ବିଶ୍ୱର ସର୍ବବୃହତ ଆପଲ୍ ଆଇଫୋନ୍ କାରଖାନାରେ କରୋନା ତାଲାବନ୍ଦ ଏବଂ ବେତନ ବିବାଦକୁ ନେଇ କର୍ମଚାରୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି । କାରଣ ସେମାନେ ଅନେକ ସପ୍ତାହ ଧରି କରୋନା କଟକଣା ଭିତରେ ରହୁଥିଲେ। ଏବେ କମ୍ପାନି ପରିସରରୁ ପଳାୟନ କରିବାକୁ ଚେଷ୍ଟା କରିଛନ୍ତି। ଏହି ସମୟରେ ଫ୍ୟାକ୍ଟ୍ରିରେ ମୁତୟନ ସୁରକ୍ଷାକର୍ମୀ ଏବଂ କର୍ମଚାରୀଙ୍କ ମଧ୍ୟରେ ହିଂସାତ୍ମକ ସଂଘର୍ଷ ଦେଖିବାକୁ ମିଳିଛି। କର୍ମଚାରୀଙ୍କୁ ମାଡ ମରାଯାଇଥିବା ବେଳେ ଆଉ କିଛି କର୍ମଚାରୀଙ୍କୁ ଅଟକ ରଖାଯାଇଛି। ସଂଘର୍ଷରେ ଅନେକ ଶ୍ରମିକ ଆହତ ହୋଇଥିବା କୁହାଯାଉଛି ।

ଚାଇନାର ଝେଙ୍ଗଜୋଉରେ ଥିବା ଆପଲ୍ କାରଖାନାରେ ଅକ୍ଟୋବରରୁ ବିଶୃଙ୍ଖଳା ଦେଖାଯାଉଥିଲା । କରୋନା ପ୍ରତିବନ୍ଧକ ଯୋଗୁଁ ତାଲାବନ୍ଦ ଆରମ୍ଭ ହେବା ପରେ ଶ୍ରମିକମାନଙ୍କ ମଧ୍ୟରେ ଅସନ୍ତୋଷ ବଢିଥିଲା । ଆଇଫୋନ୍ ସିଟିରେ ୨ ଲକ୍ଷରୁ ଅଧିକ ଶ୍ରମିକଙ୍କ ମଧ୍ୟରୁ ଅନେକଙ୍କୁ ସଂଗରୋଧ କରାଯାଇଥିଲା । ଏମାନେ ଖାଦ୍ୟ ଏବଂ ଔଷଧ ପାଇବାରେ ଅସୁବିଧାର ସମ୍ମୁଖୀନ ହୋଇଥିଲେ ।

ଏହାମଧ୍ୟରେ ଭିତରେ ରହିବା ଅସହ୍ୟ ହେବାରୁ ବୁଧବାର କର୍ମଚାରୀ କମ୍ପାନି ପରିସରରୁ ପଳାୟନ କରିବାକୁ ଚେଷ୍ଟା କରିଛନ୍ତି। ଏହି ସମୟରେ ସୁରକ୍ଷାକର୍ମୀଙ୍କ ସହ ସେମାନଙ୍କର ସଂଘର୍ଷ ହୋଇଥିବା ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । କିଛି କର୍ମଚାରୀ ରକ୍ତରେ ଜୁଡୁବୁଡୁ ଅବସ୍ଥାରେ ଥିବା ଭିଡିଓରୁ ଦେଖିବାକୁ ମିଳିଛି। ସ୍ଥିତି ନିୟନ୍ତ୍ରଣ ପାଇଁ ସୁରକ୍ଷାକର୍ମୀ ଅଗ୍ନି ନିର୍ବାପକ ଯନ୍ତ୍ରର ବ୍ୟବହାର କରୁଥିବା ଦେଖିବାକୁ ମିଳିଛି।

ଭାଇରାଲ ହେଉଥିବା ଭିଡିଓ ଅନୁଯାୟୀ, ଫକ୍ସକନ୍ ପ୍ଲାଣ୍ଟର କର୍ମଚାରୀମାନେ କାରଖାନାରୁ ବାହାରିଥିଲେ । ଏହା ପରେ ସୁରକ୍ଷା କର୍ମୀଙ୍କ ସହ ଝଗଡା ହୋଇଥିଲା । ଅନ୍ୟ ଏକ ଭିଡିଓରେ ସୁରକ୍ଷାକର୍ମୀ ମାନେ ଭୂମିରେ ପଡ଼ିଥିବା ଜଣେ ଶ୍ରମିକଙ୍କୁ ବାଡ଼ିରେ ମାଡ ମାରୁଥିବାର ନଜର ଆସିଛନ୍ତି । ଏହି ସମୟରେ ଲଢେଇ ଜାରି ରହିବ ବୋଲି ସ୍ଲୋଗାନ ଦିଆଯାଉଥିବା ମଧ୍ୟ ଦେଖିବାକୁ ମିଳୁଛି ।

Powered by Froala Editor