କଟକ ଜିଲ୍ଲା ବାଙ୍କୀ ଥାନା ଡମପଡ଼ା ମହାବିଦ୍ୟାଳୟ ପଛ ପଟ କାଜୁ ଜଙ୍ଗଲରେ ମିଳିଛି ମଣିଷ ଖପୁରୀ ଓ କଙ୍କାଳ। କିଛି ବ୍ୟକ୍ତି ଉକ୍ତ ନର କଙ୍କାଳକୁ ଠାବ କରିବା ପରେ ବାଙ୍କୀ ପୁଲିସକୁ ସୂଚନା ପ୍ରଦାନ କରିଥିଲେ। ବାଙ୍କୀ ପୁଲିସ ପହଂଚି ନରକଙ୍କାଳ ଜବତ କରିବା ସହ ତାକୁ ଫୋରେନସିକ ଲାବୋରେଟୋରିକୁ ପଠାଇଥିବା ଜଣାଯାଇଛି। ଉକ୍ତ ନରକଙ୍କାଳ ନିକଟରେ ଜଣେ ମହିଳାଙ୍କ ପିନ୍ଧାବସ୍ତ୍ର ସହ ପାଣି ବୋତଲ, ଟିଫିନ ବାକ୍ସ, ବ୍ୟାଗ, ପରିଚୟପତ୍ର ଆଦି ପଡିଥିବା ଦେଖିବାକୁ ମିଳିଥିଲା। ସେଥିରେ ଝୁନା ଜେନା ଲେଖାଯାଇଛି। ତାଙ୍କ ଘର ଡମପଡ଼ାରେ।

ଝୁନା ଜେନା ଭାରତ ମସଲା କମ୍ପାନୀରେ ଚାକିରି କରୁଥିଲେ। ୨୦୨୨ ମସିହା ଡିସେମ୍ବର ୧ ତାରିଖ ଦିନ ସେ ଡମପଡ଼ା ସ୍ଥିତ ତାଙ୍କ ଘରୁ ଭାରତ ମସଲା କମ୍ପାନୀକୁ କାମ କରିବା ପାଇଁ ଯାଇଥିଲେ। କିନ୍ତୁ ଆଉ ଘରକୁ ଫେରି ନଥିଲେ। ପରିବାର ଲୋକ ବହୁତ ଖୋଜା ଖୋଜି କରିଥିଲେ। କିନ୍ତୁ ତାଙ୍କୁ ପାଇ ନଥିଲେ। ଏନେଇ ବାଙ୍କୀ ଥାନାରେ ଅଭିଯୋଗ କରିଥିଲେ ପରିବାର ଲୋକ। ଅଭିଯୋଗ ପାଇବା ପରେ ବାଙ୍କୀ ପୁଲିସ କିଛି ଦିନ ତଦନ୍ତ କରିଥିଲା। କିନ୍ତୁ ସଫଳତା ପାଇ ନଥିଲା।

ତେବେ ନରକଙ୍କାଳ ସମ୍ପର୍କରେ ଝୁନାଙ୍କ ପରିବାରବର୍ଗଙ୍କୁ ସୂଚନା ଦେବାପରେ ନିକଟରୁ ମିଳିଥିବା ବିଭିନ୍ନ ସାମଗ୍ରୀକୁ ପରିବାରବର୍ଗ ଚିହ୍ନଟ କରିବା ସହ ମିଳିଥିବା କଙ୍କାଳ ଝୁନାଙ୍କର ହୋଇଥିବା ନେଇ ସନ୍ଦେହ କରିଥିଲେ। ତେବେ ଉକ୍ତ କଙ୍କାଳକୁ ଚିହ୍ନଟ କରିବାକୁ ଫୋରେନସିକ ଲାବୋରେଟୋରିକୁ ପଠାଯାଇଥିବା ବାଙ୍କୀ ଥାନାଧିକାରୀ ଶିବ ଚରଣ ବେହେରା ସୂଚନା ଦେଇଛନ୍ତି।

Powered by Froala Editor