ଏଣିକି ‘ବିଞ୍ଜ ଆପ୍’ରେ ଧାରାବାହିକ ଭାବେ ପଢିପାରିବେ ହିନ୍ଦୀ ଉପନ୍ୟାସ
ଏଣିକି ଅନଲାଇନରେ ଆପଣ ଧାରାବାହିକ ଭାବେ ପଢିପାରିବେ ହିନ୍ଦୀ ଉପନ୍ୟାସ । ଏଥିପାଇଁ ଭାରତର ସର୍ବବୃହତ ପ୍ରକାଶନ ସଂସ୍ଥା ନୋଶନ ପ୍ରେସ ପକ୍ଷରୁ ‘ବିଞ୍ଜ ଆପ୍’ ପ୍ରଚଳନ କରାଯାଇଛି । ଗୁଗୁଲ ପ୍ଲେ ଏବଂ ଅନ୍ୟ ଆପ୍ ଷ୍ଟୋରରେ ବିଞ୍ଜ ଆପ୍ ମାଗଣାରେ ଉପଲବ୍ଧ ହେଉଛି । ଏଥିରେ ବିଭିନ୍ନ ଭାରତୀୟ ଭାଷାର ଶ୍ରେଷ୍ଠ କଥା-କୃତିକୁ ଧାରାବାହିକ ଭାବରେ ପଢିବାର ସୁଯୋଗ ମିଳିବ । ଆପରେ ସଂପ୍ରତି କୁଂବର ନାରାୟଣ, ଗୀତ ଚତୁର୍ବେଦୀ, ଋଷିକେଶ ସୁଲଭ, ଅବଧେଶ ପ୍ରୀତ, କୃଷ୍ଣ କଳ୍ପିତ, ମନୀଷା କୁଳଶ୍ରେଷ୍ଠ, ଚନ୍ଦନ ପାଣ୍ଡେ ଏବଂ କୁନାଲ ସିଂହଙ୍କ ଭଳି କିଛି ବିଶିଷ୍ଟ ଲେଖକଙ୍କର ନୂତନ ଏବଂ ମୌଳିକ ଉପନ୍ୟାସ ଉପଲବ୍ଧ ହେଉଛି । ପ୍ରେମଚନ୍ଦ, ଜୟଶଙ୍କର ପ୍ରସାଦ, ଭୁବନେଶ୍ୱର, ଆଚାର୍ଯ୍ୟ ଚତୁରସେନ ଶାସ୍ତ୍ରୀଙ୍କ ଭଳି କ୍ଲାସିକ ଗାଳ୍ପିକଙ୍କର କୃତି ମଧ୍ୟ ଏଥିରେ ଉପଲବ୍ଧ ହେବ । ବିଞ୍ଜକୁ ସଂପ୍ରତି ହିନ୍ଦୀ ଓ ତାମିଲ ଭାଷାରେ ପ୍ରଚଳନ କରାଯାଇଛି ଏବଂ ଖୁବଶୀଘ୍ର ଏହାକୁ ଅନ୍ୟ ଭାରତୀୟ ଭାଷାରେ ମଧ୍ୟ ଉପଲବ୍ଧ କରାଯିବ । ଏହି ଆପ୍ ଆଣ୍ଡ୍ରଏଡ ଏବଂ ଆଇଓଏସ୍ ଉଭୟ ବ୍ୟବହାରକାରୀଙ୍କ ପାଇଁ ଉପଲବ୍ଧ ହେଉଛି । ଏଥିସହିତ ନିଜ ପସନ୍ଦର ଲେଖକଙ୍କ ସହିତ କଥାବାର୍ତ୍ତା ହେବାକୁ ସୁଯୋଗ ଉପଲବ୍ଧ ହେବ ଏବଂ ସ୍ମାର୍ଟଫୋନ ପାଠକଙ୍କ ପାଇଁ ଲେଖକ ହେବା ସୁଯୋଗ ମଧ୍ୟ ମିଳିବ । ନୋଶନ ପ୍ରେସର ସହ ପ୍ରତିଷ୍ଠାତା ଏବଂ ସିଇଓ ନବୀନ ବଲସାକୁମାର କହିଛନ୍ତି, ତାଙ୍କର ଉଦ୍ଦେଶ୍ୟ ହେଉଛି ଗୁଣବତ୍ତାରେ ପରିପୂର୍ଣ୍ଣ ସାହିତ୍ୟକୁ ଆକର୍ଷଣୀୟ କଳେବରରେ ସ୍ମାର୍ଟଫୋନ ବ୍ୟବହାରକାରୀଙ୍କ ନିକଟରେ ପହଞ୍ଚାଇବା ।
Powered by Froala Editor
