ପ୍ରଥମ ଥର ପାଇଁ, ଭାରତର ରାଷ୍ଟ୍ରପତି ଭବନରେ ପ୍ରତିଧ୍ୱନିତ ହେବାକୁ ଯାଉଛି ଶାହାନାଇ। ଦ୍ରୌପଦୀ ମୁର୍ମୁଙ୍କ ସୁରକ୍ଷାରେ ନିୟୋଜିତ ପିଏସ୍‌ଓ ପୁନମ୍‌ ଗୁପ୍ତା ଏବଂ ସିଆର୍‌ପିଏଫ୍‌ ଅଧିକାରୀ ଅବନୀଶ ସିଂହଙ୍କୁ ରାଇସିନା ହିଲ୍ସରେ ଥିବା ରାଷ୍ଟ୍ରପତି ଭବନରେ ବିବାହ କରିବାକୁ ଅନୁମତି ମିଳିଛି। ଦୁହେଁ ଏହି ମାସରେ ଭାଲେଣ୍ଟାଇନ୍ସ ସପ୍ତାହରେ ବିବାହ କରିବାକୁ ଯାଉଛନ୍ତି। ୧୨ ଫେବୃଆରୀରେ କିଛି ବିଶିଷ୍ଟ ବ୍ୟକ୍ତିଙ୍କ ଉପସ୍ଥିତିରେ ଏହି ବିବାହ ହେବାର କାର୍ଯ୍ୟକ୍ରମ ରହିଛି।

ସୂଚନା ଅନୁଯାୟୀ, ଶିବପୁରୀର ବାସିନ୍ଦା ପୁନମ ଗୁପ୍ତା ପ୍ରଥମ ଭାରତୀୟ ନାଗରିକ ଭାବେ ରାଷ୍ଟ୍ରପତି ଭବନରେ ବିବାହ କରିବାକୁ ଯାଉଛନ୍ତି। ମଧ୍ୟପ୍ରଦେଶ ଶିବପୁରୀର ବାସିନ୍ଦା ପୁନମ ସେଣ୍ଟ୍ରାଲ ରିଜର୍ଭ ପୋଲିସ ଫୋର୍ସର ମହିଳା ଆସିଷ୍ଟାଣ୍ଟ କମାଣ୍ଡାଣ୍ଟ ତଥା ରାଷ୍ଟ୍ରପତି ଭବନରେ ପିଏସଓ ଭାବରେ ସେ କାର୍ଯ୍ୟରତ ଅଛନ୍ତି । ଜମ୍ମୁ ଓ କାଶ୍ମୀରରେ ନିଯୁକ୍ତ ଥିବା ସିଆରପିଏଫ ଆସିଷ୍ଟାଣ୍ଟ କମାଣ୍ଡାଣ୍ଟ ଅବନୀଶ କୁମାରଙ୍କୁ ବିବାହ କରିବେ ପୁନମ୍ । ରାଷ୍ଟ୍ରପତି ଭବନର ମଦର ଟେରେସା କ୍ରାଉନ କମ୍ପ୍ଲେକ୍ସରେ ଏହି ବିବାହ ଅନୁଷ୍ଠିତ ହେବ।

ପୁନମ୍‌ ଗୁପ୍ତା ରାଷ୍ଟ୍ରପତି ଭବନରେ ବିବାହ କରିବା ପାଇଁ ମହାମହିମ ଦ୍ରୌପଦୀ ମୁର୍ମୁଙ୍କଠାରୁ ଅନୁମତି ମାଗିଥିଲେ। ଅନୁମତି ପାଇବା ପରେ, ରାଷ୍ଟ୍ରପତି ଭବନରେ ଏବେ ବିବାହ ପାଇଁ ପ୍ରସ୍ତୁତି ଆରମ୍ଭ ହୋଇଯାଇଛି।

ଜାଣନ୍ତୁ ପୁନମ୍‌ ଏବଂ ଅବନିଶ ସିଂହ କିଏ?

ରାଷ୍ଟ୍ରପତିଙ୍କ ସୁରକ୍ଷାରେ ନିଯୁକ୍ତ ପୁନମ୍‌ UPSC ମାଧ୍ୟମରେ କେନ୍ଦ୍ରୀୟ ସୁରକ୍ଷା ବାହିନୀରେ ଯୋଗ ଦେଇଛନ୍ତି। ୨୦୧୮ ମସିହାରେ ତାଙ୍କୁ ଆସିଷ୍ଟାଣ୍ଟ କମାଣ୍ଡର ଭାବରେ ନିଯୁକ୍ତ କରାଯାଇଥିଲା। ପୁନମ ବିହାରରେ ନକ୍ସଲ ଅପରେସନରେ ମଧ୍ୟ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଛନ୍ତି। ପୁନମ ୭୪ତମ ଗଣତନ୍ତ୍ର ଦିବସ ଅବସରରେ ମହିଳା ଦଳର ମଧ୍ୟ ନେତୃତ୍ୱ ନେଇଥିଲେ।

ପୁନମଙ୍କ ଭାବି ସ୍ବାମୀ ଅବନୀଶ ସିଂହ ମଧ୍ୟ CRPFରେ ଜଣେ ସହାୟକ କମାଣ୍ଡର। ଅବନୀଶ ବର୍ତ୍ତମାନ ଜମ୍ମୁ ଏବଂ କାଶ୍ମୀରରେ ପୋଷ୍ଟିଂ ହୋଇଛନ୍ତି। ଦୁହେଁ ପ୍ରେମ ବିବାହ କରିବାକୁ ଯାଉଛନ୍ତି।

Powered by Froala Editor