ସୋରୁମ୍ରେ ୪୫ ମିନିଟ ଆତଙ୍କ ଖେଳାଇଲେ ଡକାୟତ : ୧୮ ଲକ୍ଷର ଗହଣା ସହ ଟଙ୍କା ନେଇଗଲେ
ଯାଜପୁର ଜିଲ୍ଲା ବ୍ୟାସନଗର ବଜାରରେ ଥିବା ‘ସେନ୍କୋ’ ଗହଣା ଶୋ’ ରୁମ୍ ରେ ଡକାୟତି ହୋଇଛି। କର୍ମଚାରୀଙ୍କୁ ମାଡ଼ ମାରି ଡକାୟତମାନେ ୧୫ କେଜି ସୁନା ସହିତ ରୁପା, ଲକ୍ଷାଧିକ ଟଙ୍କା ଲୁଟି ନେଇଛନ୍ତି। ୭ ଡକାୟତ ବନ୍ଧୁକ ମୁନରେ ପ୍ରଥମେ କର୍ମଚାରୀଙ୍କୁ ଡରାଇ ଧମକାଇ ଥିଲେ ଓ ପରେ ଗହଣା ଲୁଟି ନେଇଥିବା ସୂଚନା ମିଳିଛି। ଦିନ ସାଢ଼େ ୧ଟାରୁ ୨ଟା ଭିତରେ ଏହି ଡକାୟତି ହୋଇଛି।
ପାଖାପାଖି ୪୫ ମିନିଟ୍ ଧରି ଡକାୟତମାନେ ଶୋ’ରୁମ୍ ଭିତରେ ଉତ୍ପାତ ଜାରି ରଖିଥିଲେ। ଦିନ ପ୍ରାୟ ୧.୪୫ରେ ଡକାୟତମାନେ ସିକ୍ୟୁରିଟିକୁ ପିଟିଥିଲେ। ପୁରୁଷ ଓ ମହିଳାମାନଙ୍କୁ ବନ୍ଧୁକ ଦେଖାଇ ଅଲଗା ଅଲଗା ସ୍ଥାନରେ ବସାଇ ରଖିଥିଲେ। ପୁରୁଷ କର୍ମଚାରୀଙ୍କୁ ପିଟିବା ସହ ମାରିଦେବାକୁ ଧମକାଇ ଥିଲେ। କେହି ଆଲାରମ ବଜାଇଲେ କିମ୍ବା ବାହାର ଲୋକଙ୍କୁ ସୂଚନା ଦେବାକୁ ଚେଷ୍ଟା କଲେ ଗୁଳି କରିଦେବେ ବୋଲି କହୁଥିଲେ। ସମସ୍ତ ଡକାୟତଙ୍କ ପାଖରେ ବନ୍ଧୁକ ଥିଲା। ଏହି ଘଟଣାରେ ଅତ୍ୟଧିକ ଭୟଭୀତ ହୋଇ ଜଣେ ମହିଳା ଓ ଜଣେ ପୁରୁଷ ଚେତା ହରାଇଥିଲେ। ଡକାୟତମାନେ କର୍ମଚାରୀମାନଙ୍କ ମୋବାଇଲ ସହିତ ଶୋ’ରୁମ୍ କମ୍ପ୍ୟୁଟରରୁ ହାର୍ଡଡିସ୍କ ଖୋଲି ନେଇଯାଇଥିଲେ। ଡକାୟତଙ୍କ ମାଡ଼ରେ ଶୋ’ ରୁମ୍ର ଦୁଇଜଣ କର୍ମଚାରୀ ଆହତ ମଧ୍ୟ ହୋଇଛନ୍ତି। ତେବେ କେତେ ଟଙ୍କାର ଗହଣା ଲୁଟ୍ ସ୍ପଷ୍ଟ ହୋଇନି। ଖବର ପାଇ ଘଟଣା ସ୍ଥଳରେ ପୁଲିସ ପହଞ୍ଚି ତଦନ୍ତ କରୁଛି।
Powered by Froala Editor
