ନୂଆଦିଲ୍ଲୀ: ମହାମାରୀ କୋଭିଡ-୧୯ ଦ୍ୱିତୀୟ ଲହର ସଂକ୍ରମଣର ଉପଦ୍ରବରୁ ତ୍ରାହି ପାଇବା ପାଇଁ ଦେଶବାସୀ ଲଢେ଼ଇ ଜାରି ରଖିଥିବା ବେଳେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ଗ୍ରହଣୀୟତା କମିଥିବା ଏକ ସର୍ବେକ୍ଷଣରୁ ଜଣାଯାଇଛି । ଚଳିତ ସପ୍ତାହରେ ଦେଶରେ ମୋଟ ସଂକ୍ରମିତଙ୍କ ସଂଖ୍ୟା ଅଢେ଼ଇ କୋଟିକୁ ଟପିଥିବା ବେଳେ ଏହାକୁ ନିୟନ୍ତ୍ରଣ କରିବାରେ ମୋଦୀଙ୍କ ବିଫଳତା ଓ କ୍ଷୟ ପ୍ରାୟ ସମର୍ଥନ ଯୋଗୁଁ ତାଙ୍କ ଲୋକପ୍ରିୟତା ଏପରି ସର୍ବକାଳୀନ ନିମ୍ନକୁ ଖସି ଆସିଛି ବୋଲି ଆମେରିକାର ତଥ୍ୟ ଅନ୍ୱେଷଣ କମ୍ପାନି ମର୍ଣ୍ଣିଂ କନସଲ୍ଟ ପକ୍ଷରୁ କୁହାଯାଇଛି । ସୂଚନା ଥାଉ କି, ୨୦୧୪ରେ ଦେଶର ଶାସନ କ୍ଷମତା ଦଖଲ କରିଥିବା ମୋଦୀ ଜଣେ ଶକ୍ତିଶାଳୀ ଜାତୀୟ ନେତା ଭାବେ ନିଜର ଭାବମୂର୍ତ୍ତି ଅକ୍ଷୁଣ୍ଣ ରଖିବା ସହ ୨୦୧୯ରେ ବିଗତ ତିନି ଦଶନ୍ଧିର ସର୍ବାଧିକ ସଂଖ୍ୟା ଗରିଷ୍ଠତା ସହ ପ୍ରଧାନମନ୍ତ୍ରିତ୍ୱ ବଜାୟ ରଖିଥିଲେ । ମାତ୍ର ଦେଶରେ ମହାମାରୀ କୋଭିଡର ସମୟୋଚିତ ପରିଚାଳନାରେ ତ୍ରୁଟି ଯୋଗୁଁ ମୋଦୀଙ୍କୁ ଏପରି ଗ୍ରହଣୀୟତା ହରାଇବାକୁ ପଡ଼ିଛି ବୋଲି ଜଣାଯାଇଛି । ୨୦୧୯ ଅଗଷ୍ଟ ମାସରୁ ମୋଦୀଙ୍କ ଲୋକପ୍ରିୟତା ଉପରେ ନିଘା ରଖୁଥିବା ମର୍ଣ୍ଣିଂ କନସଲ୍ଟ ଚଳିତ ସପ୍ତାହରେ ତାହା ସର୍ବନିମ୍ନ ୬୩ ପ୍ରତିଶତକୁ ଖସି ଆସିଛି ବୋଲି ଜାଣିବାକୁ ପାଇଛି । କେବଳ ଗତ ଏପ୍ରିଲ ମାସରେ ହିଁ ସେଥିରେ ସର୍ବାଧିକ ୨୨ ପଏଣ୍ଟ ହ୍ରାସ ଘଟିଥିବା କୁହାଯାଇଛି । ଦିଲ୍ଲୀ ଓ ମୁମ୍ବାଇ ପରି ନଗରାଞ୍ଚଳରେ ଡାକ୍ତରଖାନାରେ ରୋଗୀଶଯ୍ୟା ନ ମିଳିବା ଏବଂ ଅମ୍ଳଜାନ ଅଭାବରୁ କୋଭିଡ ପୀଡ଼ିତମାନେ ମୃତୁ୍ୟମୁଖରେ ପଡ଼ିବା ଆଦି ଘଟଣା ତାଙ୍କ ଲୋକପ୍ରିୟତାକୁ ନକାରାତ୍ମକ ଭାବେ ପ୍ରଭାବିତ କରିଥିବା ସ୍ପଷ୍ଟ ହୋଇଛି । ସରକାରୀ ସହଯୋଗ ଅଭାବରୁ ଶବଗୃହ ଓ ଶବଦାହ କେନ୍ଦ୍ରମାନଙ୍କରେ ଶହ ଶହ ଶବ ଗଦା ହେବାର ଦୃଶ୍ୟ ସାମାଜିକ ଗଣମାଧ୍ୟମରେ ଛାଇଯାଇଥିଲା । ସ୍ଥିତି ସୁଧୁରିବାକୁ ଅନେକ ଦିନ ଲାଗିଯିବ ବୋଲି ଅନୁମାନ କରାଯାଉଛି । ଆଗାମୀ ୨୦୨୪ ଯାଏ ମୋଦୀଙ୍କୁ ନିର୍ବାଚନର ସମ୍ମୁଖୀନ ହେବାକୁ ପଡ଼ିବନି, ତେବେ ତାଙ୍କ ନେତୃତ୍ୱକୁ ଚ୍ୟାଲେଞ୍ଜ କରିବା ଲାଗି ବିରୋଧୀଦଳମାନେ ସେଭଳି କିଛି ଆଖିଦୃଶିଆ ପଦକ୍ଷେପ ନେଇଥିବା ମଧ୍ୟ ନଜିର ନାହିଁ ବୋଲି ଏହି ରିପୋର୍ଟରେ କୁହାଯାଇଛି ।

Powered by Froala Editor