ବେଙ୍ଗାଲୁରୁ: ଆସନ୍ତା ୧୦ ତାରିଖରୁ କର୍ଣ୍ଣାଟକରେ ଲାଗୁ ହେବ ୧୪ ଦିନିଆ ଲକଡାଉନ୍ । ଏହି ସମୟରେ ଅତ୍ୟାବଶ୍ୟକ ସାମଗ୍ରୀକୁ ଛାଡ଼ି ଅନ୍ୟ ସମସ୍ତ ଦୋକାନ ବଜାର ବନ୍ଦ ରହିବ । ଜରୁରି ସେବାକୁ ବାଦ ଦେଲେ ଯାତାୟାତ ଉପରେ କଟକଣା ଲଗାଯିବ । କରୋନା ସଂକ୍ରମଣ ଚେନ୍ ଭାଙ୍ଗିବାକୁ ଏହି ନିଷ୍ପତ୍ତି ନେଇଛନ୍ତି କର୍ଣ୍ଣାଟକ ସରକାର ।

ମୁଖ୍ୟମନ୍ତ୍ରୀ ବିଏସ୍ ୟେଦୁରପ୍ପା ଲକଡାଉନ୍ ସମ୍ପର୍କରେ ରାଜ୍ୟବାସୀଙ୍କୁ ଏନେଇ ବିସ୍ତୃତ ଭାବେ ସୂଚନା ଦେଇଛନ୍ତି । ସେ କହିଛନ୍ତି, କରୋନାକୁ ବ୍ରେକ୍ ଦେବାକୁ ପ୍ରଥମେ କର୍ଫ୍ୟୁ ଲଗା ଯାଇଥିଲା । ହେଲେ ଏହା କାମ ଦେଲାନି ।  ସଂକ୍ରମଣ ହ୍ରାସ କରିବା ବଦଳରେ ରାଜ୍ୟରେ ସଂକ୍ରମିତଙ୍କ ସଂଖ୍ୟାକୁ ବୃଦ୍ଧି କରିଥିଲା । ତେଣୁ ସରକାର ବାଧ୍ୟ ହୋଇ ଲକଡାଉନ୍ ଲାଗୁ କରିବାକୁ ଯାଉଛନ୍ତି । ଏହାସହିତ ସେ ଲକଡାଉନ୍ ସମୟରେ ସହଯୋଗ କରିବାକୁ ନିବେଦନ କରିଛନ୍ତି ।

ଲକଡାଉନ୍ ବେଳେ ରାଜ୍ୟରେ ଥିବା ସମସ୍ତ ହୋଟେଲ, ପବ୍ସ ଓ ବାର୍ ବନ୍ଦ ରହିବ । ରାସ୍ତା କଡ଼଼ ଖାଇବା ଦୋକାନ, ମାଂସ, ମାଛ, ଅଣ୍ଡା, ଗ୍ରୋସରୀ, ଏକାକୀ ଥିବା ମଦ ଦୋକାନ ଓ ପରିବା ଦୋକାନ ସକାଳ ୬ଟାରୁ ୧୦ଟା ଯାଏ ଖୋଲା ରହିବ । କେବଳ ମେଡିକାଲ କାମ ପାଇଁ ଗାଡ଼଼ି ଚଳାଚଳକୁ ଅନୁମତି ମିଳିବ । ସ୍କୁଲ, କଲେଜ ସହ ସମସ୍ତ ଶିକ୍ଷାନୁଷ୍ଠାନ ବନ୍ଦ ରହିବ । ତେବେ ଏହି ସମୟରେ ଅନଲାଇନରେ କ୍ଲାସ କରାଯାଇ ପାରିବ । ହୋଟେଲ ଓ ରେସ୍ତୋରାଁ ଗୁଡ଼଼ିକ ହୋମ ଡେଲିଭରୀ ସେବା ଯୋଗାଇ ପାରିବେ । ଏଥିପାଇଁ ଯେଉଁମାନେ ଗାଡ଼଼ି ବ୍ୟବହାର କରିବେ ସେମାନେ ସ୍ୱତନ୍ତ୍ର ଭାବେ ପାସ୍ ନେବେ । ବିନା ପାସରେ କାହାରିବାକୁ ଅନୁମତି ମିଳିବନି । ଯେଉଁମାନେ ନିୟମ ଉଲ୍ଲଙ୍ଘନ କରିବେ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ୟେଦୁରପ୍ପା ସ୍ପଷ୍ଟ କରିଛନ୍ତି । 

Powered by Froala Editor