ଭୁବନେଶ୍ୱର:  ଛାମୁଆ ସଂଗଠନର ନବକଳେବର ଚାଲିଥିବାବେଳେ ଆସନ୍ତା ୨୮ ତାରିଖରେ ଦଳର ସମସ୍ତ ବିଧାୟକ ଓ ମନ୍ତ୍ରୀଙ୍କୁ ନେଇ ନବୀନ କରିବେ ବୈଠକ । ଲୋକଙ୍କ ନିକଟତର ହେବା ସହ ହିତାଧିକାରୀଙ୍କ ପାଖରେ ସରକାରୀ ଯୋଜନା, ସେବା ଓ ସୁବିଧାକୁ ପହଞ୍ଚାଇବା ଲାଗି ବାର୍ତ୍ତା ଦେବେ। ବିଧାୟକ, ମନ୍ତ୍ରୀଙ୍କୁ ନବୀନ ଦେବେ ଦିଗଦର୍ଶନ ।  ସକାଳ ୮ଟାରୁ ଦିନ ୨ଟା ପର୍ୟ୍ୟନ୍ତ ଚାଲିବ ମାନସ ମନ୍ଥନ । ଆଗାମୀ ରଣନୀତି ନେଇ ହେବ ମାରାଥନ ଆଲୋଚନା । ମିଶନ ୨୦୨୪ ପାଇଁ ଦଳୀୟ ବିଧାୟକମାନଙ୍କୁ ନବୀନ ଦେବେ ଗୁରୁ ମନ୍ତ୍ର ।

ଆସନ୍ତା ୨୮ରେ କଳିଙ୍ଗ ଷ୍ଟାଡିୟମ୍‌ ପରିସରରେ ବିଜେଡି ବିଧାୟକ ଓ ମନ୍ତ୍ରୀମାନଙ୍କ ସମ୍ମିଳନୀ ହେବ ବୋଲି ଜଣାପଡ଼ିଛି । ଏଥିରେ ମୁଖ୍ୟମନ୍ତ୍ରୀ ତଥା ବିଜେଡି ସଭାପତି ନବୀନ ପଟ୍ଟନାୟକ ଯୋଗଦେବାର କାର୍ୟ୍ୟକ୍ରମ ରହିଛି । ଏହି ଅବସରରେ ନବୀନ ସମସ୍ତ ବିଧାୟକ, ମନ୍ତ୍ରୀଙ୍କ ସହ ଆଲୋଚନା କରିବେ। ସମସ୍ତ ନିର୍ବାଚନମଣ୍ଡଳୀରେ ସରକାରୀ କାର୍ୟ୍ୟକ୍ରମ କେମିତି କାର୍ୟ୍ୟକାରୀ ହେଉଛି, ତାହାର ହିସାବ ମାଗିବେ। ସମସ୍ୟା ବୁଝିବେ। କିଭଳି ସରକାରୀ କାର୍ୟ୍ୟକ୍ରମ ଓ ଯୋଜନାଗୁଡ଼ିକ ତ୍ୱରିତ ବେଗରେ କାର୍ୟ୍ୟକାରୀ ହେବ, ସେ ବାବଦରେ ବିଧାୟକମାନଙ୍କ ମତାମତ ଲୋଡ଼ିବେ।

ବୈଠକରେ କାଳିଆ, ବଳରାମ, ମମତା, ବିଜୁ ସ୍ୱାସ୍ଥ୍ୟ କଲ୍ୟାଣ, ଜାଗା ମିଶନ, ମିଲେଟ ମିଶନ, ବିଜୁ ପକ୍କା ଘର, ୫-ଟି ଯୋଜନାରେ ସ୍କୁଲ ରୂପାନ୍ତରଣ, ପର୍ୟ୍ୟଟନସ୍ଥଳୀଗୁଡ଼ିକର ବିକାଶ ଆଦି ଯୋଜନା ବାବଦରେ ମୁଖ୍ୟତଃ ଆଲୋଚନା ହେବ। ୨୦୧୯ରେ ଦଳ ରାଜ୍ୟବାସୀଙ୍କୁ ଯାହା ପ୍ରତିଶ୍ରୁତି ଦେଇଥିଲା, ତାହାକୁ ଶତ ପ୍ରତିଶତ କାର୍ୟ୍ୟକାରୀ କରିବାକୁ ନବୀନ ତାଗିଦ୍‌ କରିବେ।

Powered by Froala Editor