ରାଜପଥରେ ବୁଲୁଛି ମହାବଳ
ବ୍ରହ୍ମପୁର ଉପକଣ୍ଠରେ ମାତିଛି ମହାବଳ । ଏ ଖବର ଘୂରି ବୁଲିବା ପରେ ବନ ବିଭାଗ ତତ୍ପର ହୋଇଛି । ଗତ ୩ ତାରିଖ ରାତିରେ ପଶ୍ଚିମବଙ୍ଗର କିଛି ପର୍ଯ୍ୟଟକ ଜାତୀୟ ରାଜପଥରେ ବିଶାଖାପାଟଣାରୁ ବ୍ରହ୍ମପୁର ଅଭିମୁଖେ ଆସୁଥିଲେ । ଭାଲିଆଗଡ଼ ଗ୍ରାମ ଅତିକ୍ରମ କରୁଥିବା ବେଳେ ରାଜପଥରେ ମହାବଳ ରାସ୍ତା ପାର ହେଉଥିବା ଦେଖିଥିଲେ । ମୋବାଇଲ୍ରେ ପର୍ଯ୍ୟଟକମାନେ ଏହାର ଭିଡିଓ ମଧ୍ୟ ଉତ୍ତୋଳନ କରିଛନ୍ତି । ଏହି ଭିଡିଓ ମଙ୍ଗଳବାର ଲୋକଙ୍କ ମୋବାଇଲରେ ଭାଇରାଲ ହୋଇଥିଲା ।
ବୁଧବାର ସକାଳେ ବ୍ରହ୍ମପୁର ଡିଏଫ୍ଓ ଓ ଟିମ୍ ସେହି ଅଞ୍ଚଳକୁ ଯାଇ ତଦନ୍ତ କରିଛନ୍ତି । ସେଠାକାର ଚାଷ ଜମିରେ ମହାବଳର ପାଦଚିହ୍ନ ମିଳିଛି । ମହାବଳ ରାସ୍ତା ପାର ହୋଇ ପାଲୁର ହିଲ୍କୁ ଯାଇଥିବା ଜଣାପଡିଛି । କାରଣ ସେଠାରୁ ପୁଣି ଉକ୍ତ ରାସ୍ତା ଦେଇ ଫେରିବାର ପାଦ ଚିହ୍ନ ରହିଛି । ଫଳରେ ମହାବଳ ପୁଣି ଚିକିଟି ଅଞ୍ଚଳକୁ ଯାଇଥିବା ବନ ବିଭାଗ ଅନୁମାନ କରୁଛି ।
ସନ୍ଧ୍ୟାରେ ବନବିଭାଗର ଏକ ଟିମ୍ ସ୍ଥାନୀୟ ଅଞ୍ଚଳରେ ବୁଲି ଗ୍ରାମବାସୀଙ୍କୁ ସଚେତନ କରିଛନ୍ତି । ଭୋର୍ରୁ କେହି ବାହାରକୁ ବାହାରନ୍ତୁ ନାହିଁ ବୋଲି ବନବିଭାଗ କର୍ମଚାରୀ କହିଛନ୍ତି । ଏହାସହ ଗୃହପାଳିତ ପ୍ରାଣୀଙ୍କୁ ସୁରକ୍ଷିତ ସ୍ଥାନରେ ରଖନ୍ତୁ ବୋଲି ବନ ବିଭାଗ ପକ୍ଷରୁ ସଚେତନତା କରିଛି ।
Powered by Froala Editor
