ଭୁବନେଶ୍ବର: ଲଘୁଚାପ ପ୍ରଭାବରେ ଉତ୍ତର ଓଡ଼ିଶାର ମୟୂରଭଞ୍ଜ, ବାଲେଶ୍ବର ଏବଂ କେନ୍ଦୁଝର ଜିଲାର କିଛି ଅଞ୍ଚଳରେ ପ୍ରବଳ ବର୍ଷା ହୋଇଥିବା ବେଳେ ଝାଡଖଣ୍ଡରେ ଅତି ପ୍ରବଳ ବର୍ଷା ଯୋଗୁ ସୁବର୍ଣ୍ଣରେଖା, ବୈତରଣୀ, ବୁଢ଼ାବଳଙ୍ଗ, ଜଳକାରେ ବନ୍ୟା ଆସିଥିଲା। ମୟୂରଭଞ୍ଜ, ବାଲେଶ୍ବର, ଭଦ୍ରକ, ଯାଜପୁର ଏବଂ କେନ୍ଦୁଝର ଜିଲାରେ ବନ୍ୟା ଆସିବା ସହ ବାଲେଶ୍ବର ଅଧିକ ପ୍ରଭାବିତ ହୋଇଛି। ଉତ୍ତର ଓଡ଼ିଶାରେ ବର୍ଷା କମିଥିବାରୁ ନଦୀରେ ଜଳସ୍ତର କମିଛି। କିନ୍ତୁ ବନ୍ୟା ଦୁର୍ଦଶା ଲାଗି ରହିଛି। ରାଜସ୍ବ ଓ ବିପର୍ଯ୍ୟୟ ପରିଚାଳନା ମନ୍ତ୍ରୀ ସୁରେଶ ପୂଜାରୀ କହିଛନ୍ତି, ଦିନେ ଦୁଇ ଦିନ ଭିତରେ ବନ୍ୟା ଛାଡିବ। ବୁଢାବଳଙ୍ଗ ଓ ସୁବର୍ଣ୍ଣରେଖା ବିପଦ ସଙ୍କେତ ତଳେ ରହିଛି। ଜଳ ନିଷ୍କାସନ ପାଇଁ ସମୟ ଲାଗୁଛି। ବୈତରଣୀ ବନ୍ୟା ପ୍ରଭାବରେ ଅନେକ ପଞ୍ଚାୟତ ପାଣି ଘେରରେ ଥିଲା।. କେନ୍ଦୁଝର ଜିଲା ଆଂଶିକ ପ୍ରଭାବିତ ହୋଇଛି। ଯେଉଁମାନେ ରିଲିଫ କେନ୍ଦ୍ରରେ ଅଛନ୍ତି, ସେମାନଙ୍କ ପାଇଁ ୭ଦିନ ରନ୍ଧାଖାଦ୍ୟ ବ୍ୟବସ୍ଥା ହୋଇଛି। ଆବଶ୍ୟକ ପଡିଲେ ସମୟ ସୀମା ବଢ଼ାଯିବ। କ୍ଷୟକ୍ଷତି ଆକଳନ ଆରମ୍ଭ ହେଲାଣି। ପାଣି ଛାଡ଼ିବା ପରେ କ୍ଷୟକ୍ଷତି ରିପୋର୍ଟ ଆସିଲେ ଯଥାଶୀଘ୍ର କ୍ଷତିପୂରଣ ଦିଆଯିବ।
ଜଳ ସମ୍ପଦ ବିଭାଗ ପକ୍ଷରୁ ମିଳିଥିବା ତଥ୍ୟାନୁଯାୟୀ, ଗୁରୁବାର ସନ୍ଧ୍ୟା ୬ଟା ସୁଦ୍ଧା ସୁବର୍ଣ୍ଣରେଖାର ରାଜଘାଟରେ ବିପଦ ସଙ୍କେତ ୧୦.୩୬ମିଟର ଥିବାବେଳେ ଏଠାରେ ୮.୬୩ ମିଟରରେ ବନ୍ୟା ଜଳ ନିଷ୍କାସନ ହେଉଛି। ବୈତରଣୀର ଆଖୁଆପଦାରେ ବିପଦ ସଙ୍କେତ ୧୮.୩୩ ମିଟର ଥିବାବେଳେ ୧୭.୧୦ ମିଟରରେ ଜଳ ପ୍ରବାହିତ ହେଉଛି। ଜଳକାରେ ମଥାନୀଠାରେ ବିପଦ ସଙ୍କେତ ୬.୫ ମିଟର ରହିଛି ଏବଂ ଏଠାରେ ୫.୧୫ ମିଟରରେ ବନ୍ୟା ପାଣି ପ୍ରବାହିତ ହେଉଛି। ବୁଢ଼ାବଳଙ୍ଗରେ ଏନଏଚ ଗୋବିନ୍ଦପୁରଠାରେ ବିପଦ ସଙ୍କେତ ୮.୧୩ ମିଟର ଥିବାସ୍ଥଳେ ୨.୯ ମିଟରରେ ଜଳ ପ୍ରବାହ କରୁଛି। ମୟୂରଭଞ୍ଜ ଜିଲାରେ ଅତି ପ୍ରବଳ ବର୍ଷା ହେବା ଦ୍ବାରା ବୁଢ଼ାବଳଙ୍ଗ ଜଳସ୍ତର ବଢ଼ିଥିଲା। ଜିଲାର କିଛି ଅଞ୍ଚଳରେ ବନ୍ୟା ପରିସ୍ଥିତି ଦେଖାଦେଇଥିଲା। ସୁବର୍ଣ୍ଣରେଖା, ବୈତରଣୀ ଏବଂ ଜଳକା ବିପଦ ସଙ୍କେତ ଉପରେ ପ୍ରବାହ ଦ୍ବାରା ବନ୍ୟା ପାଣି ଗାଁଗଣ୍ଡାକୁ ମାଡିଥିଲା। ବର୍ତ୍ତମାନ ନଦୀର ଜଳସ୍ତର ବିପଦ ସଙ୍କେତ ତଳେ ରହିଛି। କିନ୍ତୁ ଆଗକୁ ଝାଡଖଣ୍ଡରେ ପ୍ରବଳ ବର୍ଷାର ସମ୍ଭାବନା ଥିବାରୁ ସୁବର୍ଣ୍ଣରେଖା ଜଳସ୍ତର ବଢ଼ିବାର ସମ୍ଭାବନା ରହିଛି।
ଅନ୍ୟପଟେ ଆସନ୍ତା ରବିବାର ୬ ତାରିଖରେ ହୀରାକୁଦ ଗେଟ ଖୋଲାଯାଇ ଚଳିତବର୍ଷର ପ୍ରଥମ ବନ୍ୟାଜଳ ନିଷ୍କାସନ କରାଯିବ। ମହାନଦୀର ଉପରମୁଣ୍ଡରେ ପ୍ରବଳ ବର୍ଷା ହେଉଛି। ଫଳରେ ହୀରାକୁଦ ଜଳଭଣ୍ଡାରକୁ ଜଳ ପ୍ରବାହ ବଢ଼ୁଛି। ଗୁରୁବାର ସନ୍ଧ୍ୟା ୬ଟା ସୁଦ୍ଧା ହୀରାକୁଦ ଜଳ ଭଣ୍ଡାର ଜଳପତ୍ତନ ୬୦୩.୨୫ଫୁଟ ରହିଛି। ଜଳଭଣ୍ଡାରକୁ ୧ ଲକ୍ଷ ୧ହଜାର ୩୪୯ କ୍ୟୁସେକ ଜଳ ପ୍ରବେଶ କରୁଛି। ବିଭିନ୍ନ ପାୱାର ଚ୍ୟାନେଲ ଦେଇ ୩୪ ହଜାର ୨୫୪ କ୍ୟୁସେକ ଜଳ ନିଷ୍କାସିତ ହେଉଛି। ବୁଧବାର ସନ୍ଧ୍ୟା ୬ଟା ସୁଦ୍ଧା ହୀରାକୁଦ ଜଳଭଣ୍ଡାରରେ ୬୦୧ଫୁଟ ଜଳ ଥିବାବେଳେ ୯୮ ହଜାର କ୍ୟୁସେକ ଜଳ ପ୍ରବେଶ କରୁଥିଲା। ଗତକାଲି ଅପେକ୍ଷା ଗୁରୁବାର ଉପରମୁଣ୍ଡରୁ ଜଳ ଭଣ୍ଡାରକୁ ଅଧିକ ପାଣି ପ୍ରବେଶ କରୁଛି। ସେହିପରି ସାଳନ୍ଦୀ ଜଳ ଭଣ୍ଡାର କ୍ଷମତା ୮୨.୩ମିଟର ଥିବାବେଳେ ୭୭.୪୦ମିଟର ପାଣି ରହିଛି। ବିପଦ ସଙ୍କେତ ତଳେ ପାଣି ରହିଛି।

Powered by Froala Editor