ମୁମ୍ବାଇ: ଦୁର୍ଘଟଣାର ଆହତ ହୋଇଛନ୍ତି ବଲିଉଡ୍ ଅଭିନେତ୍ରୀ ତନୁଶ୍ରୀ ଦତ୍ତା । ମନ୍ଦିର ଯିବା ବେଳେ କାର୍ ବ୍ରେକ୍ ଫେଲ୍ ହେବାରୁ ସେ ଦୁର୍ଘଟଣାର ଶିକାର ହୋଇଛନ୍ତି ।  ତାଙ୍କ ଗୋଡ଼ରେ ଆଘାତ ଲାଗିଛି । ତେବେ ସୌଭାଗ୍ୟବଶତଃ ଅଳ୍ପକେ ବଡ଼ ଧରଣରୁ ବିପଦରୁ ରକ୍ଷା ପାଇଛନ୍ତି । ଏନେଇ ତନୁଶ୍ରୀ ତାଙ୍କ ଇନ୍‌ଷ୍ଟାଗ୍ରାମ ଆଇଡିରେ ସୂଚନା ଦେଇଛନ୍ତି ।

ତନୁଶ୍ରୀ ତାଙ୍କ ସୋସିଆଲ୍ ମିଡିଆରେ ଆକାଉଣ୍ଟରେ ସୂଚନା ଦେଇ ଲେଖିଛନ୍ତି ଯେ, ଆଜିର ଦିନ ଆଡଭେଚର୍ସ ରହିଲା । ଶେଷରେ ମହାକାଳଙ୍କ ଦର୍ଶନ ପାଇଁ ପହଞ୍ଚିଲି । ମନ୍ଦିର ଯିବା ରାସ୍ତାରେ ଦୁର୍ଘଟଣା ଘଟିଲା । ବ୍ରେକ୍ ଫେଲ୍ ହେବା ଯୋଗୁଁ ଗାଡି ଦୁର୍ଘଟଣାଗ୍ରସ୍ତ ହୋଇଥିଲା । ହେଲେ ଭଗବାନଙ୍କ କୃପାରୁ ବଡ଼ ଧରଣରୁ ଅଘଟଣରୁ ବର୍ତ୍ତି ଗଲି । କେବଳ ଗୋଡ଼ରେ ଆଘାତ ଲାଗିଛି । ଏହାର ଫଟୋ ମଧ୍ୟ ସେ ସେୟାର କରିଛନ୍ତି । ମନ୍ଦିର ଭିତର ଫଟୋ ବି ତନୁଶ୍ରୀ ପୋଷ୍ଟ କରିଥିବା ଦେଖିବାକୁ ମିଳିଛି ।

ତନୁଶ୍ରୀ ୨୦୦୫ରେ ବଲିଉଡରେ ଡେବ୍ୟୁ କରିଥିଲେ । ପ୍ରଥମେ ଆଶିକ୍ ବନାୟା ଆପନେ ଫିଲ୍ମରେ ଇମ୍ରାନ ହାସମିଙ୍କ ସହ ତାଙ୍କୁ ଦେଖିବାକୁ ମିଳିଥିଲା । ପରଦାରେ ଦୁହିଁଙ୍କ ଯୋଡ଼ିକୁ ବି ଦର୍ଶକ ଖୁବ୍ ପସନ୍ଦ କରିଥିଲେ । ଏହାପରେ ତାଙ୍କୁ ଗୋଟିଏ ପରେ ଗୋଟିଏ ଫିଲ୍ମର ଅଫର୍ ମିଳିଚାଲିଲା । ସେ ଢୋଲ, ଭାଗମଭାଗ, ହର୍ଣ୍ଣ ଓକେ ପ୍ଲିଜ୍‌, ରିସ୍କ, ସାସ୍ ବୋହୂ ଏବଂ ସେନ୍ସେକ୍ସ, ଗୁଡ୍ ବୟ ବ୍ୟାଡ୍ ବୟ ଆଦି ଫିଲ୍ମରେ ଜଲ୍‌ୱା ଦେଖାଇ ଥିଲେ । ଶେଷ ଥର ପାଇଁ ୨୦୧୦ରେ ରିଲିଜ୍ ହୋଇଥିବା ଫିଲ୍ମ ‘ଆପାର୍ଟମେଣ୍ଟ ରେଣ୍ଟ ଆଟ୍ ୟୁ’ରେ ତାଙ୍କୁ ଦେଖିବାକୁ ମିଳିଥିଲା । ଏହାପରେ ହଠାତ୍ ସେ ଫିଲ୍ମ ଦୁନିଆରୁ ଦୂରେଇ ଯାଇଥିଲେ । ତାଙ୍କୁ ଆଉ ଦେଖିବାକୁ ମିଳୁନି । ଏହାର ପଛର ରହସ୍ୟ ମଧ୍ୟ କାହାରିକୁ ଜଣାନାହିଁ । ହେଲେ ସେ ନିଜ ପ୍ରିୟ ଦର୍ଶକଙ୍କୁ କେବେ ବି ହାତ ଛଡ଼ା କରିନାହାନ୍ତି । ଏବେ ବି ତନୁଶ୍ରୀ ସୋସିଆଲ୍ ମିଡିଆରେ ବେଶ୍ ସକ୍ରିୟ । ସବୁବେଳେ ଫ୍ୟାନ୍‌ମାନଙ୍କ ସହ ଯୋଡ଼ି ହୋଇ ରହିଛନ୍ତି । ଆଉ ଦୁର୍ଘଟଣା ଘଟିଥିବା ପୋଷ୍ଟ କରିବା ପରେ ବହୁ ଦର୍ଶକ ତାଙ୍କ ଆଶୁ ଆରୋଗ୍ୟ କାମନା କରିଥିବା ଦେଖିବାକୁ ମିଳିଛି ।

Powered by Froala Editor