ଝାରସୁଗୁଡା : ବହୁ ଚର୍ଚ୍ଚିତ ନବଦାସ ହାତ୍ୟା ମାମଲାକୁ ନେଇ ଚର୍ଚ୍ଚା ଥମୁନାହିଁ । ନବଦାସଙ୍କୁ ଗୁଳିମାଡ ପରେ ଝାରସୁଗୁଡାରେ ଚିକିତ୍ସା କରାଯାଇଥିଲା ନା ନାହିଁ ତାକୁ ନେଇ ପ୍ରଶ୍ନ ସୃଷ୍ଟି ହୋଇଛି । କାରଣ କ୍ରାଇମବ୍ରାଞ୍ଚକୁ ଦିଆଯାଇଥିବା ନବଦାସଙ୍କ ଚିକିତ୍ସା ସମ୍ପର୍କିତ ଓପିଡି ଟିକେଟ ଭିନ୍ନ କଥା କହୁଛି । ଗତ ଜାନୁୟାରୀ ୨୯ରେ ମନ୍ତ୍ରୀ ନବ ଦାସଙ୍କୁ ଗୁଳିମାଡ ପରେ ଝାରସୁଗୁଡା ଡାକ୍ତରଖାନରେ ଘଣ୍ଟାଏ ଚିକିତ୍ସା କରାଯାଇ ଏୟାର ଲିଫ୍ଟ କରି ଭୁବନେଶ୍ୱର ଅଣାଯାଇଥିବା କୁହାଯାଇଥିଲା ।

କିନ୍ତୁ ଓପିଡି ଟିକେଟରେ ନବ ଦାସ ଗୁଳି ମାଡରେ ଆହତ, କେବଳ ଉଚ୍ଚତର ଚିକିତ୍ସାଳୟକୁ ସ୍ଥାନାନ୍ତର ପରାମର୍ଶ ଉଲ୍ଲେଖ ରହିଛି । ଏହା ତଳକୁ ରହିଛି ଡାକ୍ତରଙ୍କ ଦସ୍ତଖତ । ଘଟଣା ସମୟରେ ନବ ଦାସଙ୍କ ରକ୍ତଚାପ କେତେ ରହିଥିଲା, ହୃଦସ୍ପନ୍ଦନ କେତେ ରହିଥିଲା । ଡାକ୍ତର ଆଉ କ’ଣ ଦେଖିଲେ, କ’ଣ ଚିକିତ୍ସା କଲେ ସେ ବାବଦରେ କିଛି ଉଲ୍ଲେଖ ନାହିଁ । ମେଡିକାଲ ଏଥିକ୍ସ ଅନୁସାରେ ରୋଗୀଙ୍କୁ ଦେଖୁଥିବା ଡାକ୍ତର ଟିକେଟରେ ସମସ୍ତ ନୀରିକ୍ଷଣ, ଚିକିତ୍ସା ଓ ପରାମର୍ଶ ଲେଖିଥାନ୍ତି । ଫଳରେ ରୋଗୀଙ୍କ ଅନ୍ୟ ମେଡିକାଲକୁ ସ୍ଥାନାନ୍ତର କରାଗଲେ ସେହି ଟିକେଟ ଆଧାରରେ ଚିକିତ୍ସା କରାଯାଇଥାଏ ।
ହେଲେ ନବଦାସଙ୍କ ଓପିଡି ଟିକେଟରେ କେବଳ ସ୍ଥାନାନ୍ତର ପରାମର୍ଶ ଛଡା କିଛି ନାହିଁ । ମନ୍ତ୍ରୀଙ୍କୁ ଗୁଳିମାଡର ୧୮ ଦିନ ପରେ କ୍ରାଇମବ୍ରାଞ୍ଚ ଚିଠି ଲେଖି ସିଡିଏମଓଙ୍କୁ ରିପୋର୍ଟ ମାଗିଥିଲେ । ଆଉ ସିଡିଏମଓ ଦେଇଥିବା ରିପୋର୍ଟରେ ଥିବା ଓପିଡି ଟିକେଟ ପ୍ରଶ୍ନ ସୃଷ୍ଟି କରିଛି । ପ୍ରକୃତରେ ଜାନୁୟାରୀ ୨୯ରେ ନବ ଦାସଙ୍କୁ ଝାରସୁଗୁଡାରେ ଚିକିତ୍ସା କରାଯାଇଥିଲା ନା ନାହିଁ ତାହାକୁ ନେଇ ଚର୍ଚ୍ଚା ବଢିଛି ।

Powered by Froala Editor