ଇଦ୍ରେ ଗୋଷ୍ଠୀ ସଂଘର୍ଷ, ୧୪୪ ଧାରା ଜାରି
ବାଲେଶ୍ୱର ସହରରେ ସୁନହଟ୍ସ୍ଥିତ ଭୁଜାଖିଆ ପୀରବାବାଙ୍କ ଆସ୍ଥାନ ନିକଟରେ ସୋମବାର ଦୁଇ ଗୋଷ୍ଠୀ ମୁହାଁମୁହିଁ ହେବା ଫଳରେ ଏକାଧିକ ଲୋକ ଆହତ ହୋଇଛନ୍ତି । ୧୦ରୁ ଅଧିକ ଗାଡ଼ି ଭଙ୍ଗାରୁଜା ହୋଇଛି । ସୂଚନା ଅନୁଯାୟୀ, ଇଦ୍ ଅବସରରେ ସଂଖ୍ୟାଲଘୁ ସମ୍ପ୍ରଦାୟର ଲୋକେ ସୋମବାର ସକାଳେ ଦରଘା ପଡ଼ିଆରେ ନମାଜ ପାଠ କରିଥିଲେ । ଏହି ସମୟରେ ସୁନହଟ୍ସ୍ଥିତ ଏକ ଡ୍ରେନ୍ରେ ଲାଲ ରଙ୍ଗର କୌଣସି ଦ୍ରବ୍ୟ ପଡ଼ିଥିବା ଦେଖି ଅନ୍ୟ ଏକ ଗୋଷ୍ଠୀର ଲୋକେ ଏହାକୁ ରକ୍ତ ବୋଲି ଦାବି କରିଥିଲେ । ଏହାକୁ ଗୋଟିଏ ଗୋଷ୍ଠୀ ଗୋ-ରକ୍ତ ଦାବି କରି ଉତ୍କ୍ଷିପ୍ତ ହୋଇପଡ଼ିଥିବା ବେଳେ ଅନ୍ୟ ଗୋଷ୍ଠୀ ଏହାକୁ ଅସ୍ୱୀକାର କରିଥିଲେ । ଏହାକୁ ନେଇ ଉତ୍ତେଜନା ଦେଖାଦେଇଥିଲା ।
ଉଭୟ ଗୋଷ୍ଠୀ ମୁହାଁମୁହିଁ ହେବା ସହ ଢେଲା ପଥର ମାଡ଼ କରିଥିଲେ । ବାଲେଶ୍ୱର ଏସ୍ପି ସାଗରିକା ନାଥ ସଦଳବଳ ଘଟଣା ସ୍ଥଳରେ ପହଞ୍ଚି ଉତ୍ତ୍ୟକ୍ତ ଲୋକଙ୍କୁ ଘଉଡ଼ାଇବାକୁ ଚେଷ୍ଟା କରିଥିଲେ । ଉତ୍ତ୍ୟକ୍ତ ଲୋକେ ପୁଲିସ୍ ଉପରକୁ ମଧ୍ୟ ଢେଲା, ପଥର ମାଡ଼ କରିଥିଲେ । ଏଥିରେ ଜଣେ ଅତିରିକ୍ତ ଏସ୍ପି, ୨ ଜଣ ଡିଏସ୍ପି, ୩ ଜଣ କନଷ୍ଟେବଲଙ୍କ ସମେତ ୧୦ରୁ ଅଧିକ ଲୋକ ଆହତ ହୋଇଥିଲେ । ପରେ ପୁଲିସ୍ ଲାଠି ଚାଳନା କରିବା ସହ ଲୁହବୁହା ଗ୍ୟାସ୍ ପ୍ରୟୋଗ କରିଥିଲା । ଘଟଣାସ୍ଥଳରେ ୧୪୪ ଧାରା ଜାରି କରାଯିବା ସହ ପୁଲିସ୍ ଫୋର୍ସ ମୁତୟନ କରାଯାଇଛି ।
Powered by Froala Editor
