ପିସ୍ତଲ ଦେଖାଇ ଲୁଟିନେଲେ ଲୁହା ପାଇପ
ସମ୍ବଲପୁର : ସ୍ଥାନୀୟ ଅଇଁଠାପାଲି ଥାନା ଅନ୍ତର୍ଗତ ସଙ୍କର୍ମା ଅଞ୍ଚଳରେ ଏକ ଠିକାଦାରଙ୍କ କାମ ଚାଲୁଥିବା ବେଳେ ଉକ୍ତ ଅଞ୍ଚଳରେ ନିର୍ମାଣ ସାମଗ୍ରୀ ଗୁଡିକ ରଖାଯାଇଥିଲା। ଗତ ୧୬ ତାରିଖ ରାତ୍ରିରେ ଗୋବିନ୍ଦତୋଲା, ଧନୁପାଲି ନିବାସୀ ତଥା ଠିକାଦାରଙ୍କ ନିକଟରେ କାର୍ଯ୍ୟ କରୁଥିବା ସୁପରଭାଇଜର ସତ୍ୟବ୍ରତ ଦାସ ନିର୍ମାଣ ସ୍ଥଳକୁ ଯାଇଥିଲେ । ସେ ନିର୍ମାଣସ୍ଥଳକୁ ଯିବାରୁ ସେଠାରେ ଦେଖିବାକୁ ପାଇଥିଲେ ଯେ, କିଛି ଯୁବକ ଏକ ନମ୍ବର ବିହୀନ ଟ୍ରକରେ ରଖାଯାଇଥିବା ଲୁହାର ପାଇପ ଗୁଡିକୁ ଭର୍ତ୍ତି କରୁଥିଲେ। ଏହା ଦେଖି ଶ୍ରୀ ଦାସ ମନା କରିବାରୁ ଯୁବକ ମାନେ ତାଙ୍କୁ ଧକ୍କା ଦେବା ସହିତ ଏକ ପିସ୍ତଲ ଦେଖାଇ ତାଙ୍କୁ ଜୀବନରେ ମାରିଦେବାକୁ ଧମକ ଦେଇଥିଲେ। ଫଳରେ ଜୀବନ ବିକଳରେ ସୁପରଭାଇଜର ଶ୍ରୀ ଦାସ ଘଟଣାସ୍ଥଳରୁ ପଳାଇ ଆସି ଠିକାଦାରଙ୍କୁ ଖବର ଦେଇଥିଲେ। ଏହା ପରେ ଉଭୟ ଅଭିଯୋଗ କରିବାରୁ ଅଇଁଠାପାଲି ଥାନାରେ ପୁଲିସ ଏକ ମାମଲା ରୁଜୁ କରି ଘଟଣାର ତଦନ୍ତ ଆରମ୍ଭ କରିଥିଲା ।
Powered by Froala Editor
