ସାଉଥଷ୍ଟାର ଅଲ୍ଲୁ ଅର୍ଜୁନଙ୍କ ଅଭିନୀତ ଫିଲ୍ମ ପୁଷ୍ପା ସୁପରଡୁପର ହିଟ୍ ହୋଇଥିଲା । ଏହାର ପାର୍ଟ ୨ କେବେ ଆସିବ ବୋଲି ଦର୍ଶକ ଅନାଇ ବସିଥିଲେ । ତେବେ ଏହାର ପୋଷ୍ଟର ରିଲିଜ ହୋଇସାରିଛି । ଅଲ୍ଲୁଙ୍କ ନୂଆ ରୂପକୁ ନେଇ ଚର୍ଚ୍ଚା ଜୋର ଧରିଛି । ତେବେ ୟାଭିତରେ ଫିଲ୍ମର ସୁଟିଂକୁ ନେଇ ଏକ ବଡ଼ ଖବର ସାମ୍ନାକୁ ଆସିଛି । ‘ପୁଷ୍ପା -୨'ର ସୁଟିଂ ମାଲକାନଗିରି ଜଙ୍ଗଲରେ କରାଯିବ । ମାଲକାନଗିରିର ଘଞ୍ଚ ଜଙ୍ଗଲରେ ଏବେ ହଇଚଇ ସୃଷ୍ଟି କରିବ ପୁଷ୍ପା । ଏ ଖବର ମିଳିବା ପରେ ଓଡ଼ିଶାବାସୀଙ୍କ ମଧ୍ୟରେ ଉତ୍ସାହ ଦେଖାଦେଇଛି । 

ଖବର ଅନୁଯାୟୀ, ମାଲକାନଗିରିରେ ସ୍ୱାଭିମାନ ଅଞ୍ଚଳର ବିଭିନ୍ନ ଲୋକେସନରେ ‘ପୁଷ୍ପା -୨'ର କିଛି ଅଂଶ ସୁଟିଂ କରାଯିବା ନେଇ ସ୍ଥିର ହୋଇଛି । ଏଥିପାଇଁ ଫିଲ୍ମର ପ୍ରଡକସନ ମ୍ୟାନେଜର ପିଭି ରାଓଙ୍କ ନେତୃତ୍ୱରେ ଏକ ୬ ଜଣିଆ ଟିମ ଗତ ୭ ଓ ୮ ତାରିଖରେ ମାଲକାନଗିରିର ହନ୍ତାଳଗୁଡା, ସାର୍କୁବନ୍ଧ ଝୋଲା ପୋଲ ବୁଲି ଦେଖିଛନ୍ତି । ଏଥିସହ ସେମାନେ ଜିଲ୍ଲାପାଳ ଓ ଏସପିଙ୍କୁ ଭେଟି ଏଥିପାଇଁ ଅନୁମତି ମଧ୍ୟ ଲୋଢ଼ିଛନ୍ତି । 'ପୁଷ୍ପା -୨'ର ସୁଟିଂ ଲାଗି ପ୍ରଶାସନ ଓ ପୁଲିସ ପକ୍ଷରୁ ସବୁଜ ସଙ୍କେତ ମିଳିଥିବା ଜଣାପଢ଼ିଛି । ମେ ମାସରେ ଫିଲ୍ମର ସୁଟିଂ ଏଠାରେ କରାଯିବ ବୋଲି ଜଣାଯାଇଛି । ଯାହାକୁ ନେଇ ଉତ୍ସାହିତ ଅଛନ୍ତି ପୁରା ମାଲକାନଗିରିବାସୀ । 

ସୂଚନାଯୋଗ୍ୟ ଯେ, ମାଲକାନଗିରିର ଜଙ୍ଗଲରେ ଆଦିବାସୀ ଜନଜାତିଙ୍କ ବସବାସ । ଏଠାକାର ଜୀବନଶୈଳୀ ଓ ପରିବେଶ ଫିଲ୍ମ ପାଇଁ ପ୍ରଯୁଜ୍ୟ ବୋଲି ନିର୍ଦ୍ଦେଶକ କହିଛନ୍ତି । 

Powered by Froala Editor