ଦେଶରେ ଅକ୍ଟୋବର ୧ରେ ଲଞ୍ଚ ହେବାକୁ ଯାଉଛି ୫ଜି ସେବା। ପ୍ରଗତି ମଇଦାନରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଇଣ୍ଡିଆ ମୋବାଇଲ୍ କଂଗ୍ରେସରେ ୫ଜି ସେବାର ଶୁଭାରମ୍ଭ କରିବେ। ସରକାରଙ୍କ ନ୍ୟାଶନାଲ ବ୍ରଡବ୍ୟାଣ୍ଡ ମିଶନ ଟ୍ୱିଟ କରି ଏହି ସୂଚନା ଦେଇଛି।

ଏସିଆର ସବୁଠାରୁ ବଡ଼ ଟେଲିକମ, ମିଡିଆ ଓ ବୈଷୟିକ ଫୋରମର ମାନ୍ୟତା ପାଇଥିବା ଇଣ୍ଡିଆ ମୋବାଇଲ କଂଗ୍ରେସ ଆୟୋଜନ ଟେଲିକମ୍ୟୁନିକେସନ ବିଭାଗ ଓ ସେଲୁଲାର ଅପରେସନ ଆସୋସିଏସନ ଅଫ ଇଣ୍ଡିଆ(ସିଓଏଆଇ) ମିଳିତ ଭାବେ କରୁଛନ୍ତି।

୫ଜି ସେବା ଶୁଭାରମ୍ଭ ହେବାକୁ ଥିବା ବେଳେ ଏହା ପ୍ରାଥମିକ ଅବସ୍ଥାରେ ମାତ୍ର କିଛି ହାତ ଗଣି ସହରରେ ଉପଲବ୍ଧ ହେବ। ସରକାର ଦେଶର ୮୦% ଅଞ୍ଚଳରେ ଯାଥାଶୀଘ୍ର ୫ଜି ଟେଲିକମ ସର୍ଭିସ ଯୋଗାଇ ଦେବାକୁ ଲକ୍ଷ୍ୟ ରଖିଛନ୍ତି।

ଗତ ବୁଧବାର ଦିଲ୍ଲୀ ଆୟୋଜିତ ଏକ କାର୍ଯ୍ୟକ୍ରମରେ ଟେଲିକମ ମନ୍ତ୍ରୀ ଅଶ୍ୱିନୀ ବୈଷ୍ଣବ କହିଥିଲେ, “୫ଜିର ଯାତ୍ରା ଅତ୍ୟନ୍ତ ଉତ୍କଣ୍ଠା ଆଣିବ। ବିଶ୍ୱର ଅଧିକାଂଶ ରାଷ୍ଟ୍ର ୪୦ରୁ ୫୦% ଅଞ୍ଚଳକୁ ୫ଜି ସେବା ପହଞ୍ଚାଇବା ପାଇଁ ଏକାଧିକ ବର୍ଷର ସମୟ ନେଇଥିଲେ। କିନ୍ତୁ ଆମେ ଖୁବ କମ ସମୟରେ ୮୦% ଅଞ୍ଚଳରେ ୫ଜି ସେବା ପହଞ୍ଚାଇବାକୁ ଲକ୍ଷ୍ୟ ରଖିଛୁ। ”

ଅନ୍ୟପକ୍ଷେ ୫ଜି ସେବା ଏବଂ ଏଭିଏସନକୁ ନେଇ ଆମେରିକାରେ ଉପୁଜିଥିବା ସମସ୍ୟା ଏବଂ ସଂଶୟକୁ ନେଇ କେନ୍ଦ୍ର ସରକାର ସ୍ପଷ୍ଟ କରିଛନ୍ତି। ଆମେରିକାରେ ଯାହା ବି ସମସ୍ୟା ରହିଛି ତାହା ଭାରତରେ ହେବ ନାହିଁ ବୋଲି ଅଧ୍ୟୟନ ପରେ ନିଜ ବୟାନରେ କହିଛି ଟେଲିକମ ମନ୍ତ୍ରଣାଳୟ। ଆଇଆଇଟିର ଅଧ୍ୟୟନ ଅନୁସାରେ ଗୋପିଂ କାରଣରୁ ଆମେରିକାରେ ହୋଇଥିବା ସମସ୍ୟା ଭାରତରେ ହେବ ନାହିଁ।

Powered by Froala Editor