ଦିଲ୍ଲୀରେ ଲକ୍‌ଡାଉନ କଟକଣା କୋହଳ ହେବା ପରେ ଡୋର ଷ୍ଟେପ ରାସନ ସାମଗ୍ରୀ ବଣ୍ଟନ କରାଯିବ ବୋଲି ନିଷ୍ପତ୍ତି ନିଆଯାଇଥିଲା । ହେଲେ କେନ୍ଦ୍ର ଦିଲ୍ଲୀ ସରକାରଙ୍କ ଏ ନିଷ୍ପତ୍ତିରେ ରୋକ ଲଗାଇଛନ୍ତି ।  ଦିଲ୍ଲୀ ସରକାର ଡୋର ଷ୍ଟେପ ଯୋଜନାକୁ କାର୍ଯ୍ୟକାରୀ କରିବାକୁ ଯାଉଥିଲେ ହେଁ ଏଥିପାଇଁ କେନ୍ଦ୍ରର ଅନୁମତି ଆଣି ନଥିଲେ। ସେହିପରି ଏହି ଘଟଣାକୁ ନେଇ କୋର୍ଟରେ ଶୁଣାଣି ଚାଲିଥିବାରୁ ଉପ ରାଜ୍ୟପାଳ ମଧ୍ୟ ଏ ସଂକ୍ରାନ୍ତ ଫାଇଲକୁ ଅଗ୍ରାହ୍ୟ କରିଥିଲେ। ଏହାକୁ ଦୃଷ୍ଟିରେ ରଖି କେନ୍ଦ୍ର ସରକାର ଯୋଜନାର କାର୍ଯ୍ୟକାରିତା ଉପରେ ରୋକ ଲଗାଇଥିବା ଜଣାପଡ଼ିଛି।

ଦିଲ୍ଲୀ ଖାଦ୍ୟ ଯୋଗାଣ ମନ୍ତ୍ରୀ ଇମରାନ ହୁସେନ କହିଛନ୍ତି, ନିୟମ ଅନୁଯାୟୀ ଏପରି ଏକ ଯୋଜନାକୁ କାର୍ଯ୍ୟକାରୀ କରିବାକୁ କାହାର ଅନୁମତି ଜରୁରୀ ନୁହେଁ। କୋର୍ଟ ମଧ୍ୟ ଯୋଜନାକୁ କାର୍ଯ୍ୟକାରୀ ନ କରିବା ପାଇଁ କୌଣସି ନିର୍ଦ୍ଦେଶ ଦେଇନାହାନ୍ତି। ତେଣୁ ରାଜନୀତିକ ଉଦ୍ଦେଶ୍ୟ ରଖି ଦିଲ୍ଲୀ ସରକାରଙ୍କ ମହତ୍ତ୍ୱକାଂକ୍ଷୀ ଯୋଜନା ଉପରେ ରୋକ ଲଗାଯାଇଛି ବୋଲି ସେ କହିଛନ୍ତି।

ସୂଚନା ଅନୁଯାୟୀ, ଡୋର ଷ୍ଟେପ ରାସନ ଯୋଗାଣ ଯୋଜନା ଦିଲ୍ଲୀ ସରକାର ମାତ୍ର କିଛି ଦିନ ମଧ୍ୟରେ ଲଞ୍ଚ କରିବାର ଥିଲା। ଏଥିପାଇଁ ସମସ୍ତ ପ୍ରକାରର ପ୍ରସ୍ତୁତି ମଧ୍ୟ ଶେଷ ହୋଇଥିଲା। ଏହି ଯୋଜନାରେ ପ୍ରାୟ ୭୨ ଲକ୍ଷ ହିତାଧିକାରୀଙ୍କୁ ସେମାନଙ୍କ ଘର ପାଖରେ ରାସନ ଯୋଗାଣ କରାଯାଇଥାଆନ୍ତା। ବିଶେଷ କରି କରୋନା ସଂକ୍ରମଣ ସମୟରେ ଏପରି ଯୋଜନା ବେଶ ଫଳପ୍ରଦ ହେବ ବୋଲି ଦିଲ୍ଲୀ ସରକାର ଆଶା କରିଥିଲେ। କିନ୍ତୁ କେନ୍ଦ୍ର ସରକାର ଏହି ଯୋଜନା ଉପରେ ରୋକ ଲଗାଇ ଦେଇଛନ୍ତି।

Powered by Froala Editor