ଆଇସିସି ବିଶ୍ବକପର ମ୍ୟାଚରେ ପାକିସ୍ତାନକୁ ୭ ଓ୍ବିକେଟରେ ଟିମ ଇଣ୍ଡିଆ ପରାସ୍ତ କରିଥିଲା। ଦିନିକିଆ ବିଶ୍ବକପରେ ଭାରତ ଓ ପାକିସ୍ତାନ ମଧ୍ୟରେ ୮ ଥର ମୁକାବିଲା ହୋଇଥିବାବେଳେ ଭାରତ ୮ଟି ଯାକ ମ୍ୟାଚରେ ବିଜୟ ହାସଲ କରିଥିଲା । ଏହାପରେ ଭାରତୀୟ ଖେଳପ୍ରେମୀ ଖୁସିରେ ବାଣ ଫୁଟାଇ କେକ ବି କାଟିଥିଲେ। ଭାରତର ଏହି ବିଜୟ ପରେ କ୍ରିକେଟର ସଚିନ ତେନ୍ଦୁଲକର ପାକିସ୍ତାନର ପୂର୍ବତନ ବୋଲର ସୋଏବ ଅଖତରଙ୍କୁ କଡ଼ା ଜବାବ ଦେଇଛନ୍ତି।

ଭାରତ ବିଜୟରେ ଆତ୍ମ ବିଭୋର ସଚିନ୍ ରାଓଲପିଣ୍ଡି ଏକ୍ସପ୍ରେସ ସୋଏବ ଅଖତାରଙ୍କୁ ମୁହଁତୋଡ ଜବାବ ଦେବା ସହ ଖୁସି ମନାଇଛନ୍ତି । କେବଳ ସେତିକି ନୁହେଁ ଭାରତର ବିସ୍ଫୋରକ ବ୍ୟାଟ୍ସମ୍ୟାନ ତଥା ପୂର୍ବତନ କ୍ରିକେଟର ବିରେନ୍ଦ୍ର ସେହଓ୍ବାଗ ସୋଏବଙ୍କୁ ଅତିଥ୍ୟର ପାଠ ପଢ଼ାଇଛନ୍ତି ।

ସୂଚନାଯୋଗ୍ୟ, ମ୍ୟାଚର ଗୋଟିଏ ଦିନ ପୂର୍ବରୁ ସୋଏବ ଭାରତ-ପାକିସ୍ତାନ ମଧ୍ୟରେ ୧୯୯୯ରେ ଖେଳା ଯାଇଥିବା ଏକ ମ୍ୟାଚର ଫଟୋ ସୋସିଆଲ ମିଡିଆ ଏକ୍ସରେ ପୋଷ୍ଟ କରିଥିଲେ । ଫଟୋଟି ସୋଏବ ସଚିନଙ୍କୁ ଶୂନ୍ୟରେ ଆଉଟ କରିବା ପରେ ସେଲିବ୍ରେସନ ବେଳର ଥିଲା । ସୋଏବ କ୍ୟାପସନରେ ଲେଖିଥିଲେ, ‘କାଲି ଏମିତି କିଛି କରିବାର ଅଛି ତ ଶାନ୍ତ ରୁହ (ଥଣ୍ଡ ରଖ୍) ।’

ଭାରତୀୟ ଟିମର ବିଜୟ ପରେ ସଚିନ ସୋଏବଙ୍କୁ ଏହାର ଜବାବ ଦେଇଛନ୍ତି । ସେ ଲେଖିଛନ୍ତି, ‘ସାଙ୍ଗ, ତୁମ ପରାମର୍ଶ ପାଳନ କଲି, ସବୁକିଛି ଶାନ୍ତ ରଖିଲି ।‘ ସୋଏବ ସଚିନଙ୍କ ଟ୍ବିଟର ପ୍ରତି ଉତ୍ତର ଦେଇ ଲେଖିଥିଲେ, ‘ ସାଙ୍ଗ, ଆପଣ ଏହି ଖେଳର ଶୋଭା ବଢ଼ାଉଥିବା ସର୍ବକାଳୀନ ଖେଳାଳି ଓ ଏହାର ସବୁଠାରୁ ବଡ଼ ବ୍ରାଣ୍ଡ ଆମ୍ବାସଡର । ଆମ ବନ୍ଧୁତ୍ବପୂର୍ଣ୍ଣ ମଜା କେବେ ବି ବଦଳିବନି ।’

Powered by Froala Editor