ନରସିଂହପୁର ଥାନା ଅନ୍ତର୍ଗତ ଚତରାପଦା ଗ୍ରାମରେ ଘଟିଛି ହୃଦୟ ବିଦାରକ ଘଟଣା । ପୁଅ ବାହାଘର କରିବାକୁ ବାହାରିଥିବା ବାପାର ବରଯାତ୍ରୀ ବସ୍ ଚକା ତଳେ ଜୀବନ ଚାଲିଯାଇଛି । ମୃତକ ହେଲେ ଗ୍ରାମର ବିମ୍ବାଧର ନାୟକ(୫୫) । ବିମ୍ବାଧରଙ୍କ ପୁଅ ବବୁଲ ନାୟକଙ୍କର ନରସିଂହପୁର ବ୍ଲକ୍ ଅନ୍ତର୍ଗତ ତଗିଲା ଗ୍ରାମରେ ବିବାହ ସ୍ଥିର ହୋଇଥିଲା । ବୁଧବାର ଦିନ ପ୍ରାୟ ୧୨ଟା ବେଳେ ଘରୁ ବିବାହ ଶୋଭାଯାତ୍ରା ବାହାରିଥିଲା । ଏହି ସମୟରେ ବରଯାତ୍ରୀଙ୍କ ଯିବା ପାଇଁ ବସ୍‌ଟି ଷ୍ଟାର୍ଟ ହୋଇନଥିଲା । ଫଳରେ ବସ୍‌କୁ ପଛରୁ ପେଲିବା ପାଇଁ ପଡ଼ିଥିଲା । ପେଲିବା ପରେ ଗାଡ଼ିଟି ଷ୍ଟାର୍ଟ ହୋଇଥିଲା । କିନ୍ତୁ ଗାଡ଼ିର ବ୍ରେକ୍ ଫେଲ୍ ହୋଇଯାଇଥିଲା । ବସ୍‌ଟି ଭାରସାମ୍ୟ ହରାଇ ଲୋକଙ୍କ ଉପରେ ଚଢ଼ିଯାଇଥିଲା । ବରପିତା ବିମ୍ବାଧର ବସ୍ ସାମ୍ନାରେ ଛିଡ଼ା ହୋଇଥିବାବେଳେ ତାଙ୍କ ଉପରେ ବସ ମାଡିଯାଇଥିଲା । ବିମ୍ବାଧରଙ୍କୁ ନରସିଂହପୁର ମେଡିକାଲକୁ ନିଆଯାଇଥିଲା । ମାତ୍ର ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ । ପୁଲିସ ଅପମୃତ୍ୟୁ ମାମଲା ରୁଜୁ କରି ମୃତଦେହକୁ ବଡ଼ମ୍ବା ହସ୍‌ପିଟାଲକୁ ବ୍ୟବଚ୍ଛେଦ ପାଇଁ ପଠାଇଛି ।

ଅନ୍ୟପଟେ ପୁଅ ବାହାଘରରେ ବାପା ବିମ୍ବାଧରଙ୍କ ମୃତ୍ୟୁ ଘଟଣା ପ୍ରଚାରିତ ହେବା ପରେ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଥିଲା । କ୍ଷତିପୂରଣ ଦାବିରେ ଗ୍ରାମବାସୀ ନରସିଂହପୁର-ଅନୁଗୁଳ ମୁଖ୍ୟ ରାସ୍ତାର ଚତରାପଦା ନିକଟରେ ରାସ୍ତା ଅବରୋଧ କରିଥିଲେ । ନରସିଂହପୁର-ଅନୁଗୁଳ ମୁଖ୍ୟ ରାସ୍ତାରେ ଗାଡ଼ି ଚଳାଚଳ ବନ୍ଦ ହୋଇଯାଇଥିଲା ।

Powered by Froala Editor