ଭୁବନେଶ୍ୱର: କନିଷ୍ଠ ଶିକ୍ଷକ ନିଯୁକ୍ତିରେ ଅନିୟମିତତା ଅଭିଯୋଗ ପ୍ରସଙ୍ଗରେ ରାଜ୍ୟ ବିଜେପି ପକ୍ଷରୁ ବିଜେଡିକୁ ଟାର୍ଗେଟ କରାଯାଇଛି । ଏହି ପରିପ୍ରେକ୍ଷୀରେ ମାହାଲମାଣ୍ଡା କିଏ ବିଜେଡି ତା’ର ଉତ୍ତର ଦେଉ ବୋଲି ବିଜେପି ନେତା ଗୋଲକ ମହାପାତ୍ର କହିଛନ୍ତି ।

ସେ କହିଛନ୍ତି ଯେ ରାଜ୍ୟରେ ମାହାଲମାଣ୍ଡା ଓ ଫେକ ସରକାର ଚାଲିଛି । ମେରିଟ ଲିଷ୍ଟରେ ଫେକ ଲୋକଙ୍କ ନାମ ଆସିଛି ଆଉ ଫେକ ନେତା ଶାସନରେ ବସିଛନ୍ତି । ଏହି ମାହାଲମାଣ୍ଡା ସରକାର ଯୋଗୁଁ ରାଜ୍ୟର ଶିକ୍ଷିତ ଯୁବକଯୁବତୀ ଆଜି ଚାକିରିରୁ ବଞ୍ଚିତ ହୋଇଛନ୍ତି । ଏହି ଯୁବକଯୁବତୀମାନେ ଫେକ ସରକାରକୁ ଓପାଡ଼ି ଫିଙ୍ଗିବେ । ଅନଲାଇନ ପରୀକ୍ଷା ଏକ ସଂସ୍ଥା କରେ । ଫଳାଫଳ ରାଜ୍ୟ ସରକାର ପ୍ରକାଶ କରନ୍ତି । କାହାକୁ ନିଯୁକ୍ତି ଦିଆଯିବ ସେ ନିଷ୍ପତ୍ତି ସରକାରଙ୍କର, ସଂସ୍ଥାର ନୁହେଁ । ନିଜ ଦୋଷ ନମାନି ଅନ୍ୟ ଉପରେ କାଦୁଅ ଫିଙ୍ଗିବାର ମାନେ କ’ଣ ବୋଲି ଶ୍ରୀ ମହାପାତ୍ର ପ୍ରଶ୍ନ କରିଛନ୍ତି । 

ଏଠାରେ ଉଲ୍ଲେଖ ଯୋଗ୍ୟ ଯେ କନିଷ୍ଠ ଶିକ୍ଷକ ନିଯୁକ୍ତି ପାଇଁ ଆସିଥିବା ଆଡମିଟ କାର୍ଡରେ ମାହାଲ ମାଣ୍ଡା ନାଁ ଆସିବା ଘଟଣାକୁ ନେଇ ରାଜ୍ୟବ୍ୟାପୀ ଚର୍ଚ୍ଚା ଲାଗି ରହିଛି। ଏହାପରେ ପରୀକ୍ଷାର୍ଥୀମାନେ ଓଡ଼ିଶା ପ୍ରାଥମିକ ଶିକ୍ଷା କାର୍ୟ୍ୟକ୍ରମ ପ୍ରାଧିକରଣ(ଓସେପା) ଦ୍ୱାରା ଚୟନ ପ୍ରକ୍ରିୟାରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ କରିଛନ୍ତି। ଏବେ ଏହି ମାମଲାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ରାଜ୍ୟ ସରକାରଙ୍କୁ କଟାକ୍ଷ କରିଛନ୍ତି।

ଶକ୍ତି ବନ୍ଦନ କର୍ମଶାଳାରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ବକ୍ତବ୍ୟ ଦେବା ସମୟରେ କହିଛନ୍ତି ଯେ, ‘ଓଡ଼ିଶାରେ ଏବେ ମାହଲମାଣ୍ଡାମାନେ ମାତିଛନ୍ତି। ରାଜ୍ୟରେ ୨୦ ହଜାର ଶିକ୍ଷକ ନିଯୁକ୍ତିରେ ଏ ମାହଲମାଣ୍ଡା କେଉଁଠୁ ଆସିଲା ବୋଲି ସେ ପ୍ରଶ୍ନ କରିଛନ୍ତି।’

Powered by Froala Editor