ଭୁବନେଶ୍ୱର : ଉକôଳମଣି ଗୋପବନ୍ଧୁଙ୍କ କର୍ମଭୂମି ସତ୍ୟବାଦୀରେ ନିର୍ମାଣ ହେବାକୁ ଥିବା ଓଡ଼ିଆ ବିଶ୍ୱବିଦ୍ୟାଳୟ ପାଇଁ ୬୧.୭୩କୋଟି ଟଙ୍କା ଖର୍ଚ୍ଚ ହେବ ବୋଲି ଓବିସିସି ଆକଳନ କରିଛି । ଉଚ୍ଚଶିକ୍ଷା ବିଭାଗ ଅଧୀନରେ ଏହି ବିଶ୍ୱବିଦ୍ୟାଳୟ ଆସୁଥିବାରୁ ଏହାର ଖର୍ଚ୍ଚ ଆକଳନକୁ ପ୍ରଶାସନିକ ଅନୁମୋଦନ ଦେବାକୁ ପୂର୍ତ୍ତ ବିଭାଗ ଉଚ୍ଚଶିକ୍ଷା ବିଭାଗକୁ ଚିଠି ଲେଖିଛି । ଏହି ପ୍ରକଳ୍ପକୁ ପ୍ରଶାସନିକ ଅନୁମତି ମିଳିବା ପରେ ହିଁ କାମ ଆରମ୍ଭ ହେବ ବୋଲି କୁହାଯାଇଛି । ଦୀର୍ଘ ବର୍ଷ ହେଲା ଏହି ବିଶ୍ୱବିଦ୍ୟାଳୟ ନିର୍ମାଣ ପାଇଁ ଯୋଜନା ହେଉଥିବାବେଳେ ଏବେ ଏହାର ନିର୍ମାଣ କାମ ଆରମ୍ଭ ହେବାର ଆଶା ଦେଖାଦେଇଛି । କିନ୍ତୁ ଏହାକୁ ଦୁଇଟି ପର୍ଯ୍ୟାୟରେ ନିର୍ମାଣ କରାଯିବ । ପ୍ରଥମ ପର୍ଯ୍ୟାୟରେ ୩୯.୮୧କୋଟି ଟଙ୍କା, ଦ୍ୱିତୀୟ ପର୍ଯ୍ୟାୟରେ ୨୧.୯୨କୋଟି ଖର୍ଚ୍ଚ ହେବ । ଏବେ ଏହି ବିଶ୍ୱବିଦ୍ୟାଳୟ ପାଇଁ ୧୦ଏକର ଜମି ଅଧିଗ୍ରହଣ ହୋଇଥିବାରୁ ଏଠାରେ ଏବେ ପ୍ରଥମ ପର୍ଯ୍ୟାୟ କାମ ହେବ । ଏଥିରେ ୫ଟି ସ୍କୁଲ ଅଫ୍ ଲର୍ଣ୍ଣିଂ, ପ୍ରଶାସନିକ ଭବନ, ଅଡିଟୋରିୟମ ଏବଂ ୧୬୦ ଶଯ୍ୟା ବିଶିଷ୍ଟ ହଷ୍ଟେଲ ନିର୍ମାଣ ହେବ । ଏହି କାମ ଶେଷ ହେବା ପରେ ଦ୍ୱିତୀୟ ପର୍ଯ୍ୟାୟରେ ଏହାର ସମ୍ପ୍ରସାରଣ ହେବ । ସୂଚନାଯୋଗ୍ୟ ଯେ, ବନ ବିଦ୍ୟାଳୟ ଢାଞ୍ଚାରେ ନିର୍ମାଣ ହେବାକୁ ଥିବା ଓଡ଼ିଆ ବିଶ୍ୱବିଦ୍ୟାଳୟ ପାଇଁ ଜୁଲାଇ ୨୭, ୨୦୧୮ରେ ଐତିହ୍ୟ କ୍ୟାବିନେଟରେ ନିଷ୍ପତ୍ତି ହୋଇଥିଲା । ଏହାର ତିନି ମାସ ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଏହି ବିଶ୍ୱବିଦ୍ୟାଳୟର ଶିଳାନ୍ୟାସ କରିଥିଲେ । ହେଲେ ତିନି ବର୍ଷ ଭିତରେ ଏଥିପାଇଁ ଇଟା ଖଣ୍ଡେ ବି ପଡ଼ିପାରିନି । ଅପରପକ୍ଷେ ରାଜ୍ୟ ସରକାର ଚଳିତବର୍ଷ ବଜେଟରେ ୧୦କୋଟି ଟଙ୍କା ବରାଦ କରିଛନ୍ତି । ଏହାପରେ ମୁଖ୍ୟମନ୍ତ୍ରୀ ଗତ ଫେବ୍ରୁଆରି ୨୪ ତାରିଖରେ ଏହାର ଡିଜାଇନକୁ ଅନୁମୋଦନ କରିଛନ୍ତି । ଏବେ ଖର୍ଚ୍ଚ ଆକଳନ ପ୍ରସ୍ତୁତ ହୋଇସାରିଥିବାରୁ ଏହାର ନିର୍ମାଣ ନେଇ ଆଶା ଉଜ୍ଜୀବିତ ହୋଇଛି । ଓଡ଼ିଆ ବିଶ୍ୱବିଦ୍ୟାଳୟରେ ଛାତ୍ରଛାତ୍ରୀମାନେ ଓଡ଼ିଆ, ଭାଷା, ସାହିତ୍ୟ, ସଂସ୍କୃତି କ୍ଷେତ୍ରରେ ଗବେଷଣା କରିବା ଭଳି ପାଠ୍ୟକ୍ରମ ରହିବ ।

Powered by Froala Editor