କେନ୍ଦୁଝର ବନଖଣ୍ଡ ତେଲକୋଇ ବନାଞ୍ଚଳ ତେଲକୋଇ ସେକ୍ସନ ଛାମୁଣ୍ଡା ମୁଣ୍ଡା ସାହି ଜଙ୍ଗଲରେ ଏକ ମାଈ ହାତୀ ତାଣ୍ଡବ ଲୀଳା ରଚିଛି । ହାତୀର ଗତିବିଧି ସମ୍ପର୍କରେ ଜାଣିବାକୁ ବନ ବିଭାଗକୁ ନକେଦମ୍ ହେବାକୁ ପଡ଼ିଥିଲା । ତେବେ ଦୀର୍ଘ ସମୟ ପରେ ସନ୍ଧ୍ୟା ରେ ଉକ୍ତ ସ୍ଥାନରୁ କୌଣସି ଏକ ପ୍ରାଣୀର ଦେହାବଶେଷ ବନ ବିଭାଗ ଉଦ୍ଧାର କରିଛି । ଏହା ମଣିଷ କି କୌଣସି ପଶୁ କିମ୍ବା ଆଉ କାହାର ତାହା ସ୍ପଷ୍ଟ ହୋଇ ନାହିଁ । ବନ ବିଭାଗ ଦେହାବଶେଷ ର ନମୁନା ସଂଗ୍ରହ କରିଛି । 

ସୂଚନା ମୁତାବକ ହାତୀଟି ହିଂସ୍ର ହୋଇ କୌଣସି ଏକ ଦେହାବଶେଷକୁ ଶୁଣ୍ଢରେ ଧରି କଚାଡି ମାରୁଥିଲା ଏବଂ ଖେଳୁଥିଲା । ଏହା ଦେଖି ସ୍ଥାନୀୟ ଲୋକେ ଭୟବିତ ହେବା ସହିତ ବନ ବିଭାଗକୁ ଖବର ଦେଇଥିଲେ । ବନ ବିଭାଗ ପହଞ୍ଚି ଥିଲେ। ମାତ୍ର ହାତୀଟି ଧୀରେ ଧୀରେ ଘଞ୍ଚ ଜଙ୍ଗଲ ଆଡ଼କୁ ଚାଲି ଯାଉଥିବାରୁ ବନ ବିଭାଗ ଅଡ଼ୁଆରେ ପଡିଯାଇଥିଲା । ବନ ବିଭାଗ ପକ୍ଷରୁ ଥର୍ମାଲ ଡ୍ରୋନ କ୍ୟାମେରାରେ ମାଈ ହାତୀ ଛିଡ଼ା ହୋଇଥିବା ଠାବ ହୋଇଥିଲା । ହାତୀକୁ ଘଞ୍ଚ ଜଙ୍ଗଲ ମଧ୍ୟରୁ ବାହାରକୁ ବାହାର କରିବାକୁ ବନ ବିଭାଗ ଚେଷ୍ଟା କରିଥିଲା । ମାତ୍ର ହାତୀର ହିଂସ୍ର ରୂପ ଦେଖି ବନ ବିଭାଗ ତାକୁ ଆଶ୍ରୟ ନେବାପାଇଁ ଛାଡ଼ି ଦେଇଥିଲା । 

ଏହାପରେ ସନ୍ଧ୍ୟାରେ ପୁଣି ବନ ବିଭାଗ କର୍ମଚାରୀ ପହଞ୍ଚି ସର୍ଚ୍ଚ ଅପରେସନ ଆରମ୍ଭ କରିଥିଲେ । ହାତୀକୁ ସେଠାରୁ ଘଉଡ଼ାଇବାକୁ ଉଦ୍ୟମ କରାଯାଉ ଥିବା ବେଳେ ଆଉ ଦୁଇ ଦନ୍ତା ଆସି ସେଠାରେ ପହଞ୍ଚି ଥିଲେ । ଦନ୍ତା ଆସିବାପରେ ତିନି ହାତୀ ମିଶି ନିକଟସ୍ତ ଦୋବଲା ପାଳ ସଂରକ୍ଷିତ ଜଙ୍ଗଲକୁ ଚାଲିଯାଇଥିଲେ । ଏହା ପରେ ବନ ବିଭାଗ ଟିମ୍ ଘଟଣାସ୍ଥଳରୁ ଏକ ପ୍ରାଣୀର ଖଣ୍ଡ ବିଖଣ୍ଡିତ ମାଂସ,ହାଡ ପଡ଼ିଥିବା ଦେଖିଥିଲେ । ସେ ସବୁର ନମୁନାକୁ ସଂଗ୍ରହ କରିଥିବା ଜଣା ପଡ଼ିଛି ।

ନମୁନା ସଂଗ୍ରହ କରାଯାଇଛି । ଲ୍ୟାବକୁ ପରୀକ୍ଷା ପାଇଁ ପଠାଯିବ ,ରିପୋର୍ଟ ଆସିବା ପରେ ଦେହାବଶେଷ  କାହାର ସ୍ପଷ୍ଟ ହେବ ବୋଲି କହିଛନ୍ତି ବନାଞ୍ଚଳ ଅଧିକାରୀ ।

Powered by Froala Editor