କରୋନା ପୀଡିତ ଲୋକ ହୋମ୍ ଆଇସୋଲେସନରେ ରହି ଭଲ ହୋଇପାରିବେ । ତେଣୁ କରୋନା ପଜିଟିଭ ହେଲେ ଭୟଭୀତ ହେବା ଉଚିତ ନୁହେଁ । କିନ୍ତୁ ଖାମଖିଆଲ ବି ହୁଅନ୍ତୁ ନାହିଁ । କରୋନା ନେଇ ରାଜ୍ୟ ସରକାରଙ୍କ ପକ୍ଷରୁ ସ୍ୱତନ୍ତ୍ର ସାମ୍ବାଦିକ ସମ୍ମିଳନୀରେ ବିଶେଷଜ୍ଞ ଡାକ୍ତରମାନେ ଏହା କହିଛନ୍ତି । 

ଶରୀରରେ ଅକ୍ସିଜେନ ମାତ୍ରା କମିଗଲେ କିଛି ସମୟ ପର୍ଯ୍ୟନ୍ତ ମୁହଁମାଡ଼ି ହୋଇ ଶୋଇପଡ଼ିଲେ ଭଲ । ପ୍ରଥମେ ବାମକଡ଼ ମାଡ଼ି ଏବଂ ଏହା ପରେ ଡାହାଣ କଡ଼ ମାଡ଼ି ଶୋଇଲେ ଭଲ । ଏହା ପରେ କିଛି ସମୟ ଆଉଜି ହୋଇ ବସନ୍ତୁ ବୋଲି ଡାକ୍ତର ପରାମର୍ଶ ଦେଇଛନ୍ତି । ଏପରି କଲେ ଅକ୍ସିଜେନ ମାତ୍ରା ସ୍ୱାଭାବିକ ସ୍ତରକୁ ଆସିଯିବ  । ଶ୍ୱାସକ୍ରିୟାରେ ଯନ୍ତ୍ରଣା ଅନୁଭବ କଲେ ଶରୀରରେ ଅକ୍ସିଜେନ ମାତ୍ରା ହ୍ରାସ ପାଉଥିଲେ ଡାକ୍ତରଙ୍କୁ ଜଣାଇବା ଦରକାର । କିନ୍ତୁ ମନେ ରଖିବାକୁ ହେବ ଯେ, ତରତର ହୋଇ ଡାକ୍ତରଖାନା ଯିବା ଅନୁଚିତ । 

କୋଭିଡ କାଳରେ ଗର୍ଭଧାରଣ ନେଇ କିଛି ନିର୍ଦ୍ଦେଶାବଳୀ ନାହିଁ ବୋଲି ବିଶେଷଜ୍ଞ ଡାକ୍ତର ପରାମର୍ଶ ଦେଇଛନ୍ତି । ଯଦି କରୋନା ସମୟରେ ଆପଣ ଗର୍ଭ ଧାରଣ କରିଛନ୍ତି ତେବେ ତୁରନ୍ତ ଡାକ୍ତରଙ୍କ ପରାମର୍ଶ କରନ୍ତୁ । ଗର୍ଭାବସ୍ଥାରେ ରୋଗ ପ୍ରତିଷେଧକ ଶକ୍ତି କମିଯାଏ । ଫୁସଫୁସ୍ ଜନିତ ରୋଗ ବେଶୀ ହୁଏ । ଆଉ ଏଭଳି ସମୟରେ କରୋନା ହେଲେ ମାଆ ଓ ଶିଶୁଙ୍କ ପ୍ରତି ବିପଦ ସୃଷ୍ଟି କରେ । ତେଣୁ କରୋନା କାଳରେ ଗର୍ଭ ରହିଲେ ତୁରନ୍ତ ଡାକ୍ତରଙ୍କ ପରାମର୍ଶ ନେବା ଆବଶ୍ୟକ ବୋଲି କହିଛନ୍ତି କଟକ ଏସସିବିର ସ୍ତ୍ରୀ ଓ ପ୍ରସୂତି ରୋଗ ବିଭାଗ ମୁଖ୍ୟ ପ୍ରଫେସର ଡାକ୍ତର ତୁଷାର ଜ୍ୟୋତି କର ।

କୋଭିଡ୍ ସମୟ ଯୋଗୁଁ ଆପଣ ଗର୍ଭଧାରଣ ବେଳେ ପ୍ରତି ମାସରେ ନଆସି ମାସେ ଲେଖାଏଁ ବ୍ୟବଧାନରେ ମେଡିକାଲ୍ ଚେକ୍ ଅପ୍ ପାଇଁ ଯାଆନ୍ତୁ । ମେଡିକାଲ୍ ଗଲା ବେଳେ କୋଭିଡ୍ ଗାଇଡଲାଇନ୍ ମାନନ୍ତୁ । ଗର୍ଭାବସ୍ଥାରେ ଅଲଟ୍ରାସାଉଣ୍ଡ କରିବା ଉଚିତ୍ । ତେବେ, ଅଲଟ୍ରାସାଉଣ୍ଡ ବେଳେ ସମସ୍ତ କୋଭିଡ୍ ଗାଇଡଲାଇନ୍ ମାନିବାକୁ ପରାମର୍ଶ ଦେଇଛନ୍ତି ଡାକ୍ତର ।  ଟିକାର ପ୍ରଥମ ଡୋଜ ପରେ ଗର୍ଭଧାରଣ କଲେ ୨ୟ ଡୋଜ ଟିମା ନନେବା ଉଚିତ ବୋଲି ଡାକ୍ତର କହିଛନ୍ତି ।

କୋଭିଡ ପଜିଟିଭ ହେଲେ ସଂକ୍ରମଣ ନ ବ୍ୟାପିବା ପାଇଁ ଯତ୍ନବାନ ହୁଅନ୍ତୁ । କୋଭିଡ ପଜିଟିଭ ହେଲେ ୧୦୪କୁ ପରାମର୍ଶ କରିବା ଦରକାର । ଭୁବନେଶ୍ୱରବାସୀ ହୋଇଥିଲେ ୧୯୨୯କୁ ଫୋନ କରି ଅଧିକ ସୂଚନା ପାଇପାରିବେ । 

Powered by Froala Editor