କରୋନାରେ ଚାଲିଗଲେ ଅଭିଳାଶା
କୋଭିଡ-୧୯ ସଂକ୍ରମଣ ଯୋଗୁ ଅନେକ ସେଲିବ୍ରିଟିଙ୍କ ମୃତ୍ୟୁ ହୋଇସାରିଲାଣି। ଏହାମଧ୍ୟରେ କରୋନାରେ ବଲିଉଡ୍ ତଥା ମରାଠୀ ଅଭିନେତ୍ରୀ ଅଭିଳାଶା ପାଟିଲଙ୍କ ଦେହାନ୍ତ ହୋଇଥିବା ସୂଚନା ମିଳିଛି। ଅଭିଳାଶାଙ୍କୁ ମୃତ୍ୟୁ ବେଳକୁ ୪୦ ବର୍ଷ ହୋଇଥିଲା।
ସୂଚନା ଅନୁଯାୟୀ, ଅଭିଳାଷା ଏକ ସୁଟିଂ ପାଇଁ ବନାରସ ଯାଇଥିଲେ। ମୁମ୍ବାଇ ଫେରିବା ପରେ ତାଙ୍କ ମଧ୍ୟରେ କରୋନାର କିଛି ଲକ୍ଷଣ ଦେଖାଦେଇଥିଲା। ଏହାପରେ ସେ କରୋନା ଯାଞ୍ଚ କରାଇଥିଲେ ଓ ତାଙ୍କ ରିପୋର୍ଟ ପଜିଟିଭ ଆସିଥିଲା। ସେ କିଛି ଦିନ ହେଲା ଆଇସିୟୁରେ ଭର୍ତ୍ତି ଥିଲେ। ମଙ୍ଗଳବାର ଦିନ ଅଭିନେତ୍ରୀଙ୍କ ମୃତ୍ୟୁ ହୋଇଛି।
ମରାଠୀ ସିନେମାର ଅଭିଳାଷା ଜଣେ ଜଣାଶୁଣା ଅଭିନେତ୍ରୀ ଥିଲେ। ଅଭିଳାଶା ବିଭିନ୍ନ ମରାଠୀ ଏବଂ ହିନ୍ଦୀ ଫିଲ୍ମରେ ଅଭିନୟ କରିଛନ୍ତି। ଯେଉଁଥିରେ ବଲିଉଡ ଚଳଚ୍ଚିତ୍ର ଛିଛୋରେ, ବଦ୍ରିନାଥ କି ଦୁଲହାନିଆ, ଗୁଡ୍ ନ୍ୟୁଜ୍ ଏବଂ ମଲାଲ୍ ସାମିଲ୍ ଅଛି। ଏହାବ୍ୟତୀତ ଅଭିଳାଶା ଟି ଆଥ୍ ଦିୱାସ, ପିପ୍ସୀ, ବାଇକୋ ଦେତା କା ବାଇକୋ, ପ୍ରୱାସ ଏବଂ ତୁଝା ମାଝା ଆରେଞ୍ଜ ମ୍ୟାରେଜ୍ ଭଳି ମରାଠୀ ଚଳଚ୍ଚିତ୍ରରେ ଅଭିନୟ ପାଇଁ ମଧ୍ୟ ଜଣାଶୁଣା ଥିଲେ। ଅଭିଳାଷାଙ୍କ ମୃତ୍ୟୁ ଖବର ଶୁଣି ପ୍ରଶଂସକଙ୍କ ମଧ୍ୟରେ ଶୋକର ଛାୟା ଖେଳିଯାଇଛି।
Powered by Froala Editor
