ଭୁବନେଶ୍ବର : ରାଜ୍ୟର ସ୍ବାସ୍ଥ୍ୟାନୁଷ୍ଠାନଗୁଡ଼ିକ ୫-ଟି ଅଧୀନରେ ‘ଆମ ହସ୍ପିଟାଲ’ ପରିଚୟ ପାଇବ। ତୃଣମୂଳସ୍ତରରେ ସ୍ବାସ୍ଥ୍ୟସେବାକୁ ସୁଦୃଢ଼ କରିବା ଲାଗି ରାଜ୍ୟ ସରକାର ଏହି ପଦକ୍ଷେପ ନେଇଛନ୍ତି। ପ୍ରଥମ ପର୍ୟ୍ୟାୟ ଜାନୁଆରି ମାସରୁ ଆରମ୍ଭ ହୋଇ ଅକ୍ଟୋବର ପର୍ୟ୍ୟନ୍ତ ଥିବା ବେଳେ ଏଥିରେ କେଉଁ କେଉଁ ହସ୍ପିଟାଲ ସ୍ଥାନ ପାଇବ ତାହାର ତାଲିକା ପ୍ରକାଶ ପାଇଛି। ପ୍ରଥମ ପର୍ୟ୍ୟାୟରେ ରାଜ୍ୟର ସମସ୍ତ ଜିଲ୍ଲା ମୁଖ୍ୟ ଚିକିତ୍ସାଳୟ, କ୍ୟାପିଟାଲ ହସ୍ପିଟାଲ, ଆରଜିଏଚ୍‌ ସ୍ଥାନ ପାଇଛି। ଏହାସହ ପ୍ରତ୍ୟେକ ବିଧାନସଭା ନିର୍ବାଚନ ମଣ୍ଡଳୀରୁ ଗୋଟିଏ ସ୍ବାସ୍ଥ୍ୟାନୁଷ୍ଠାନକୁ ସାମିଲ କରାଯିବ। ତେବେ ଏସବୁ ସ୍ବାସ୍ଥ୍ୟାନୁଷ୍ଠାନ କିଭଳି ଚୟନ କରାଯିବ ତାହା ସଂପର୍କରେ ବିଭାଗ ପକ୍ଷରୁ ସ୍ପଷ୍ଟ ସୂଚନା ଦିଆଯାଇଛି। ଏ ସଂକ୍ରାନ୍ତରେ ରାଜ୍ୟ ସ୍ବାସ୍ଥ୍ୟ ସଚିବ ଶାଳିନୀ ପଣ୍ଡିତ ସବୁ ଜିଲ୍ଲାପାଳଙ୍କୁ ପତ୍ର ଲେଖି ଅବଗତ କରିଛନ୍ତି।

ବିଭାଗ ପକ୍ଷରୁ କୁହାଯାଇଛି ଯେ ପ୍ରତ୍ୟେକ ବିଧାନସଭା ନିର୍ବାଚନମଣ୍ଡଳୀ ଅଧୀନରେ ଥିବା ଫାଷ୍ଟ ରେଫରାଲ ୟୁନିଟ୍‌(ଏଫ୍‌ଆରୟୁ)କୁ ପ୍ରାଥମିକତା ଦିଆଯିବ। ଯଦି କୌଣସି ନିର୍ବାଚନମଣ୍ଡଳୀରେ ଏଫ୍‌ଆରୟୁରେ ବଡ଼ ଧରଣର ମରାମତି କିମ୍ବା ପରିବର୍ତନ ସମ୍ଭବ ନୁହେଁ, ସେଠାରେ ବିକଳ୍ପଭାବେ ଉପଖଣ୍ଡ କିମ୍ବା ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ବିଚାରକୁ ନିଆଯିବ। ଏଥିରେ ଯେଉଁ ସ୍ବାସ୍ଥ୍ୟାନୁଷ୍ଠାନରେ ଅଧିକ ‌ସଂଖ୍ୟାରେ ରୋଗୀ ଚିକିତ୍ସା ପାଇଁ ଆସୁଛନ୍ତି ତାହା ସ୍ଥାନ ପାଇବ। ଯେଉଁ ସ୍ବାସ୍ଥ୍ୟାନୁଷ୍ଠାନରେ ବଡ଼ ମରାମତିର ଆବଶ୍ୟକତା ରହିଛି କିମ୍ବା କମ୍ ରୋଗୀ ଆସୁଥିବା ସ୍ବାସ୍ଥ୍ୟାନୁଷ୍ଠାନକୁ ପ୍ରଥମ ପର୍ୟ୍ୟାୟରେ ବିଚାରକୁ ନିଆଯାଇନାହିଁ। ଆସନ୍ତା ୫ଦିନ ଭିତରେ ସ୍ବାସ୍ଥ୍ୟାନୁଷ୍ଠାନ ତାଲିକା ଜାତୀୟ ସ୍ବାସ୍ଥ୍ୟ ମିସନ୍‌ ନିର୍ଦେଶକଙ୍କ ନିକଟକୁ ପଠାଇବାକୁ କୁହାଯାଇଛି।

Powered by Froala Editor