ଜଜ୍ ବିରୋଧରେ ଜଜ୍ଙ୍କ ଅଭିଯୋଗ, ସମସ୍ତ ଶୁଣାଣି ସ୍ଥଗିତ
କଲିକତା ହାଇକୋର୍ଟରେ ଜଣେ ବିଚାରପତିଙ୍କ ବିରୋଧରେ ଅନ୍ୟ ଜଣେ ବିଚାରପତି ଆଣିଛନ୍ତି ସାଂଘାତିକ ଅଭିଯୋଗ। ନକଲି ଜାତିପ୍ରମାଣପତ୍ର ଦୁର୍ନୀତି ମାମଲାରେ କେନ୍ଦ୍ରୀୟ ତଦନ୍ତ ବ୍ୟୁରୋ (ସିବିଆଇ) ଦ୍ୱାରା ତଦନ୍ତକୁ ନେଇ କଲିକତା ହାଇକୋର୍ଟର ଦୁଇ ଖଣ୍ଡପୀଠ ଓ ଖଣ୍ଡପୀଠ ମଧ୍ୟରେ ଏକ ବିରଳ ସଂଘର୍ଷ ଦେଖିବାକୁ ମିଳିଥିବା ବେଳେ ସୁପ୍ରିମକୋର୍ଟ ସମସ୍ତ ଶୁଣାଣିକୁ ସ୍ଥଗିତ ରଖିଛନ୍ତି।
ଘଟଣାର ଗୁରୁତ୍ୱକୁ ଦେଖି ସୁପ୍ରିମକୋର୍ଟ ନିଜ ଆଡୁ ଆସନ୍ତାକାଲି ଏହାର ଶୁଣାଣି କରିବା ପାଇଁ ତାଲିକାଭୁକ୍ତ କରିଛନ୍ତି। ସକାଳ ସାଢ଼େ ୧୦ଟାରେ ପ୍ରଧାନବିଚାରପତି ଜଷ୍ଟିସ୍ ଡିୱାଇ ଚନ୍ଦ୍ରଚୂଡ଼ଙ୍କ ସମେତ ୫ ଜଣ ବରିଷ୍ଠ ବିଚାରପତି ଏହାର ଶୁଣାଣି କରିବେ।
କଲିକତା ହାଇକୋର୍ଟର ବିଚାରପତି ଜଷ୍ଟିସ୍ ଅଭିଜିତ ଗଙ୍ଗୋପାଧ୍ୟାୟ ପଶ୍ଚିମବଙ୍ଗର ବିଭିନ୍ନ ମେଡିକାଲ କଲେଜ ଓ ହସ୍ପିଟାଲରେ ଏମ୍ବିବିଏସ୍ ପାଠ୍ୟକ୍ରମରେ ନାମଲେଖାରେ ଦୁର୍ନୀତି ହୋଇଥିବା ଅଭିଯୋଗ ଉପରେ ଶୁଣାଣି କରି ସିବିଆଇ ତଦନ୍ତ ନିର୍ଦ୍ଦେଶ ଦେଇଥିଲେ।
ଏହି ନିର୍ଦ୍ଦେଶ ବିରୋଧରେ ପଶ୍ଚିମବଙ୍ଗର ତୃଣମୂଳ କଂଗ୍ରେସ ସରକାର ଜଷ୍ଟିସ୍ ସୌମେନ ସେନ୍ଙ୍କ ଡିଭିଜନ ବେଞ୍ଚରେ ଆବେଦନ କରିଥିଲେ। ଡିଭିଜନ ବେଞ୍ଚ ଜଷ୍ଟିସ୍ ଅଭିଜିତ ଗଙ୍ଗୋପାଧ୍ୟାୟ ଦେଇଥିବା ସିବିଆଇ ତଦନ୍ତ ନିର୍ଦ୍ଦେଶ ଉପରେ ରହିତାଦେଶ ଦେଇଥିଲେ। ଡିଭିଜନ ବେଞ୍ଚ ରହିତାଦେଶ ଲଗାଇବା ପରେ ଜଷ୍ଟିସ୍ ଅଭିଜିତ ଗଙ୍ଗୋପାଧ୍ୟାୟ ପୁଣି ଏହାକୁ ଗୁରୁତ୍ୱର ସହିତ ନେଇଥିଲେ। ଡିଭିଜନ ବେଞ୍ଚର ନିର୍ଦ୍ଦେଶ ସତ୍ତ୍ୱେ ମାମଲାର ତଦନ୍ତ କରିବାକୁ ସେ ସିବିଆଇକୁ ନିର୍ଦ୍ଦେଶ ଦେଇଥିଲେ।
ଜଷ୍ଟିସ ଅଭିଜିତ ଗଙ୍ଗୋପାଧ୍ୟାୟ ତାଙ୍କର ଏହି ନୂଆ ନିର୍ଦ୍ଦେଶର ଏକକିତା ନକଲ ଭାରତର ପ୍ରଧାନ ବିଚାରପତି ଓ କଲିକତା ହାଇକୋର୍ଟର ମୁଖ୍ୟ ବିଚାରପତିଙ୍କ ପାଖକୁ ପଠାଇବା ପାଇଁ ହାଇକୋର୍ଟର ରେଜିଷ୍ଟ୍ରାର ଜେନେରାଲଙ୍କୁ କହିଥିଲେ।
ତାଙ୍କ ନୂଆ ନିର୍ଦ୍ଦେଶରେ ଜଷ୍ଟିସ୍ ଅଭିଜିତ ଗଙ୍ଗୋପାଧ୍ୟାୟ କେବଳ ଡିଭିଜନ ବେଞ୍ଚର ନିର୍ଦ୍ଦେଶକୁ ଏଡାଇ ଦେଇ ନାହାନ୍ତି, ବରଂ ଡିଭିଜିନ ବେଞ୍ଚ ଦେଇଥିବା ନିର୍ଦ୍ଦେଶକୁ ସୁପ୍ରିମକୋର୍ଟ ଯାଞ୍ଚ କରନ୍ତୁ ବୋଲି କହିଛନ୍ତି। ଜାନୁଆରି ୨୯ (ସୋମବାର) ଦିନ ସୁପ୍ରିମକୋର୍ଟ ଏହି ମାମଲାର ପୁନର୍ବାର ଶୁଣାଣି କରିବେ।
Powered by Froala Editor
