ପାଟନା: ଗତ ୧୯ ତାରିଖରେ ନୂଆଦିଲ୍ଲୀରେ 'ଇଣ୍ଡିଆ' ମେଣ୍ଟ ବୈଠକ ପରେ ଆୟୋଜିତ ହୋଇଥିଲା ପ୍ରେସ୍ କନଫରେନସ । ଯେଉଁଥିରେ ଅନୁପସ୍ଥିତି ଥିଲେ ଜେଡିୟୁ ନେତା ତଥା ବିହାର ମୁଖ୍ୟମନ୍ତ୍ରୀ ନୀତିଶ କୁମାର । ପ୍ରେସ୍ ମିଟରେ ନୀତିଶଙ୍କ ଅନୁପସ୍ଥିତି ନେଇ ଗଣ ମାଧ୍ୟମରେ ଭିନ୍ନ ଭିନ୍ନ ଚର୍ଚ୍ଚା ହେଉଛି । ନୀତିଶ କୁମାର ଅସନ୍ତୁଷ୍ଟ ଥିବା ନେଇ ଚର୍ଚ୍ଚା ଜୋର ଧରିବା ପରେ ଶେଷରେ ମୁହଁ ଖୋଲିଛନ୍ତି ବିହାର ମୁଖ୍ୟମନ୍ତ୍ରୀ । ନୀତିଶ କହିଛନ୍ତି ଯେ, ତାଙ୍କର କୌଣସି ପଦ ପଦବୀ ପ୍ରତି ଲାଳସା ନାହିଁ। ସେ କେବଳ ଚାହୁଁଛନ୍ତି ଇଣ୍ଡିଆ ମେଣ୍ଟ ଏକଜୁଟ୍ ରହୁ ।
କେତେକ ଗଣମାଧ୍ୟମରେ ରିପୋର୍ଟ ପ୍ରକାଶ ପାଇଥିଲା ଯେ, ନୀତିଶ କୁମାର ନାରାଜ ଅଛନ୍ତି । ଗଣମାଧ୍ୟମରେ ଏଭଳି ଚର୍ଚ୍ଚାକୁ ନେଇ ମୁହଁ ଖୋଲିଛନ୍ତି ନୀତିଶ କୁମାର । ସେ କହିଛନ୍ତି, ମୁଁ କଦାପି ରାଗି ନାହିଁ । ବିରୋଧୀଙ୍କ 'ଇଣ୍ଡିଆ' ମେଣ୍ଟରେ ଜେଡିୟୁ ଅଂଶ ବିଶେଷ ହୋଇ ରହିଛି । ସାଧାରଣ ନିର୍ବାଚନ ଅଳ୍ପ ଦିନ ଥିବାରୁ ସିଟ୍ ସେୟାରିଂ ବା ଭାଗୁଆଳି ଦଳଗୁଡ଼ିକ ମଧ୍ୟରେ ଆସନ ଭାଗବଣ୍ଟା ଶୀଘ୍ର ହୋଇଯିବା ଆବଶ୍ୟକ ।
ଆଜି ପାଟନାରେ ଗଣମାଧ୍ୟମକୁ ପ୍ରତିକ୍ରିୟା ଦେଇ ନୀତିଶ କୁମାର କହିଛନ୍ତି, "ମୋର ଅସନ୍ତୋଷକୁ ନେଇ ଅନେକ ଖବର ପ୍ରସାରିତ ହେଉଛି। ଏହା ଭୁଲ ଖବର। ମୁଁ କାହିଁକି କ୍ରୋଧିତ ହେବି ? ମୋର ପ୍ରୟାସ ବିରୋଧୀ ଦଳଗୁଡ଼ିକୁ ଏକାଠି କରିବା ନେଇ ରହି ଆସିଛି । ଏହାଦ୍ବାରା ୨୦୨୪ରେ ବିଜେପିକୁ ପରାସ୍ତ କରିହେବ।" ସେ ଆହୁରି ମଧ୍ୟ କହିଛନ୍ତି ଯେ ନିର୍ବାଚନରେ ପ୍ରତିଦ୍ୱନ୍ଦ୍ୱିତା କରିବା ଏବଂ ବିଜେପିକୁ ପରାସ୍ତ କରିବା ପାଇଁ ସମସ୍ତ ସମଭାବାପନ୍ନ ଦଳ ଏକାଠି ହେବା ଜରୁରୀ । ଏହା ବ୍ୟତୀତ ତାଙ୍କର ଅନ୍ୟ କୌଣସି ଉଦ୍ଦେଶ୍ୟ ନାହିଁ। "
ଡିସେମ୍ବର ୧୯ ରେ ନୂଆଦିଲ୍ଲୀରେ ବସିଥିଲା ଇଣ୍ଡିଆ ମେଣ୍ଟର ଚତୁର୍ଥ ବୈଠକ । ଏଥିରେ ସାମିଲ ହୋଇଥିଲେ ଜେଡିୟୁ ସୁପ୍ରିମୋ ନୀତିଶ କୁମାର । ବୈଠକରେ ବିଭିନ୍ନ ଗୁରୁତ୍ବପୂର୍ଣ୍ଣ ପ୍ରସଙ୍ଗରେ ଆଲୋଚନା ହୋଇଥିଲା । ବୈଠକରେ ତୃଣମୂଳ କଂଗ୍ରେସ ନେତ୍ରୀ ତଥା ପଶ୍ଚିମବଙ୍ଗ ମୁଖ୍ୟମନ୍ତ୍ରୀ ମମତା ବାନାର୍ଜୀ ଏବଂ ଆପ୍ ନେତା ତଥା ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ, କଂଗ୍ରେସ ଅଧ୍ୟକ୍ଷ ମଲିକାର୍ଜୁନ ଖଡଗେଙ୍କୁ ପ୍ରଧାନମନ୍ତ୍ରୀ ଚେହେରା କରିବା ପାଇଁ ପ୍ରସ୍ତାବ ଦେଇଥିଲେ । ଠିକ୍ ଏହା ପରେ ମେଣ୍ଟ ପକ୍ଷରୁ ଆୟୋଜିତ ହୋଇଥିଲା ପ୍ରେସ କନଫରେନ୍ସ । ମାତ୍ର ପିସିକୁ ଯାଇନଥିଲେ ନୀତିଶ କୁମାର । ଯାହାକୁ ନେଇ ଗଣମାଧ୍ୟମରେ ବିଭିନ୍ନ ପ୍ରକାର ଆଲୋଚନା ହୋଇଥିଲା ।

Powered by Froala Editor