ଶୁକ୍ରବାର କୋଲକାତାର ଜଣେ ଅଭିନେତ୍ରୀ ଜଣେ ବାଇକ୍ ଚାଳକଙ୍କ ଦ୍ବାରା ଆକ୍ରମଣର ଶିକାର ହୋଇଛନ୍ତି। ଅଭିନେତ୍ରୀ ଜଣକ ହେଉଛନ୍ତି ପାୟଲ ମୁଖାର୍ଜୀ। ଅଭିନେତ୍ରୀ ପାୟଲ ମୁଖାର୍ଜୀଙ୍କ କାର୍‌ ଉପରେ ଜଣେ ବାଇକ୍‌ ଚାଳକ ଆଟାକ୍ କରିଛନ୍ତି। ଏହି ଘଟଣାର ଭିଡିଓ ସୋଶାଲ ମିଡିଆରେ ଭାଇରାଲ ହେବାରେ ଲାଗିଛି।

ଏହି ଘଟଣା ଦକ୍ଷିଣ କୋଲକାତାର ଅଲ୍ଟ୍ରା-ପୋସ୍ ସାଉଥ୍ ଆଭେନ୍ୟୁ ଅଞ୍ଚଳରେ ଘଟିଛି। ଅଭିନେତ୍ରୀଙ୍କ କାର୍‌ ଏବଂ ବାଇକ ଆରୋହୀଙ୍କ ମଧ୍ୟରେ ପ୍ରଥମେ ମୁହାଁମୁହିଁ ଧକ୍କା ହୋଇଥିଲା। ଏଥିରେ ବାଇକ୍‌ ଚାଳକ ଜଣକ ରାଗି ଯାଇଥିଲେ।ଏହାପରେ ସେ ଅଭିନେତ୍ରୀଙ୍କ କାର୍‌କୁ ଅଟକାଇ ପାଟିତୁଣ୍ଡ କରିଥିଲେ। ପରେ କାର୍‌ର ଝରକା କାଚ ଭାଙ୍ଗି ଅଭିନେତ୍ରୀଙ୍କୁ ଆକ୍ରମଣ କରିବାକୁ ଉଦ୍ୟମ କରିଥିବା ଅଭିଯୋଗ ହୋଇଛି।

ଏହି ପୂରା ଘଟଣାର ଲାଇଭ୍‌ ଷ୍ଟ୍ରିମିଂ ଅଭିନେତ୍ରୀ ପାୟଲ ନିଜ ଫେସ୍‌ବୁକ୍‌ରେ କରିଛନ୍ତି। ଏଥିରେ ସେ ତାଙ୍କ ସହ ଘଟିଥିବା ଏହି ଭୟଙ୍କର ଘଟଣା ବିଷୟରେ କାନ୍ଦି କାନ୍ଦି ବଖାଣିଛନ୍ତି। କେବଳ ସେତିକି ନୁହେଁ ସୋସିଆଲ୍ ମିଡିଆ ଜରିଆରେ ସାହାଯ୍ୟ ବି ମାଗିଛନ୍ତି। ସେ ଏହି ଭିଡିଓକୁ କୋଲକାତା ପୁଲିସକୁ ଟ୍ୟାଗ୍ ମଧ୍ୟ କରିଛନ୍ତି। ଯାହା ଭାଇରାଲ ହେବାରେ ଲାଗିଛି।

ଅନେକ ଦର୍ଶକ ସେମାନଙ୍କ ହସ୍ତକ୍ଷେପ ପାଇଁ କୋଲକାତା ପୁଲିସକୁ ତାଙ୍କ ପୋଷ୍ଟରେ ଟ୍ୟାଗ୍ କରିଥିଲେ। ଘଟଣା ପରେ ଟଲିଗଞ୍ଜ ପୁଲିସ ଷ୍ଟେସନରେ ଏନେଇ ଏକ ଲିଖିତ ଅଭିଯୋଗ କରିଛନ୍ତି ପାୟଲ। ଏହାପରେ ପୁଲିସ ଏକ ମାମଲା ରୁଜୁ କରି ଅଭିଯୁକ୍ତକୁ ଗିରଫ କରିଛି। 

Powered by Froala Editor