ବହୁ ବର୍ଷ ପରେ 'ଗଦର-୨'ରେ ସନ୍ନି ଦେଓଲଙ୍କୁ ବଡ଼ ପରଦାରେ ଦେଖିବାକୁ ମିଳିଥିଲା । ଅନିଲ ଶର୍ମାଙ୍କ ଦ୍ୱାରା ପ୍ରଯୋଜିତ ଏବଂ ନର୍ଦ୍ଦେଶିତ 'ଗଦର-୨'କୁ ଲୋକମାନେ ବେଶ ପସନ୍ଦ କରିଥିଲେ । ଗଦର ୨ ସଫଳତା ପରେ ଏବେ ସମସ୍ତଙ୍କ ନଜର ସନ୍ନି ଦେଓଲଙ୍କ ଉପରେ ରହିଛି । ନିକଟରେ ସୋସିଆଲ ମିଡିଆରେ ସନ୍ନିଙ୍କ ଭିଡିଓ ଭାଇରାଲ ହୋଇଛି ।

ଏହି ଭିଡିଓରେ ନିଶାଗ୍ରସ୍ତ ଅବସ୍ଥାରେ ସନ୍ନି ରାସ୍ତା ଉପରେ ଚାଲୁଥିବା ଦେଖିବାକୁ ମିଳିଛି । ସେ ଚାଲି ପାରୁ ନଥିଲେ । ତାଙ୍କ ସନ୍ତୁଳନ ବିଗିଡ଼ିଯାଇଥିଲା । ତାଙ୍କୁ ଟଳମଳ ଅବସ୍ଥାରେ ଦେଖି ଲୋକମାନେ ଆଶ୍ଚର୍ଯ୍ୟ ହୋଇଥିଲେ । ତେବେ ତାଙ୍କୁ ଜଣେ ଅଟୋ ଚାଳକ ସମ୍ଭାଳିବା ସହ ନିଜ ଅଟୋରେ ବସାଇଥିଲେ । ବର୍ତ୍ତମାନ ଏହି ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି ।

କାଶିନାଥ ୨.୦ ନାମକ ଜଣେ 'ଏକ୍ସ' ବ୍ୟବହାରକାରୀ ଏହି ଭିଡ଼ିଓ ପୋଷ୍ଟ କରିଛନ୍ତି । ଏ ନେଇ ୟୁଜର୍ସମାନେ ପ୍ରତିକ୍ରିୟାଶୀଳ ହୋଇ ପଡିଛନ୍ତି । ଏହି ଭିଡିଓର ସତ୍ୟତା ନେଇ ପ୍ରଶଂସକ ଦ୍ୱନ୍ଦ୍ୱରେ ଥିବା ବେଳେ ଏ ନେଇ ମୁହଁ ଖୋଲିଛନ୍ତି ସନ୍ନି ।
ବାସ୍ତବରେ ସନ୍ନି ଦେଓଲ ନିଶାଶକ୍ତ ଅବସ୍ଥାରେ ନାହାନ୍ତି ବରଂ ତାଙ୍କ ଆଗାମୀ ଚଳଚ୍ଚିତ୍ରର ଏହା ଏକ ଦୃଶ୍ୟ ଅଟେ । ସନ୍ନିଙ୍କ ଆଗମୀ ଚଳଚ୍ଚିତ୍ର 'ସଫର'ର ସୁଟିଂ ମୁମ୍ବାଇରେ ହେଉଛି ।

ସେ ହସିକରି କହିଛନ୍ତି ଯେ, ଏହା ଏକ ସୁଟିଂ ଭିଡିଓ ରେକର୍ଡିଂ । ଯାହା ଦେଖୁଛନ୍ତି ତାହା ସତ୍ୟ ନୁହେଁ । ଏହା ପରେ ସେ କହିଛନ୍ତି ଯଦି ମୁଁ ଡ୍ରିଙ୍କସ କରିବାକୁ ଚାହିଁଥାନ୍ତି ତେବେ ରୋଡ ଉପରେ ଏ ଭଳି ଅବସ୍ଥାରେ ବୁଲିଥାନ୍ତି କି ? ଏହା କଣ ସମ୍ଭବ ? ମୁଁ କେବେ ହେଲେ ଆଲକହଲକୁ ଛୁଇଁ ନାହିଁ ।

Powered by Froala Editor