ତାମିଲନାଡୁର ଚେନ୍ନାଇସ୍ଥିତ ରାଜଭବନ ବାହାରେ ପେଟ୍ରୋଲ ବୋମା ମାଡ଼ ହୋଇଛି। ରାଜ୍ୟପାଳ ଆରଏନ ରବି ଏଠାରେ ରହୁଥିବା ବେଳେ ତାଙ୍କ ସରକାରୀ ବାସଭବନ ଉପରକୁ ଏପରି ପେଟ୍ରୋଲ ବୋମା ମାଡ଼ ହୋଇଛି। ଜଣେ ବ୍ୟକ୍ତି ବୋମା ମାଡ଼ କରିଥିବା ବେଳେ ତାଙ୍କୁ ପୁଲିସ ଗିରଫ କରିଛି। ଗିରଫ ବ୍ୟକ୍ତିଙ୍କ ନାମ କାରୁକ୍କା ବିନୋଦ। ଏନେଇ ଗୁଇଣ୍ଡି ଥାନାରେ ଅଭିଯୋଗ ହୋଇଛି। ତେବେ ଆକ୍ରମଣରେ ରାଜଭବନର କୌଣସି କ୍ଷୟକ୍ଷତି ହୋଇନାହିଁ।

ଅପରାହ୍ନ ୩ଟା ସମୟରେ ଏପରି ଘଟଣା ଘଟିଛି। କାରୁକ୍କା ରାଜଭବନର ମୁଖ୍ୟ ଗେଟ୍‌ ଉପରକୁ ଦୁଇଟି ବୋମା ମାଡ଼ କରିଛନ୍ତି। ପୁଲିସ୍‌ କହିଛି ଯେ କାରୁକ୍କା ପ୍ରଥମେ ସୈଦାପେଟ କୋର୍ଟ ମଧ୍ୟରେ ରହିଥିବା କିଛି ବାଇକ୍‌ରୁ ପେଟ୍ରୋଲ ଚୋରି କରିଥିଲେ। ଏହାପରେ ସେ କିଛି ବୋତଲରେ ପେଟ୍ରୋଲ ଧରି ରାଜଭବନ ଆଡ଼କୁ ଚାଲି ଚାଲି ଯାଇଥିଲେ। ମୁଖ୍ୟ ଗେଟ୍‌ ପାଖରେ ଛିଡ଼ା ହୋଇ ସେ ଦୁଇଟି ବୋତଲରେ ନିଆଁ ଲଗାଇବା ସହ ରାଜଭବନକୁ ଟାର୍ଗେଟ କରି ଏହାକୁ ମାଡ଼ କରିଥିଲେ।

ସୂଚନା ଅନୁଯାୟୀ, କିଛି ମାସ ତଳେ ତାମିଲନାଡୁ ବିଧାନସଭାରେ ପାରିତ ହୋଇଥିବା ନିଟ୍ ବିରୋଧୀ ବିଲରେ ଦସ୍ତଖତ କରିନଥିବାରୁ କାରୁକ୍କା ତାମିଲନାଡୁ ରାଜ୍ୟପାଳ ଆର୍. ଏନ୍. ରବିଙ୍କ ବିରୋଧରେ ସ୍ଲୋଗାନ୍ ଦେଇଥିଲା। ରାଜଭବନର ମୁଖ୍ୟ ଫାଟକ ସମ୍ମୁଖରେ ପହଞ୍ଚିବା ପରେ ସେ ପେଟ୍ରୋଲ ବୋମା ବାହାର କରି ସେଥିରେ ନିଆଁ ଲଗାଇ ପ୍ରବେଶ ଦ୍ୱାର ଉପରକୁ ଫିଙ୍ଗି ଦେଇଥିଲା। ଏହାପରେ ସେ ସେଠାରୁ ଖସି ପଳାଇବାକୁ ଚେଷ୍ଟା କରିଥିଲେ ମଧ୍ୟ କିଛି ସମୟ ପିଛା କରିବା ପରେ ପୁଲିସ ତାକୁ ଧରିଥିଲା।

Powered by Froala Editor