କେନ୍ଦ୍ର କ୍ୟାବିନେଟ ଗୁରୁବାର ଅଷ୍ଟମ ବେତନ ଆୟୋଗକୁ ଅନୁମୋଦନ କରିଛି। ଏହା ଫଳରେ କେନ୍ଦ୍ର ସରକାରୀ କର୍ମଚାରୀଙ୍କ ଦରମା ବଢିବାର ରାସ୍ତା ପରିଷ୍କାର ହୋଇଛି । ଏହା ଦ୍ୱାରା ସରକାରୀ କର୍ମଚାରୀଙ୍କ ଦରମାରେ ଏକ ବିରାଟ ବୃଦ୍ଧି ଘଟିବ। କର୍ମଚାରୀମାନେ ଗତ ୧୦ ବର୍ଷ ଧରି ୮ମ ବେତନ କମିଶନକୁ ଅପେକ୍ଷା କରିଥିଲେ କାରଣ ଏହା ବିଶ୍ୱାସ କରାଯାଉଥିଲା ଯେ ସରକାର ଆଗକୁ ବେତନ କମିଶନକୁ ଅନୁମୋଦନ କରିବେ ନାହିଁ। କିନ୍ତୁ, ଗୁରୁବାର କ୍ୟାବିନେଟ ବୈଠକରେ ଏହି ପ୍ରସଙ୍ଗକୁ ଅନୁମୋଦନ ମିଳିବା ପରେ କଳ୍ପନାଜଳ୍ପନା ଶେଷ ହୋଇଯାଇଛି।

ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଅଧ୍ୟକ୍ଷତାରେ ଅନୁଷ୍ଠିତ କେନ୍ଦ୍ର କ୍ୟାବିନେଟ୍ ବୈଠକରେ ଏହି ନିଷ୍ପତ୍ତିକୁ ଅନୁମୋଦନ ମିଳିଛି। କେନ୍ଦ୍ର ସରକାରୀ କର୍ମଚାରୀ ଓ ପେନସନଭୋଗୀମାନେ ଅଷ୍ଟମ ବେତନ ଆୟୋଗକୁ ଉତ୍ସୁକତାର ସହ ଅପେକ୍ଷା କରିଥିଲେ ଏବଂ ସରକାର ସେମାନଙ୍କୁ ଏହି ଉପହାର ଦେଇଛନ୍ତି । ଖୁବଶୀଘ୍ର ଏଥିପାଇଁ ଏକ କମିଟି ଗଠନ କରାଯାଇ ଅଷ୍ଟମ ବେତନ କମିଶନ ଗଠନ ପ୍ରକ୍ରିୟା ଆରମ୍ଭ ହେବ।

ଏଥିପାଇଁ କ୍ୟାବିନେଟ୍ ସଚିବଙ୍କୁ ଭେଟି ଅଷ୍ଟମ ବେତନ କମିଶନ ଗଠନ ପାଇଁ କେନ୍ଦ୍ରୀୟ କର୍ମଚାରୀଙ୍କ ସଂଗଠନ ଗୁଡ଼ିକ ଦାବି କରିଥିଲେ ଏବଂ ଏହି ସଂଗଠନଗୁଡ଼ିକ ଅଷ୍ଟମ ବେତନ ଆୟୋଗ ଗଠନ ପାଇଁ ସରକାରଙ୍କ ଉପରେ ବାରମ୍ବାର ଚାପ ପକାଉଥିଲେ। ଗତ ବର୍ଷକ ମଧ୍ୟରେ ଅନେକ ଥର କର୍ମଚାରୀ ସଂଗଠନ କେନ୍ଦ୍ର ସରକାରଙ୍କ ନିକଟରେ ଏ ନେଇ ସ୍ପଷ୍ଟୀକରଣ ଦାବି କରିଆସୁଥିଲେ।

ଏହା ବିଶ୍ୱାସ କରାଯାଉଛି ଯେ ୮ମ ବେତନ କମିଶନ ଜାନୁଆରୀ ୨୦୨୬ ରୁ ଲାଗୁ କରାଯାଇପାରେ। କାରଣ ସପ୍ତମ ବେତନ କମିଶନର ସମୟ ସୀମା ଜାନୁଆରୀରେ ହିଁ ଶେଷ ହୋଇଯିବ। ଏହା ପୂର୍ବରୁ ସମସ୍ତ ଅଂଶୀଦାର ଏବଂ ସରକାରଙ୍କ ସହିତ ପରାମର୍ଶ କରାଯିବ।

Powered by Froala Editor