ପ୍ରତି ବର୍ଷ ପାଳନ କରାଯାଉଛି ସଚେତନତା ମାସ । କିନ୍ତୁ ଦୁର୍ଘଟଣା କମିବା ପରିବର୍ତ୍ତେ ବଢ଼ିବାରେ ଲାଗିଛି । ସୂଚନା ଅନୁସାରେ, ୨୦୨୨ ଜାନୁଆରୀରରୁ ଡିସେମ୍ବର ମଧ୍ୟରେ ରାଜ୍ୟରେ ୧୧ ହଜାର ୬୬୩ଟି ଦୁର୍ଘଟଣା ମାମଲା ରୁଜୁ ହୋଇଥିଲା । ଏହି ଦୁର୍ଘଟଣାରେ ୫ ହଜାର ୪୬୭ ଜଣଙ୍କ ଜୀବନ ଯାଇଥିବା ବେଳେ ୧୦ ହଜାର ୩୦୨ ଜଣ ଗୁରୁତର ଆହତ ହୋଇଥିଲେ । ୨୦୨୩ ଜାନୁଆରୀ ଡିସେମ୍ବର ମଧ୍ୟରେ ଦୁର୍ଘଟଣା ସଂଖ୍ୟା ୧୨ ହଜାର ୫୨କୁ ବୃଦ୍ଧି ପାଇଥିଲା । ଏଥିରେ ୫ ହଜାର ୬୯୬ ଜଣଙ୍କ ମୃତ୍ୟୁ ହୋଇଥିବାବେଳେ ୧୦ ହଜାର ୪୧୯ ଜଣ ଗୁରୁତର ଆହତ ହୋଇଥିଲେ । ୨୦୨୨ ତୁଳନାରେ ୨୦୨୩କୁ ଦୁର୍ଘଟଣାରେ ମୃତକଙ୍କ ହାର୍ ୪.୨ପ୍ରତିଶତ ବୃଦ୍ଧି ପାଇଛି ।

ଏ ସଂକ୍ରାନ୍ତରେ ପରିବହନ ବିଭାଗର ବରିଷ୍ଠ ଅଧିକାରୀ କହିଛନ୍ତି, ସଚେତନତା ପାଇଁ ପ୍ରତିବର୍ଷ ବିପୁଳ ଅର୍ଥ ଖର୍ଚ୍ଚ ହେଉଛି କିନ୍ତୁ ଏହାର ପ୍ରଭାବ ଲୋକଙ୍କ ଉପରେ ପଡ଼ିପାରୁ ନାହିଁ । ଯେ ପର୍ଯ୍ୟନ୍ତ ଲୋକେ ନିଜ ସ୍ତରରେ ସଚେତନ ହେବେନି, ସେ ପର୍ଯ୍ୟନ୍ତ ଦୁର୍ଘଟଣା ହ୍ରାସ ହେବ ନାହିଁ ବୋଲି ସେ କ୍ଷୋଭର ସହ ପ୍ରକାଶ କରିଛନ୍ତି ।

ସୂଚନା ଅନୁଯାୟୀ, ସଚେତନତା ପାଇଁ ବିଭିନ୍ନ ଆଞ୍ଚଳିକ ପରିବହନ କାର୍ଯ୍ୟାଳୟ (ଆର୍‌ଟିଓ)କୁ ରାଜ୍ୟ ସରକାର ୪ରୁ ୬ଲକ୍ଷ ଟଙ୍କା ପର୍ଯ୍ୟନ୍ତ ପ୍ରଦାନ କରିଥାନ୍ତି । ଯେଉଁ ଆରଟିଓ ଅଧୀନରେ ଅପେକ୍ଷାକୃତ କମ୍ ଗାଡ଼ି ପଞ୍ଜୀକରଣ ହେଉଛି ସେହିସବୁ କାର୍ଯ୍ୟାଳୟକୁ ୪ଲକ୍ଷ ଏବଂ ବଡ଼ବଡ଼ ଆରଟିଓଙ୍କୁ ୬ଲକ୍ଷ ଟଙ୍କା ଦିଆଯାଇଛି । ଏହି ଅର୍ଥରେ ଆରଟିଓଙ୍କ ପକ୍ଷରୁ ବିଭିନ୍ନ ଅଞ୍ଚଳରେ ସଚେତନତା ରଥ ପରିକ୍ରମା କରାଯାଉଛି । ସେହିପରି ସ୍କୁଲ୍ ପିଲାଙ୍କ ମଧ୍ୟରେ ଚିତ୍ରାଙ୍କନ ପ୍ରତିଯୋଗିତା, ବିଭିନ୍ନ ସ୍ଥାନରେ ହୋର୍ଡିଂ, ଡ୍ରାଇଭରମାନଙ୍କ ଆଖି ପରୀକ୍ଷା ଆଦି କରାଯାଉଛି । କିନ୍ତୁ ଏହାର ସୁଫଳ କାହିଁକି ମିଳୁନାହିଁ ତାହାର ଉତ୍ତର କାହା ପାଖରେ ନାହିଁ ।

Powered by Froala Editor