତର୍ଗତ ଭୈନାତାରା ଗ୍ରାମରେ ପକ୍ଷାଘାତରେ ଆକ୍ରାନ୍ତ ବାପାଙ୍କୁ ପିଟିପିଟି ଜୀବନ ମାରିଦେଲା ପୁଅ । ହେଲେ ବଡ଼ଭାଇଙ୍କ ଅଭିଯୋଗ ଓ ପୁଲିସ୍‌ର ତଦନ୍ତରୁ ତିନିଦିନ ପରେ ହତ୍ୟାକାଣ୍ଡର ପର୍ଦ୍ଦାଫାସ ହୋଇଛି । ପିତୃହନ୍ତା ପୁଅ ରବିଶଙ୍କର ସା (୩୫)କୁ ପୁଲିସ୍ ଗିରଫ କରିଛି । ଘରୁ ରକ୍ତ ଛିଟା ନମୁନା ଓ ମୃତଦେହ ପୋଡ଼ାଯାଇଥିବା ସ୍ଥାନରୁ ପାଉଁଶ-ହାଡ଼ ଜବତ କରି ପୁଲିସ୍  ତଦନ୍ତ ଜାରି ରଖିଛି ।

ଡୋଲାମଣି ସା (୫୨)ଙ୍କ ପୁଅ ରବିଶଙ୍କରର ଉନ୍ମତ୍ତକାଣ୍ଡରେ ପରିବାର ଲୋକେ ଅତିଷ୍ଠ ହୋଇଥିଲେ । ଫଳରେ ବାପା ଡୋଲାମଣି ଭୈନାତୋରା ଛାଡ଼ି ଜରିମୂଲିରେ ରହୁଥିଲେ । ରବିର ବଡଭାଇ ଶଶିଭୂଷଣ ଶ୍ୱଶୁର ଘର ଭଟଲି ଥାନା ଅନ୍ତର୍ଗତ ବଡମାଳ ଗ୍ରାମରେ ସପରିବାର ରହୁଥିଲେ । ପକ୍ଷାଘାତରେ ଆକ୍ରାନ୍ତ ଡୋଲାମଣି ଶନିବାର ଭୈନାତୋରା ଘର ନିକଟ ପିଣ୍ଡାରେ ଶୋଇଥିଲେ । ଏହି ସମୟରେ ରବିଶଙ୍କର ଘରକୁ ଆସିଥିଲା । କୌଣସି କଥାକୁ ନେଇ ବାପ-ପୁଅ ମଧ୍ୟରେ ବଚସା ହୋଇଥିଲା । ରବିଶଙ୍କର ରାଗରେ ତାଙ୍କୁ ଘରକୁ ଘୋଷାଡ଼ି ନେଇ ନିସ୍ତୁକ ମାଡ଼ ମାରିଥିଲା । ଘଟଣାକୁ ଚପାଇଦେବାକୁ ଦୁର୍ଘଟଣା ରୂପ ଦେଇ ଅଭିଯୁକ୍ତ ରବିଶଙ୍କର ଆମ୍ବୁଲାନ୍ସ ଯୋଗେ ବାପାକୁ ଡାକ୍ତରଖାନା ଦେଇଥିଲା । ସେଠାରେ ଡୋଲାମଣିଙ୍କ ମୃତ୍ୟୁ ହୋଇଯାଇଥିଲା ।

ଦୁର୍ଘଟଣାରେ ବାପାଙ୍କ ମୃତ୍ୟୁ ଘଟିଥିବା ଅଭିଯୁକ୍ତ ରବିଶଙ୍କର ବଡ ଭାଇ ଶଶିଭୂଷଣଙ୍କୁ ଖବର ଦେଇଥିଲେ । ଶଶୀଭୂଷଣ ସପରିବାର ଗାଁରେ ପହଞ୍ଚିଥିଲେ । ମୃତଦେହ ଶେଷକୃତ୍ୟ ପରେ ସାନଭାଇର ଗତିବିଧିକୁ ନେଇ ସନ୍ଦେହ ପ୍ରକଟ କରି ଥାନାରେ ହତ୍ୟା ଅଭିଯୋଗ କରିଥିଲେ । ସମ୍ବଲପୁରରୁ ସାଇଣ୍ଟିଫିକ ଦଳ ୭ ସ୍ଥାନରୁ ରକ୍ତ ଛିଟା ନମୁନା ସଂଗ୍ରହ କରି ଅଭିଯୁକ୍ତକୁ ଗିରଫ କରିଥିଲା ।

Powered by Froala Editor