ଶନିବାର ବିଳମ୍ବିତ ରାତିରେ କେନ୍ଦୁଝର ଜିଲ୍ଲା ହରିଚନ୍ଦନପୁର ବ୍ଲକ ଦୈତାରୀ ଥାନା ରାସୋଳ ପଂଚାୟତର ଝୁମୁକିପଟିଆ ସାହିରେ  ଘଟିଛି ଏକ ଅଭାବନୀୟ ଘଟଣା । ଗୁଣିଗାରେଡି ସନ୍ଦେହରେ ଆଦିବାସୀ ଦମ୍ପତିକୁ ଧାରୁଆ ଅସ୍ତ୍ରରେ ହତ୍ୟା କରାଯାଇଛି । ମୃତକ ମାନେ  ହେଲେ ଦୈତାରୀ ଥାନା ରାସୋଳ ପଂଚାୟତ ଝୁମୁକିପଟିଆ ସାହିର ଆଦିବାସୀ ଦମ୍ପତି ବାହାଡା ଓରଫ ଲେଚା ମୁର୍ମ୍ମୁ (୪୫) ଏବଂ ତାଙ୍କ ପତ୍ନି ଧାନୀ ମୁର୍ମ୍ମୁ (୪୦) ବୋଲି ଜଣାପଡିଛି । 

ସୂଚନା ଅନୁସାରେ ଦୈତାରୀ ଥାନା ଅନ୍ତର୍ଗତ ରାସୋଳ ଛକ ଠାରୁ ଖସାପଦା ରାସ୍ତାରେ ମାତ୍ର ୩୦୦ ମିଟର ଦୂରରେ ଥିବା ଝୁମୁକିପଟିଆ ସାହି ରହିଛି । ଏହି ସାହିରେ ଦମ୍ପତି ଗୁଣିଗାରେଡି କରିଥାନ୍ତି ବୋଲି ସାହି ଲୋକେ ସନ୍ଦେହ କରିଥାନ୍ତି । ଶନିବାର ବିଳମ୍ବିତ ରାତିରେ ଦମ୍ପତି ନିଜ ଘର ବାହାରେ ଏକ ଖଟ ଉପରେ ଶୋଇଥିବା ବେଳେ ତାର ବଡଝିଅ ଘର ଭିତରେ ଶୋଇଥିଲା । ରାତିରେ ଚିତ୍କାର ଶୁଣାଯିବାରୁ ଦମ୍ପତିଙ୍କ ଝିଅ ଘରୁ ବାହାରକୁ ଆସି ଦେଖିବା ବେଳକୁ ରତ୍କ ଜୁଡୁବୁଡୁ ଅବସ୍ଥାରେ ତାର ବାପା ଏବଂ ମାଆଙ୍କ ମୃତ୍ୟୁ ହୋଇଛି । 

ସ୍ଥାନୀୟ ଲୋକଙ୍କୁ ଖବର ଦେବା ପରେ ଲୋକେ ଦୈତାରୀ ପୁଲିସକୁ ଖବର ଦେଇଥିଲେ । ଦୈତାରୀ ପୁଲିସ ଘଟଣା ସ୍ଥଳକୁ ଆସି ତଦନ୍ତ ଆରମ୍ଭ କରିଥିଲେ । କେନ୍ଦୁଝରରୁ ସାଇଟିଂଫିକ ଟିମକୁ ଡକାଇ ଅଧିକ ତଦନ୍ତ କରାଯାଇଥିବା ବେଳେ ସାହିର ଜଣେ ବ୍ୟକ୍ତିକୁ ସନ୍ଦେହରେ ଅଟକ ରଖି ପଚରାଉଚୁରା କରାଯାଉଛି । 

Powered by Froala Editor