ବିହାରର ଗୋପାଳଗଞ୍ଜରେ ଅଧିକ ମୋମୋ ଖାଇ ଯୁବକଙ୍କ ମୃତ୍ୟୁ ଘଟିଛି । ମୃତ ଯୁବକ ଜଣକ ଥାଭେ ପୁଲିସ ଷ୍ଟେସନର ସିହୋରା ଗ୍ରାମ ନିବାସୀ ବିପିନ କୁମାର ପାସୱାନ୍ (୨୫ ବର୍ଷ) । ଜୁଲାଇ ୧୩ରେ ସିୱାନର ବଡ଼ହରିଆ ପୁଲିସ ଷ୍ଟେସନ ଅଞ୍ଚଳର ଜ୍ଞାନୀମୋଡରେ ଏହି ଘଟଣା ଘଟିଛି। 

ବିପିନ ଏକ ମୋବାଇଲ୍ ଦୋକାନ କରିଥିଲେ। ପ୍ରତିଦିନ ଭଳି ସେ ଗୁରୁବାର ଦିନ ତାଙ୍କ ଦୋକାନକୁ ଯାଇଥିଲେ । ମୃତକଙ୍କ ପିତା କହିଛନ୍ତି ଯେ ଗୁରୁବାର ରାତିରେ ଦୁଇଜଣ ଯୁବକ ତାଙ୍କ ଦୋକାନକୁ ଆସି ବିପିନକୁ ସାଙ୍ଗରେ ନେଇଥିଲେ। ସେମାନେ ବିପିନଙ୍କୁ ବିଷାକ୍ତ ଖାଦ୍ୟ ଦେଇ ହତ୍ୟା କରିଛନ୍ତି। ଅନ୍ୟପଟେ ପୁଲିସ କହିଛି ଯେ ଅଧିକ ମୋମୋ ଖାଇ ଯୁବକଙ୍କ ମୃତ୍ୟୁ ହୋଇଛି ।

ଅଳ୍ପ ସମୟ ମଧ୍ୟରେ ମୋମୋ ଖାଇବା ନେଇ ତିନିଜଣ ସାଙ୍ଗଙ୍କ ମଧ୍ୟରେ ପ୍ରତିଯୋଗିତା ଲାଗିଥିଲା । ଆଉ ବିପିନ ମୋମୋ ଖାଇବା ବେଳେ ଏହାକୁ ନ ଚୋବାଇ ଗିଳିପକାଇଥିଲେ । ଯାହାଦ୍ୱାରା ତାଙ୍କର ମୃତ୍ୟୁ ହୋଇଯାଇଥିଲା । ଶବ ବ୍ୟବଛେଦ ରିପୋର୍ଟରେ ମଧ୍ୟ ଏବାବଦରେ ଖୁଲାସା ହୋଇଛି । ଅତ୍ୟଧିକ ମୋମୋ ଖାଇବା ଦ୍ୱାରା ଶ୍ବାସରୁଦ୍ଧ ହେବାରୁ ତାଙ୍କ ଜୀବନ ଚାଲିଯାଇଥିଲା  ।

ଶୁକ୍ରବାର ସକାଳେ ବିପିନଙ୍କ ମୃତଦେହ ରାସ୍ତା କଡ଼ରେ ପଡ଼ିଥିବାର ସ୍ଥାନୀୟ ଲୋକ ଦେଖିଥିଲେ । ଏହା ପରେ ସମ୍ପର୍କୀୟମାନେ ମଧ୍ୟ ଘଟଣାସ୍ଥଳରେ ପହଞ୍ଚିଥିଲେ। ସମ୍ପର୍କୀୟମାନେ ପୁଲିସକୁ ସୂଚନା ଦେଇଥିଲେ ।

Powered by Froala Editor