ଭୁବନେଶ୍ୱର:  ମୟୂରଭଞ୍ଜ ଜିଲ୍ଲାରେ  ୨ଜଣ ବାଲିମାଫିଆଙ୍କ ଉପରେ ଜାତୀୟ ଗ୍ରୀନ୍ ଟ୍ରିବ୍ୟୁନାଲ(ଏନଜିଟି) ୩୬କୋଟି ଟଙ୍କାର ଜୋରିମାନା  କରିଛି।
ମିଳିଥିବା ସୂଚନା ଅନୁସାରେ ବୁଢ଼ାବଳଙ୍ଗ ନଦୀର ଡିଙ୍ଗିରିଆ, ଅର୍ପଟା ଓ ମହୁପୁରା ଗାଁ ନିକଟରେ ପରିବେଶ କ୍ଲିଅରାନ୍ସ ଓ ଖନନ ପାଇଁ ଅନୁମତି ନଥାଇ ବେଆଇନ ବାଲି ଖନନ କରି ଦୁଇ ଲିଜଧାରୀ ପ୍ରଦୀପ କୁମାର ବିନ୍ଧାଣୀ ଓ କୃପାସିନ୍ଧୁ ସିଂହ କୋଟି କୋଟି ଟଙ୍କାର ରାଜସ୍ୱ ହରିଲୁଟ୍ କରିଥିବା ଜଣାପଡ଼ିଛି । ଏନଜିଟି ପୂର୍ବାଂଚଳ ବେଂଚର ଜୁଡିସିଆଲ ସଦସ୍ୟ ବି.ଅମିତ୍ ଷ୍ଟାଲେକର ଓ ଶୈବାଳ ଦାସଗୁପ୍ତାଙ୍କ ଖଣ୍ଡପୀଠ ଏହି ଅଭିଯୋଗର ଶୁଣାଣି କରି ଦୁଇ ବାଲି ଲିଜଧାରୀଙ୍କ ଉପରେ ୩୬କୋଟି ଟଙ୍କାର ଜୋରିମାନା କରିଛନ୍ତି । ଯାହାକି ଓଡ଼ିଶାରେ ଏପର୍ୟ୍ୟନ୍ତ କୌଣସି ବ୍ୟକ୍ତି ବିଶେଷଙ୍କ ଉପରେ ସର୍ବାଧିକ ପରିମାଣର ଜୋରିମାନା ବୋଲି ଜଣାପଡ଼ିଛି ।ଆବେଦନକାରୀ ମୟୂରଭଞ୍ଜ ଜିଲ୍ଲାର ରାଧାମୋହନ ସିଂଙ୍କ ଆବେଦନ ଉପରେ ଗ୍ରୀନ୍ ଟ୍ରିବ୍ୟୁନାଲ ଏହି ନିର୍ଦ୍ଦେଶ ଦେଇଛନ୍ତି ।
ସୂଚନା ଅନୁସାରେ ଲିଜଧାରୀ ପ୍ରଦୀପ କୁମାର ବିନ୍ଧାଣୀ ବୁଢ଼ାବଳଙ୍ଗ ନଦୀରେ ବଡ଼ସାହି ତହସିଲ ଅନ୍ତର୍ଗତ ଡିଙ୍ଗିରିଆ ଗାଁ ନିକଟରେ ୧୬.୧୨ ଏକର ପରିମିତ ସ୍ଥାନରୁ ଦୈନିକ ୨ହଜାର କ୍ୟୁବିକ ମିଟର ବାଲି ଉଠାଣ ନିମନ୍ତେ ଅନୁମତି ପାଇଥିଲେ । ମାତ୍ର ଶ୍ରୀ ବିନ୍ଧାଣୀ ଦୈନିକ ୨୨୯୫ କ୍ୟୁବିକ ମିଟର ଓ ବାର୍ଷିକ ୪.୮୧୯ଲକ୍ଷ କ୍ୟୁବିକ ମିଟର ବାଲି ଖନନ କରିଛନ୍ତି ଯାହାକି ତାଙ୍କୁ ଦିଆଯାଇଥିବା ଅନୁମତିର ୨୪୦ଗୁଣା ଅଧିକ । ଏହାଦ୍ୱାରା ରାଜ୍ୟ ରାଜକୋଷକୁ ପ୍ରାୟ ୪୩.୬୮କୋଟି ଟଙ୍କା କ୍ଷତି ସହିିବାକୁ ପଡ଼ିଛି ତଥା ପରିବେଶ ଅସନ୍ତୁଳନର କାରଣ ମଧ୍ୟ ହୋଇଛି।

୨୦୨୧-୨୨ ମସିହାରେ ଏହି ବାଲି ଖନନ ପାଇଁ ଶ୍ରୀ ବିନ୍ଧାଣୀଙ୍କୁ ରାଜ୍ୟ ପରିବେଶ ପ୍ରଦୂଷଣ ନିୟନ୍ତ୍ରଣ ବୋର୍ଡଠରୁ ଅନୁମତି ଦେଇନି । ଏପରିକି ରାଜ୍ୟ ପରିବେଶ ପ୍ରଭାବ ଆକଳନ ଅଥରିଟି ମଧ୍ୟ ସମ୍ପୃକ୍ତ ଲିଜଧାରୀଙ୍କୁ ପରିବେଶ କ୍ଲିଅରାନ୍ସ ଦେଇନାହାନ୍ତି । ଏହା ସତ୍ତ୍ୱେ ବେଆଇନ ଖନନ କରିଥିବା ଯୋଗୁ ଗ୍ରୀନ୍ ଟ୍ରିବ୍ୟୁନାଲ ତାଙ୍କ ଉପରେ ୧୧.୮୯କୋଟି ଟଙ୍କାର ଜୈବମଣ୍ଡଳର କ୍ଷତିପୂରଣ ଓ ୨୧ଲକ୍ଷ ଟଙ୍କା ପରିବେଶ କ୍ଷତିପୂରଣ ଦାଖଲ ପାଇଁ ନିର୍ଦ୍ଦେଶ ଦେଇଛନ୍ତି ।
ସେହିପରି ଅର୍ପଟା ଗାଁରେ ଶ୍ରୀ ବିନ୍ଧାଣୀ ବାର୍ଷିକ ଅନୁମତିର ପ୍ରାୟ ୨୪୦ଗୁଣ ଅଧିକ ଖନନ କରିଥିବା ଯୋଗୁ ରାଜ୍ୟ ରାଜକୋଷକୁ ୫୩.୨୬କୋଟି ଟଙ୍କା କ୍ଷତି ହୋଇଛି । ଏହି ବେଆଇନ ଖନନ ପାଇଁ ତାଙ୍କ ଉପରେ ୪.୯୨କୋଟି ଟଙ୍କା ଜୋରିମାନା ରୁଜୁ ହୋଇଛି ।
ସେହିପରି ଅନ୍ୟଜଣେ ଲିଜଧାରୀ କୃପାସିନ୍ଧୁ ସିଂହ ବୁଢ଼ାବଳଙ୍ଗ ନଦୀର ମହୁପୁୁର ଗାଁରେ ଅନୁମତିଠୁ ଅଧିକ ଖନନ କରିବା ଯୋଗୁ ଏନଜିଟି ତାଙ୍କ ଉପରେ ୧୨.୫୬କୋଟି ଟଙ୍କାର ଜୋରିମାନା ରୁଜୁ କରିଛନ୍ତି । ଏହି ବେଆଇନ ଭାବେ ଅଧିକ ଖନନ କରିଥିବାରୁ ଦୁଇ ଲିଜଧାରୀଙ୍କ ଉପରେ ଅତିରିକ୍ତ ଭାବେ ୭.୧୨ କୋଟି ଟଙ୍କା ରୟାଲିଟି ପୈଠ କରିବାକୁ ଏନଜିଟି ନିର୍ଦ୍ଦେଶ ଦେଇଛନ୍ତି।

Powered by Froala Editor