ଗ୍ରେଟର ନୋଏଡାରେ ଜଣେ ମହିଳାଙ୍କୁ ତାଙ୍କ ସ୍ୱାମୀ ଓ ଶାଶୁଘର ଲୋକେ ଯୌତୁକ ପାଇଁ ନିଆଁ ଲଗାଇ ହତ୍ୟା କରିଛନ୍ତି। ମୁଖ୍ୟ ଅଭିଯୁକ୍ତ ଭାବେ ତାଙ୍କ ସ୍ୱାମୀ ବିପିନ ଭାଟ୍ଟୀଙ୍କୁ ଗିରଫ କରାଯାଇଛି। ପୁଲିସ କଷ୍ଟଡିରୁ ଖସି ପଳାଇବାକୁ ଚେଷ୍ଟା କରୁଥିବା ବେଳେ ବିପିନ ଉପରକୁ ପୁଲିସ ଗୁଳି ଚଳାଇଥିଲା। ଏହି ଘଟଣାରେ ବିପିନର ଗୋଡ଼ରେ ଗୁଳି ବାଜିବା ସହ ସେ ଆହତ ହୋଇଥିବା ଜଣାଯାଇଛି। ପୁଲିସ ମହିଳାଙ୍କ ସ୍ୱାମୀ, ଶାଶୁ, ଶ୍ୱଶୁର ଓ ଦିଅରଙ୍କ ସମେତ ଚାରି ପରିବାର ସଦସ୍ୟଙ୍କ ବିରୋଧରେ ମାମଲା ରୁଜୁ କରିଛି।

ଗୁରୁବାର ରାତିରେ ଏହି ଘଟଣା ସାମ୍ନାକୁ ଆସିଥିଲା। ନିକ୍କୀ ନାମକ ଜଣେ ମହିଳା ୨୦୧୬ ମସିହାରୁ ସିରସାର ବିପିନଙ୍କୁ ବିବାହ କରିଥିଲେ, ତାଙ୍କୁ ଗ୍ରେଟର ନୋଏଡାର ଫର୍ଟିସ ହସ୍ପିଟାଲରେ ଗୁରୁତର ଜଳିଯାଇଥିବା ଅବସ୍ଥାରେ ଭର୍ତ୍ତି କରାଯାଇଥିଲା। ପରେ ତାଙ୍କୁ ଦିଲ୍ଲୀର ସଫଦରଜଙ୍ଗ ହସ୍ପିଟାଲକୁ ପଠାଯାଇଥିଲା, କିନ୍ତୁ ସେ ରାସ୍ତାରେ ମୃତ୍ୟୁ ବରଣ କରିଥିଲେ।

ନିକ୍କୀଙ୍କ ବଡ଼ ଭଉଣୀ କାଞ୍ଚନଙ୍କ ଅଭିଯୋଗ ଅନୁସାରେ, ଗୁରୁବାର ରାତିରେ ନିକ୍କୀଙ୍କୁ ତାଙ୍କ ସ୍ୱାମୀ ବିପିନ ମାଡ଼ ମାରି ଅଚେତ କରିଥିଲେ ଏବଂ ପରେ ନିଆଁ ଲଗାଇ ଦେଇଥିଲେ। ନିକିଙ୍କ ବାପା ଅଭିଯୁକ୍ତର ଏନକାଉଣ୍ଟର କରିବାକୁ ଦାବି କରିଥିଲେ। ସାକ୍ଷାତକାରରେ ସେ କହିଥିଲେ ଯେ, "ଆମେ ଏନକାଉଣ୍ଟର ଚାହୁଁଛୁ। ଏଭଳି ଘୃଣ୍ୟ ଅପରାଧର ଦଣ୍ଡ ସ୍ୱରୂପ ଅଭିଯୁକ୍ତମାନଙ୍କୁ ଏନକାଉଣ୍ଟରରେ ହତ୍ୟା କରିବା ସହ ସେମାନଙ୍କ ଘର ଭାଙ୍ଗି ଦେବା ଉଚିତ୍।

କାଞ୍ଚନ ଅଭିଯୋଗ କରିଛନ୍ତି ଯେ ବିବାହ ସମୟରେ ସେମାନେ ଏକ ସ୍କର୍ପିଓ ଏବଂ ମୂଲ୍ୟବାନ ଜିନିଷ ଦେଇଥିଲେ। ତଥାପି ନିକ୍କୀଙ୍କ ଶାଶୁଘର ଲୋକେ ଅଧିକ ଯୌତୁକ ଦାବି କରୁଥିଲେ। ବିବାହ ପରେ ସେମାନେ ୩୬ ଲକ୍ଷ ଟଙ୍କା ଦାବି କରିଥିଲେ।

Powered by Froala Editor