ଆଇଏଏସ୍ ପୂଜା ସିଙ୍ଘଲ ଗିରଫ
ମନରେଗା ପାଣ୍ଠି ହଡପ ସମେତ ଅନ୍ୟ ମନିଲଣ୍ଡ୍ରିଂ ଅଭିଯୋଗରେ ଝାଡ଼ଖଣ୍ଡ ଖଣି ସଚିବ ପୂଜା ସିଂଘଲଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ (ଇଡି) ଗିରଫ କରିଛନ୍ତି। ସେ ମନରେଗା ଅର୍ଥର ହେରଫର, ଆୟରୁ ଅଧିକ ସମ୍ପତ୍ତି ଠୁଳ ଭଳି ସଂଗୀନ ମାମଲାର ଅଭିଯୁକ୍ତ ଥିଲେ। ଏହାର ତଦନ୍ତ କରି ଆଜି ଇଡି ୨୦୦୦ ମସିହା ଆଇଏଏସ୍ ବ୍ୟାଚ୍ର ଅଫିସର ପୂଜାଙ୍କୁ ଗିରଫ କରିଛି।
ମେ’ ୬ ତାରିଖରେ ଇଡି ପୂଜା ସିଙ୍ଘଲଙ୍କ ଦୁଇ ସହଯୋଗୀଙ୍କ ଠାରୁ ନଗଦ ୧୯ କୋଟି ଟଙ୍କା ଜବତ କରିଥିଲା। ମନେରଗା ଯୋଜାନାରେ ହୋଇଥିବା ବ୍ୟାପକ ଦୁର୍ନୀତି ଘଟଣାରେ ଇଡି ସର୍ଚ୍ଚ ଅପରେସନ କରୁଥିବା ବେଳେ ମୋଟ ୧୯.୩୧ କୋଟି ଟଙ୍କା ଜବତ କରାଯାଇଥିଲା।
ଏହା ମଧ୍ୟରୁ ନଗଦ ୧୭ କୋଟି ଟଙ୍କା ପୂଜାଙ୍କ ଚାର୍ଟାର୍ଡା ଆକାଉଣ୍ଟାଣ୍ଟ ସୁମନ କୁମାରଙ୍କ ଘରୁ ଓ ବାକି ୧.୮ କୋଟି ଟଙ୍କା ଆଉ ଜଣେ ସହଯୋଗୀଙ୍କ ଠିକଣାରୁ ଜବତ କରାଯାଇଥିଲା। ଏହାପରେ ସୁମନ କୁମାରଙ୍କୁ ଗିରଫ ମଧ୍ୟ କରାଯାଇଥିଲା। ମନେରଗା ଯୋଗଜନାରେ ହୋଇଥିବା ୧୮ କୋଟି ଟଙ୍କାର ଦୁର୍ନୀତି ଘଟଣାର ଯାଞ୍ଚ କରୁଥିବା ଇଡି ଗତ ଶୁକ୍ରବାର ଝାରଖଣ୍ଡ ସମେତ ଆଉ ୪ଟି ରାଜ୍ୟର ବିଭିନ୍ନ ସ୍ଥାନରେ ରେଡ୍ କରିଥିଲା।
ଏହାପୂର୍ବରୁ ଇଡି ତତ୍କାଳୀନ ସେକସନ ଅଫିସର ଓ କୁନ୍ତିର ଜୁନିୟର ଇଞ୍ଜିନିୟର ରାମ ବିନୋଦ ପ୍ରସାଦ ସିହ୍ନାଙ୍କୁ ପଶ୍ଚିମବଙ୍ଗରୁ ଗିରଫ କରିଥିଲା। ଇଡି ତାଙ୍କୁ ଜେରା କରିବା ବେଳେ ମନେରଗା ଦୁର୍ନୀତିରେ ସାମିଲ ଥିବା କିଛି ବରିଷ୍ଠ ପ୍ରଶାସନିକ ଅଧିକାରୀଙ୍କ ନାଁ ସାମ୍ନାକୁ ଆସିଥିଲା। ଏମାନଙ୍କ ମଧ୍ୟରେ ଆଇଏଏସ୍ ପୂଜାଙ୍କ ନାଁ ମଧ୍ୟ ରହିଥିଲା।
ମଙ୍ଗଳବାର ପୂଜା ସିଙ୍ଘଲଙ୍କୁ ଦୀର୍ଘ ୯ ଘଣ୍ଟା ଧରି ପଚାରଉଚରା କରାଯାଇଥିଲା। ଏହାପରେ ରାତିରେ ତାଙ୍କୁ ଘରକୁ ଯିବାକୁ ଅନୁମତି ମିଳିଥିଲା। ଜେରା ବେଳେ ଇଡି ମନରେଗା ଅର୍ଥ ହେରଫେର ପଛରେ ତାଙ୍କର ହାତ ଥିବା ଜାଣିବାକୁ ପାଇଥିଲା। ଏଥିପାଇଁ ଆଜି ତାଙ୍କୁ ବିଧିବଦ୍ଧ ଭାବେ ଗିରଫ କରାଯାଇଛି।
Powered by Froala Editor
