ଲଣ୍ଡନ: ବ୍ରିଟେନ ଗସ୍ତରେ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂ । ଏହି ଗସ୍ତ ସମୟରେ ବ୍ରିଟେନର ପ୍ରଧାନମନ୍ତ୍ରୀ ଋଷି ସୁନକଙ୍କୁ ଭେଟିଛନ୍ତି ରାଜନାଥ । ଦେଶର ପ୍ରତିରକ୍ଷା ମନ୍ତ୍ରୀ ଭାବେ ଏହା ରାଜନାଥଙ୍କ ପ୍ରଥମ ବ୍ରିଟେନ ଗସ୍ତ । ଗତ ୨୦ ବର୍ଷ ମଧ୍ୟରେ ଭାରତର କୌଣସି ବି ପ୍ରତିରକ୍ଷା ମନ୍ତ୍ରୀ ବ୍ରିଟେନ ଗସ୍ତ କରିନାହାନ୍ତି । ପ୍ରଧାନମନ୍ତ୍ରୀଙ୍କୁ ଭେଟିବା ପୂର୍ବରୁ ଲଣ୍ଡନର ଟ୍ରିନିଟି ହାଉସରେ ରାଜନାଥ ସିଂ ଏବଂ ତାଙ୍କ ବ୍ରିଟିଶ ପ୍ରତିପକ୍ଷ ଗ୍ରାଣ୍ଟ ଶାପ୍ସ ଭାରତ-ବ୍ରିଟେନ ପ୍ରତିରକ୍ଷା ଶିଳ୍ପ ସିଇଓଙ୍କ ସହ ଏକ ବୈଠକରେ ସାମିଲ ହୋଇଥିଲେ ।
ଟ୍ବିଟ୍ କରି ରାଜନାଥ ସିଂ କହିଛନ୍ତି ଯେ, ଲଣ୍ଡନରେ ବ୍ରିଟେନ ପ୍ରଧାନମନ୍ତ୍ରୀ ଋଷି ସୁନକଙ୍କ ସହ ମୋର ସାକ୍ଷାତ ହୋଇଥିଲା । ତାଙ୍କ ସହ ବିଭିନ୍ନ ପ୍ରସଙ୍ଗରେ ଆଲୋଚନା କରିବାର ମୁଁ ସୁଯୋଗ ପାଇଲି । ପ୍ରତିରକ୍ଷା, ଅର୍ଥନୈତିକ ସହଯୋଗ ସହ ଜଡିତ ପ୍ରସଙ୍ଗ ଉପରେ ଆଲୋଚନା ହୋଇଥିଲା । କିପରି ଦୁଇ ଦେଶ ଦୃଢତାର ସହ କାର୍ୟ୍ୟ କରିବେ ସେ ବିଷୟରେ ଆଲୋଚନା କରିଥିଲୁ ।
ଆଉ ଏକ ଟ୍ବିଟରେ ପ୍ରତିରକ୍ଷା ମନ୍ତ୍ରୀ କହିଛନ୍ତି ଯେ, ଲଣ୍ଡନରେ ବ୍ରିଟେନ-ଇଣ୍ଡିଆ ଡିଫେନ୍ସ ସିଇଓ ବୈଠକରେ ସିଇଓମାନଙ୍କ ସହିତ ଏକ ଚମତ୍କାରପୂର୍ଣ୍ଣ ସାକ୍ଷାତ ହୋଇଛି । ଭାରତ କୋ-କ୍ରିଏଟ ଏବଂ କୋ-ଇନୋଭେଟ ପାଇଁ ବ୍ରିଟେନ ସହିତ ଏକ ଦୃଢ ସହଭାଗିତା ଲାଗି ଯୋଜନା କରିଛି । ଉଭୟ ଦେଶର ଶକ୍ତି ମିଶିଲେ ଆମେ ଏକ ବଡ ଓ ଭଲ କାର୍ୟ୍ୟ କରିପାରିବା ।
ଲିଟୋରାଲ୍ ରେସପନ୍ସ ଗ୍ରୁପକୁ ଚଳିତ ବର୍ଷ ଶେଷରେ ଭାରତ ମହାସାଗରକୁ ପଠାଇବାକୁ ବ୍ରିଟେନ ଯୋଜନା କରିଥିବା ଘୋଷଣା କରିଛି । ଯେଉଁଥିରେ ୨୦୨୫ ମସିହାରେ କ୍ୟାରିଅର୍ ଷ୍ଟ୍ରାଇକ୍ ଗ୍ରୁପ୍ ଭାରତୀୟ ଜଳ ପରିଦର୍ଶନ କରିବାକୁ ପ୍ରସ୍ତାବ ଦିଆଯାଇଛି । ଭାରତୀୟ ନୌସେନା ବାହିନୀ ସହ ଉଭୟ କାର୍ୟ୍ୟ କରିବେ ଏବଂ ତାଲିମ ଦେବେ । ବ୍ରିଟେନର ପ୍ରତିରକ୍ଷା ସଚିବ ଏହି ଘୋଷଣା କରିଛନ୍ତି ।

Powered by Froala Editor