ଭୁବନେଶ୍ୱର: ରାଜ୍ୟ ସରକାର ବୁଧବାର ୪୫୧୫ କୋଟି ଟଙ୍କାର ୧୯ଟି ପୁଞ୍ଜିନିବେଶ ପ୍ରସ୍ତାବକୁ ମଞ୍ଜୁର ପ୍ରଦାନ କରିଛନ୍ତି। ଅନୁମୋଦନ ଲାଭ କରିଥିବା ନିବେଶ ପ୍ରସ୍ତାବ ୮ ଜିଲାରେ କାର୍ଯ୍ୟକାରୀ ହେଲେ ୮୨୦୦ ଲୋକଙ୍କ ପାଇଁ ନିଯୁକ୍ତି ସୁଯୋଗ ସୃଷ୍ଟି ହେବ। ଏସବୁ ପ୍ରକଳ୍ପ ସବୁଜ ଶକ୍ତି, ଔଷଧ, ବର୍ଜ୍ୟ ପରିଚାଳନା, ପର୍ଯ୍ୟଟନ, ଜୈବ ଇନ୍ଧନ, ଇସ୍ପାତ, ଭିତ୍ତିଭୂମି, ଇଭି, ଆଇଟି, ଖାଦ୍ୟ/ପାନୀୟ ସହିତ ଜଡ଼ିତ।

ମୁଖ୍ୟ ଶାସନ ସଚିବ ମନୋଜ ଆହୁଜାଙ୍କ ଅଧ୍ୟକ୍ଷତାରେ ଅନୁଷ୍ଠିତ ୧୩୯ତମ ସିଙ୍ଗିଲ ୱିଣ୍ଡୋ କ୍ଲିଅରାନ୍ସ ଅଥରିଟି ବୈଠକ ପରେ ମିଳିଥିବା ସୂଚନା ଅନୁସାରେ ଆଇନକ୍ସ ସୋଲାର ‌େ‌ଢଙ୍କାନାଳରେ ୨୮୩ କୋଟି ଟଙ୍କା ବିନିଯୋଗରେ ବ୍ୟାଟେରି କାରଖାନା ଏବଂ ଜିନ୍ଦଲ ଷ୍ଟେନସେଲ ଲି. ଯାଜପୁରରେ ୯୦ କୋଟି ବିନିଯୋଗରେ ଗ୍ରିନ୍ ହାଇଡ୍ରୋଜେନ୍ ଉତ୍ପାଦନ କେନ୍ଦ୍ର ପ୍ରତିଷ୍ଠା କରିବ। ସେହିପରି ରାୟପୁରସ୍ଥିତ କମ୍ପାନୀ ଗଞ୍ଜାମ ଜିଲାରେ ୭୫୦ କୋଟି ଟଙ୍କା ନିବେଶରେ ଏକ ସୋଲାର ସେଲ୍‌ ଉତ୍ପାଦନ କେନ୍ଦ୍ର ପ୍ରତିଷ୍ଠା କରିବ। ଗ୍ରାଭିଟା ଇଣ୍ଡିଆ କମ୍ପାନୀ ୩୫୦ କୋଟି ଟଙ୍କା ନିବେଶ କରି ଅନୁଗୋଳରେ ଏକ ପୁନଃଚକ୍ରଣ କାରଖାନା ପ୍ରତିଷ୍ଠା କରି ୨୭୦ ଜଣଙ୍କୁ ନିଯୁକ୍ତି ଦେବ। ଷ୍ଟାରକ୍ୟାପ୍ସ ଗ୍ଲୋବାଲ ଏଲ୍‌ଏଲ୍‌ପି ୮୦ କୋଟି ଟଙ୍କା ବିନିମୟରେ ଖୋର୍ଦ୍ଧାରେ ଔଷଧ ଉତ୍ପାଦନ କେନ୍ଦ୍ର ପ୍ରତିଷ୍ଠା କରିବ। ଜଗତସିଂହପୁରରେ ପଦ୍ମା ହସ୍ପିଟାଲିଟି ପକ୍ଷରୁ ତିନି ତାରକା ହୋଟେଲ ପାଇଁ ୬୦ କୋଟି, ଏସ୍‌ଏନ୍‌ଏମ୍‌ ହୋଟେଲ ଆଣ୍ଡ ରିସୋର୍ଟ ଚାରି ତାରକା ହୋଟେଲ ପାଇଁ ୯୨.୩୨ କୋଟି ଏବଂ ଓରିଶା ଷ୍ଟିଭେଡର୍ସ ଲି. ପାରାଦ୍ବୀପରେ ୨୧୧ କୋଟି ଟଙ୍କାରେ ପଞ୍ଚ ତାରକା ହୋଟେଲ ପ୍ରତିଷ୍ଠା କରିବ। ଭାଇବ୍ରାଣ୍ଟ ସ୍ପିରିଟ୍ସ ଲି. ପକ୍ଷରୁ ସୁନ୍ଦରଗଡ଼ରେ ୫୦ କୋଟି ଟଙ୍କା ବିନିମୟରେ ବାୟୋଗ୍ୟାସ୍ ପ୍ଲାଣ୍ଟ ପ୍ରତିଷ୍ଠା କରାଯିବ। ବେଟାବିଲ୍ଡସ୍ ଟେକ୍ନୋଲୋଜିସ ପକ୍ଷରୁ ୧୩୧.୫୫ କୋଟି ଟଙ୍କା ବିନିଯୋଗ କରାଯାଇ ଇସ୍ପାତ ପ୍ରକ୍ରିୟାକରଣ ୟୁନିଟ୍ ସ୍ଥାପନ କରାଯିବ। 

ସେହିପରି କୋଣାର୍କ ଇସ୍ପାତ ୯୯୦ କୋଟି ଟଙ୍କା ବ୍ୟୟରେ ଝାରସୁଗୁଡ଼ାରେ କାରଖାନା ସମ୍ପ୍ରସାରଣ ହେବ। ସନକା ଅଟୋ ଗ୍ରୁପ୍ ଖୋର୍ଦ୍ଧାରେ ବାର୍ଷିକ ୧୦୦୦ ଇଭି ଉତ୍ପାଦନ ଲକ୍ଷ୍ୟରେ ୩୦୦ କୋଟି ଟଙ୍କା ନିବେଶ କରିବ। ଶ୍ରୀଟେକ୍ ଡାଟା ଲି. ଖୋର୍ଦ୍ଧାରେ ହାଇପରସ୍କେଲ ଡାଟା ସେଣ୍ଟର ପ୍ରତିଷ୍ଠା ପାଇଁ ୫୦୧ କୋଟି ଟଙ୍କା ନିବେଶ କରିବ। ୱେଷ୍ଟଏଜ୍ ଡାଟା ସେଣ୍ଟର ଖୋର୍ଦ୍ଧାରେ ଡାଟା ସେଣ୍ଟର ଓ ସାଟେଲାଇଟ୍ ଇଣ୍ଟରନେଟ ସେବା ପାଇଁ ୫୦ କୋଟି ଟଙ୍କା ନିବେଶ କରିବ। ଏସୋସିଏଟେଡ୍ ଆଲକୋହଲ୍ସ ଆଣ୍ଡ ବିୱେରିଜ୍ ଖୋର୍ଦ୍ଧାରେ ମଦ କାରଖାନା ପାଇଁ ୩୦୦ କୋଟି ଟଙ୍କା ବ୍ୟୟ କରିବ। ଅପରପକ୍ଷେ ଶ୍ରୀଜଗନ୍ନାଥ କ୍ୟାରିୟର୍ସ ଅନୁଗୋଳରେ ଲଜିଷ୍ଟିକ୍ ପାର୍କ ଓ ପଣ୍ୟାଗାର ପ୍ରତିଷ୍ଠା ପାଇଁ ୧୧୨ କୋଟି ଟଙ୍କା ନିବେଶ କରିବ।

Powered by Froala Editor