ଭୁବନେଶ୍ୱର: ଦାଦନ ପାଇଁ ଅନ୍ୟ ରାଜ୍ୟକୁ ଯିବା ପଛର କାରଣ ଏବଂ ସମାଧାନ ବାବଦରେ ଅଧ୍ୟୟନ ହେବ। ଏଥିପାଇଁ ଅନ୍ୟ ରାଜ୍ୟରେ ଦାଦନ ଖଟୁଥିବା ଓଡ଼ିଶାର ଲୋକଙ୍କ ପାଖକୁ ଯିବେ ସରକାର। କ’ଣ ପାଇଁ ସେମାନେ ଭିଟାମାଟି ଛାଡ଼ିଛନ୍ତି ଏବଂ କ’ଣ ହେଲେ ଆଉ ଏଠାକୁ ଆସିବେ ନାହିଁ, ସେ ବିଷୟରେ ସରକାରୀ ଅଧିକାରୀ ସେମାନଙ୍କ ମୁହଁରୁ ଶୁଣିବେ। ସୋମବାର ଲୋକସେବା ଭବନରେ ଉପମୁଖ୍ୟମନ୍ତ୍ରୀ କନକ ବର୍ଦ୍ଧନ ସିଂହଦେଓଙ୍କ ଅଧ୍ୟକ୍ଷତାରେ ଅନୁଷ୍ଠିତ ଟାସ୍କଫୋର୍ସର ତୃତୀୟ ବୈଠକରେ ଏହି ନିଷ୍ପତ୍ତି ହୋଇଛି। ଏଥିସହ ଦାଦନ ଚାଲାଣ କରୁଥିବା ସର୍ଦାରଙ୍କ ବିରୋଧରେ ସରକାର କଠୋର ଆଭିମୁଖ୍ୟ ଗ୍ରହଣ କରିବେ। ବଡ଼ କଥା ହେଲା ଗ୍ରାମାଞ୍ଚଳର ଲୋକଙ୍କୁ ରୋଜଗାର ଯୋଗାଇ ଦେବା ପାଇଁ ଲାଗୁ ହୋଇଥିବା ଯୋଜନାର ଶତପ୍ରତିଶତ କାର୍ଯ୍ୟାନ୍ୱୟନ ସୁନିଶ୍ଚିତ କରିବା ଲାଗି ପାଞ୍ଚ ବିଭାଗର ମନ୍ତ୍ରୀଙ୍କୁ ନିର୍ଦେଶ ଦିଆଯାଇଛି। ଯୋଜନାର ସଫଳତା ପାଇଁ ସମ୍ପୃକ୍ତ ବିଭାଗର ସଚିବଙ୍କୁ ଉତ୍ତରଦାୟୀ କରାଯିବ।

ଏହି ପରିପ୍ରେକ୍ଷୀରେ ଦାଦନ ଶ୍ରମିକଙ୍କ ଉପରେ ଅନୁଷ୍ଠିତ ସର୍ଭେ ଏବଂ ସରକାରଙ୍କ ପାଖରେ ଉପଲବ୍ଧ ତଥ୍ୟ ଆଧାରରେ ଦାଦନ ଶ୍ରମିକ ପ୍ରବାସ ଯାତ୍ରାକୁ ରୋକିବା ପାଇଁ ଓଡ଼ିଶା ପିଭିଟିଜି ଜୀବିକା ମଡେଲ ଏବଂ ମୁଖ୍ୟମନ୍ତ୍ରୀ ଜନଜାତି ଜୀବିକା ମିଶନ ଭଳି ପ୍ରଭାବଶାଳୀ ଜୀବିକା ଯୋଜନା କାର୍ଯ୍ୟକାରୀ କରିବାକୁ ବୈଠକରେ ସ୍ଥିର କରାଯାଇଛି। ପ୍ରବାସୀ ଶ୍ରମିକଙ୍କ ଦକ୍ଷତା ବୃଦ୍ଧି ପାଇଁ ତାଲିମ ଦିଆଯିବ। ଦାଦନ ଯାଉଥିବା ପରିବାରଗୁଡ଼ିକର ଆୟ ବୃଦ୍ଧି କରିବା ସହିତ ଶ୍ରମିକ ସର୍ଦାରଙ୍କ ଉପରେ କାର୍ଯ୍ୟାନୁଷ୍ଠାନ ଗ୍ରହଣ ପାଇଁ ଏକ କମିଟି ଗଠନ କରାଯିବ ବୋଲି ବୈଠକରେ ନିଷ୍ପତ୍ତି ହୋଇଛି।

Powered by Froala Editor