କୋଲ୍‌କାତା:  ପଶ୍ଚିମବଙ୍ଗର ମାଲ୍‌ଦା ଜିଲ୍ଲାରେ କେତେକ ଅଜ୍ଞାତ ଦୁର୍ବୃତ୍ତ ଆଗାମୀ ପଞ୍ଚାୟତ ନିର୍ବାଚନ ପାଇଁ ପ୍ରତିଦ୍ବନ୍ଦ୍ବିତା କରୁଥିବା ‘ତୃଣମୂଳ କଂଗ୍ରେସ’ର ଜଣେ ପ୍ରାର୍ଥୀଙ୍କୁ ଠେଙ୍ଗାରେ ପିଟି ପିଟି ହତ୍ୟା କରିଥିବା କଥା ପୁଲିସ କହିଛି।ମୃତ ପ୍ରାର୍ଥୀ ମୁସ୍ତାଫା ଶେଖ୍‌ଙ୍କ ପରିବାର ଲୋକେ କହୁଛନ୍ତି ଯେ, ସ୍ଥାନୀୟ କଂଗ୍ରେସ କର୍ମୀମାନେ ତାଙ୍କୁ ହତ୍ୟା କରିଛନ୍ତି।
ମାଲ୍‌ଦା ପୁଲିସ କହିଛି, ଘଟଣାଟି ମାଲ୍‌ଦା ଜିଲ୍ଲା ଅନ୍ତର୍ଗତ କାଳିଆଛକରେ ଘଟିଛି। ପ୍ରାଥମିକ ତଦନ୍ତ ପରେ ଅବ୍‌ଦୁଲ୍‌ ମନ୍ନନ୍‌ ନାମରେ ଜଣେ ୪୮ ବର୍ଷିୟ ଅଭିଯୁକ୍ତଙ୍କୁ ଅଟକ ରଖାଯାଇଛି। ମୁସ୍ତାଫାଙ୍କ ଶବ ବ୍ୟବଚ୍ଛେଦ ପାଇଁ ପଠାଯାଇ ଏହି ହତ୍ୟା ଘଟଣାର ଅଧିକ ତଦନ୍ତ ଚାଲିଛି।
ପ୍ରାପ୍ତ ସୂଚନା ଅନୁସାରେ, ମୁସ୍ତାଫା ଶେଖ୍‌ ଘରକୁ ଫେରୁଥିବା ବେଳେ ଦୁର୍ବୃତ୍ତମାନେ ତାଙ୍କୁ ଆକ୍ରମଣ କରିଥିଲେ। ସ୍ଥାନୀୟ ଡାକ୍ତରଖାନାକୁ ନେବାରୁ, ତାଙ୍କୁ ମୃତାବସ୍ଥାରେ ଅଣାଯାଇଥିବା କଥା ସେଠାକାର ଡାକ୍ତରମାନେ କହିଥିଲେ।
ସେ ଅଞ୍ଚଳ ଗସ୍ତରେ ଯାଇଥିବା ‘ତୃଣମୂଳ କଂଗ୍ରେସ’ ବିଧାୟିକା ଶାବିନା ଯାସ୍‌ମିନ୍‌ କହିଛନ୍ତି ଯେ, ଶେଖ୍‌ଙ୍କ ପତ୍ନୀ ହେଉଛନ୍ତି ସୁଜାପୁର ପଞ୍ଚାୟତ ପ୍ରଧାନ। ମୁସ୍ତାଫାଙ୍କୁ ଆକ୍ରମଣ କରିଥିବା ବ୍ୟକ୍ତିମାନେ ହେଉଛନ୍ତି ପଞ୍ଚାୟତ ନିର୍ବାଚନ ପାଇଁ ଟିକେଟ ନ ପାଇ କଂଗ୍ରେସରେ ଯୋଗ ଦେଇଥିବା ‘ତୃଣମୂଳ କଂଗ୍ରେସ’ର ପୁରୁଣା କର୍ମୀ।କିନ୍ତୁ, ରାଜ୍ୟ କଂଗ୍ରେସ ନେତୃତ୍ବ ଏହି ଅଭିଯୋଗକୁ ଅସ୍ବୀକାର କରିଛି। ଗଣମାଧ୍ୟମକୁ ଜଣେ କଂଗ୍ରେସ ନେତା କହିଛନ୍ତି, ଆମ ବିରୋଧରେ ଆଗତ ଅଭିଯୋଗ ଭିତ୍ତିହୀନ। ଏହି ହତ୍ୟାକାଣ୍ଡ ‘ତୃଣମୂଳ କଂଗ୍ରେସ’ର ଅଭ୍ୟନ୍ତରୀଣ ସଂଘର୍ଷର ପରିଣାମ। ସେଥିରେ ଆମର କ‌ୌଣସି ଭୂମିକା ନାହିଁ।

Powered by Froala Editor