ଭୁବନେଶ୍ୱର: କେବେ ରତ୍ନଭଣ୍ଡାର ଖୋଲିବ? ଯଦି ଖୋଲାଯିବ ତେବେ କ’ଣ ଗଣତି ମଣତି କରାଯିବ କି ନାହିଁ? ଏସବୁ ପ୍ରଶ୍ନ ଏବେ ରାଜ୍ୟବାସୀ, ରାଜନେତା ଓ ଜଗନ୍ନାଥଙ୍କ ଭକ୍ତଙ୍କ ମନରେ ଉଙ୍କି ମାରୁଥିବାବେଳେ ଏକ ବଡ଼ ଖବର ସାମନାକୁ ଆସିଛି । ତାହା ହେଲା ଜଷ୍ଟିସ ଅରିଜିତ ପଶାୟତ ଏବେ ରାଜଧାନୀ ଭୁବନେଶ୍ୱରରେ ପହଞ୍ଚିଛନ୍ତି । ରତ୍ନଭଣ୍ଡାର ଯାଞ୍ଚ କମିଟିର ଅଧ୍ୟକ୍ଷ ଜଷ୍ଟିସ ଅରିଜିତ ପଶାୟତ ଗୁରୁବାର ଭୁବନେଶ୍ୱର ବିମାନବନ୍ଦରରେ ପହଞ୍ଚିଛନ୍ତି । ସେ ଆସନ୍ତାକାଲି ଠାରୁ ୨୭ ତାରିଖ ପର୍ଯ୍ୟନ୍ତ ପୁରୀରେ ରହିବାର କାର୍ଯ୍ୟକ୍ରମ ରହିଛି । ଆସନ୍ତାକାଲି ହେବାକୁ ଥିବା ରତ୍ନଭଣ୍ଡାର ଇନଭେଣ୍ଟୋରୀ କମିଟି ବୈଠକରେ ଜଷ୍ଟିସ ଅରିଜିତ ପଶାୟତ ଯୋଗଦେବେ । ଅନ୍ୟପକ୍ଷରେ ୮ ତାରିଖ ଦିନ ରତ୍ନଭଣ୍ଡାର ଖୋଲିବ ବୋଲି ଚର୍ଚ୍ଚା ଜୋର ଧରିଥିବାବେଳେ ଭୁବନେଶ୍ୱର ବିମାନବନ୍ଦରରେ ପହଞ୍ଚିôବା ପରେ ଜଷ୍ଟିସ ଅରିଜିତ ପଶାୟତ କହିଛନ୍ତି ଯେ ୮ ତାରିଖ ରତ୍ନଭଣ୍ଡାର ଖୋଲିବା ସମ୍ଭବପର ଲାଗୁନାହିଁ । ରାଜ୍ୟସରକାର ରତ୍ନଭଣ୍ଡାର ଖୋଲିବା ନେଇ ନିଷ୍ପତ୍ତି ନେଇସାରିବା ପରେ ଆମେ କାର୍ଯ୍ୟ ଆରମ୍ଭ କରିଦେବୁ ବୋଲି ସେ କହିଛନ୍ତି । ଆମେ ସେନେଇ ସମ୍ପୂର୍ଣ୍ଣ ପ୍ରସ୍ତୁତ ଅଛୁ  । ଆସନ୍ତାକାଲି ତଦାରଖ କମିଟିର ବୈଠକ ରହିଛି । ଗଣତି ଓ ମଣତି ନେଇ କ’ଣ ମୋଡାଲିଟି ରହିବ ସେ ନେଇ ବୈଠକରେ ଆଲୋଚନା ହେବ ବୋଲି ସେ କହିଛନ୍ତି । ଅନ୍ୟପକ୍ଷରେ ୮ ତାରିଖ ଦିନ ରଥଯାତ୍ରା ଥିବାରୁ ସେଦିନ ହୁଏତ ରତ୍ନଭଣ୍ଡାର ଖୋଲିନପାରେ । ୮ ତାରିଖ ରତ୍ନଭଣ୍ଡାର ଖୋଲାଯିବା ସମ୍ଭାବନା କମ । ଯେବେ ସରକାର ନିଷ୍ପତ୍ତି ନେବେ, ସେବେ ଖୋଲାଯିବ ବୋଲି ଜଷ୍ଟିସ ଅରିଜିତ ପଶାୟତ କହିଛନ୍ତି ।

Powered by Froala Editor