ପ୍ରସିଦ୍ଧ ଗାୟିକା ଆଶା ଭୋସଲେଙ୍କ ନାତୁଣି ଜନଇ ଭୋସଲେ କ୍ରିକେଟରଙ୍କ ପ୍ରେମରେ ପଡିଛନ୍ତି ବୋଲି କିଛି ଦିନ ହେଲା ଚର୍ଚ୍ଚା ଚାଲୁଥିଲା । କିନ୍ତୁ ଚର୍ଚ୍ଚାରେ ପୂର୍ଣ୍ଣଚ୍ଛେଦ ପକାଇଛନ୍ତି କ୍ରିକେଟର ଓ ଆଶାଙ୍କ ନାତୁଣି । ଦୁହେଁ ପ୍ରେମରେ ନୁହେଁ ବରଂ ଭାଇ-ଭଉଣୀ ବୋଲି କହିଛନ୍ତି । 

ଜନଇ ଭୋସଲେ ନିଜର ୨୩ତମ ଜନ୍ମଦିନର କିଛି ଫଟୋ ସୋସିଆଲ ମିଡିଆରେ ସେୟାର କରିଥିଲେ। ସେଥିରୁ ଗୋଟିଏ ଫଟୋରେ ସେ କ୍ରିକେଟର ମହମ୍ମଦ ସିରାଜଙ୍କ ସହ ନଜର ଆସିଥିଲେ। ଫଟୋରେ ସେ ସିରାଜଙ୍କ କାନ୍ଧରେ ହାତ ରଖି ତାଙ୍କୁ କିଛି କହୁଥିବା ଦେଖାଯାଇଥିଲା। ଏହି ଫଟୋ ଭାଇରାଲ ହେବା ପରେ ଦୁହେଁ ପରସ୍ପରକୁ ଡେଟ୍ କରୁଛନ୍ତି ବୋଲି ଚର୍ଚ୍ଚା ହୋଇଥିଲା। କିନ୍ତୁ ଏବେ ଦୁହେଁ ଇନଷ୍ଟାଗ୍ରାମ ଷ୍ଟୋରୀ ମାଧ୍ୟମରେ ପରସ୍ପର ସହ ଥିବା ସମ୍ପର୍କ ବିଷୟରେ କହିଛନ୍ତି। 

ଜନଇ ଭୋସଲେ ତାଙ୍କ ଇନଷ୍ଟାଗ୍ରାମ ଷ୍ଟୋରୀରେ କ୍ୟାପସନ ଦେଇଥିଲେ, 'ମୋର ପ୍ରିୟ ଭାଇ'। ଏହି ଷ୍ଟୋରୀ ସେୟାର କରି ମହମ୍ମଦ ସିରାଜ ଏକ ସୁନ୍ଦର ବାର୍ତ୍ତା ଲେଖିଥିଲେ। ସେ ଲେଖିଥିଲେ ଯେ, 'ମୋ ଭଉଣୀ ଭଳି ଆଉ କେହି ଭଉଣୀ ନାହାନ୍ତି। ଯେପରି ଚନ୍ଦ୍ର ତାରାମାନଙ୍କ ମଧ୍ୟରେ ଅଛି। ମୋ ଭଉଣୀ ସେଭଳି ହଜାରରେ ଗୋଟିଏ।' ଦୁହେଁ ଏହି ପୋଷ୍ଟ ସେୟାର କରିବା ପରେ ଏହା ସ୍ପଷ୍ଟ ହୋଇଯାଇଛି ଯେ ଉଭୟ ପରସ୍ପରକୁ ଭାଇ ଏବଂ ଭଉଣୀ ବୋଲି ମାନନ୍ତି। ଏପରିକି ଜନଇ ମହମ୍ମଦଙ୍କୁ ନିଜ ପରିବାରର ଗୋଟିଏ ଅଂଶ ବୋଲି କହିଛନ୍ତି । ତେବେ ଏହି ପୋଷ୍ଟ କିମ୍ବା ବିବାଦ ବାବଦରେ ଆଶା ଭୋସଲେ କୌଣସି ପ୍ରତିକ୍ରିୟା ରଖିନାହାନ୍ତି । 

Powered by Froala Editor