ମୁହଁକୁ ଲାଜ ନଥିଲା କି ସରମ । ୯ ଦିନର ଶିଶୁପୁତ୍ରକୁ ବିକି ଦେଇ ଅଲାଜୁକ ବାପା ଚଲାଉଥିଲା ବାଇକ୍ । ସେ ବାଇକ୍ କିଣା ହୋଇଥିଲା ପୁଅର ବିକ୍ରି ଟଙ୍କାରେ । ୭ ଦିନ ପରେ ଶିଶୁକୁ ମୟୂରଭଞ୍ଜ ଜିଲ୍ଲା ଉଦଳା ଅଞ୍ଚଳରୁ ଶନିବାର ଉଦ୍ଧାର କରାଯାଇଛି । ଏ ଘଟଣା ଘଟିଯାଇଛି ବସ୍ତା ଥାନା ଅଧୀନ ନଟାକଟା ପଞ୍ଚାୟତ ହଦମୌଦ ଗ୍ରାମରେ ଘଟିଛି । ବାପା ଶିଶୁ ପୁତ୍ରକୁ ୬୦ ହଜାର ଟଙ୍କାରେ ବିକି ଦେଇଥିବା ଲଜ୍ଜାକର ଘଟଣା ସାମ୍‌ନାକୁ ଆସିଛି ।

ସୂଚନା ଅନୁଯାୟୀ, ହଦମୌଦ ଗ୍ରାମର ଶାନ୍ତି ବେହେରା ତିନି ବର୍ଷ ପୂର୍ବେ ମୟୂରଭଞ୍ଜ ଜିଲ୍ଲା ରାସଗୋବିନ୍ଦପୁର ବ୍ଲକ୍ ଅନ୍ତର୍ଗତ ପୋଡ଼ାପାଡ଼ା ଗ୍ରାମର ଧର୍ମୁ ବେହେରାଙ୍କୁ ଦ୍ୱିତୀୟ ବିବାହ କରିଥିଲେ । ପୂର୍ବରୁ ଶାନ୍ତିଙ୍କର ଏକ ଶିଶୁପୁତ୍ର ଥିଲା । ଧର୍ମୁଙ୍କୁ ବିବାହ କରିବା ପରେ ଆଉଥରେ ଗର୍ଭବତୀ ହୋଇଥିଲେ । ସ୍ୱାମୀ ତାଙ୍କୁ ପ୍ରସବ କରାଇବା ନିମନ୍ତେ ଗତ ୧୯ ତାରିଖରେ ବାରିପଦାସ୍ଥିତ ପିଆରଏମ ମେଡିକାଲ କଲେଜ ହସପିଟାଲରେ ନେଇ ଭର୍ତ୍ତି କରାଇଥିଲେ । ସେଠାରେ ଏକ ପୁତ୍ର ସନ୍ତାନ ଜନ୍ମ ହୋଇଥିଲା ।

ଗତ ଡିସେମ୍ବର ୨୨ ତାରିଖ ହସ୍ପିଟାଲରୁ ଡିସଚ୍ଚାର୍ଜ ହେବା ପରେ ଧର୍ମୁର୍ ଗ୍ରାମର ଦୁଇ ଯୁବକଙ୍କ ଯୋଗାଯୋଗ କରି ଉଦଳା ଉପଖଣ୍ଡ ଅଧୀନ ସାଇଁକୁଳା ପଞ୍ଚାୟତ ଅନ୍ତର୍ଗତ ମାଣିଚ ଗ୍ରାମର ଏକ ନିଃସନ୍ତାନ ଦମ୍ପତି ପ୍ରକାଶ ନାୟକ, ଜୟନ୍ତୀ ନାୟକଙ୍କୁ ୬୦ ହଜାର ଟଙ୍କାରେ ବିକ୍ରି କରିଦେଇଥିଲେ । ସେହି ଟଙ୍କାରେ ଏକ ନୂଆ ବାଇକ୍ କିଣିଥିଲେ । ଧର୍ମୁ ନିଜ ଗାଁରେ ବୁଲାବୁଲି କରିବା ପରେ ଘଟଣା ପ୍ରଘଟ ହୋଇଥିଲା ।

ମୟୂରଭଞ୍ଜ ଖୁଣ୍ଟା ଓ ବସ୍ତା ଥାନା ପୁଲିସ ହଦମୌଦ ଗାଁରେ ତଦନ୍ତ କରିଥିଲା ବେଳେ ଶନିବାର ଶିଶୁପୁତ୍ରକୁ ଉଦଳାରୁ ଉଦ୍ଧାର କରାଯାଇଛି । ଶିଶୁକୁ ସ୍ପେଶାଲ ଆଡପସନ୍ ଏଜେନ୍‌ସିକୁ ହସ୍ତାନ୍ତର କରାଯାଇଛି । ଅନ୍ୟପଟେ ଧର୍ମୁ ଏହାକୁ ମିଛ ବୋଲି କହିଛି । ବାଇକ୍ ଶ୍ୱଶୂର ଘର ଲୋକ ଦେଇଛନ୍ତି ବୋଲି କହି ଭୁଆଁ ବୁଲାଉଥିଲା । ହେଲେ ତଦନ୍ତ ପରେ ସବୁ ସତ ମାନିଯାଇଛି ।  

Powered by Froala Editor