ଗଞ୍ଜାମ ଜିଲ୍ଲା ଖଲ୍ଲିକୋଟ ଥାନା ଅନ୍ତର୍ଗତ ଆଲପୁର ଗ୍ରାମ ନିକଟ ଚିଲିକାରେ ମୂର୍ତ୍ତି  ବିସର୍ଜନ କରୁଥିବା ବେଳେ ଚିଲିକାରେ ବୁଡି ଜଣଙ୍କ ମୃତ୍ୟୁ ଘଟିଛି। ମୃତକ ହେଲେ ଓଡିଆ ଆଲପୁର ଗ୍ରାମର ବିଭୁତି ଭୂଷଣ ତରେଇ । ଏହି ଅଘଟଣରେ ୩ ଜଣ ଗୁରୁତର ଅଛନ୍ତି। ଗୁରୁତରଙ୍କୁ ଖଲ୍ଲିକୋଟ ମେଡିକାଲ ଭର୍ତ୍ତି କରାଯାଇଛି।

ସୂଚନା ମୁତାବକ, ଚିଲିକା ନକଟବର୍ତ୍ତି ଓଡିଆ ଆଲପୁର ଗ୍ରାମରେ ୧୪ ଦିନ ଧରି ରାମ ନବମୀ ପୂଜା ଚାଲିଥିଲା। ଆଜି ବିସର୍ଜନ କରିବା ପାଇଁ କିଛି ଯୁବକ ଡଙ୍ଗାରେ ଚିଲିକା ଭିତରକୁ ଯାଇଥିବା ବେଳେ ହଠାତ ଜୋରରେ ପବନ ହୋଇଥିଲା । ଗଭୀର ପାଣି ଭିତରକୁ ବିଭୁତି ଭୂଷଣ ତରାଇ, ଗନ୍ଧର୍ବ ତରେଇ, ଯୋଗୀ ତରେଇ, ଭୀମ ପ୍ରଧାନ, ଗନ୍ଧର୍ବ ପରିଡା, ଦିଲ୍ଲୀପ ପ୍ରଧାନ, ଗଣେଶ ସାହୁ, ହର୍ଷ ସାହୁ, ବାଦଲ ପରିଡା ଡଙ୍ଗାରୁ ଗଳି ପଡିଥିଲେ। ପାଖରେ ଥିବା ଡଙ୍ଗା ସାହାଯ୍ୟରେ ଗ୍ରାମବାସୀ ୩ ଜଣଙ୍କୁ ଉଦ୍ଧାର କରିଥିବା ବେଳେ ଜଣେ ନିଖୋଜ ଥିଲେ। 

ଖବର ପାଇ ଅଗ୍ନିଶମ ବାହିନୀ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଜାରି ରଖିଥିଲା । ଅଗ୍ନିଶମ ବାହିନୀ ଓ ପଥରା ଗ୍ରାମର ଯୁବ ଗୋଷ୍ଠୀ ମିଳିତ ଭାବେ ୪ ଘଣ୍ଟାର ଅକ୍ଲାନ୍ତ ପରିଶ୍ରମ କରିବା ପରେ  ନିଖୋଜ ଥିବା ଯୁବକକୁ ଉଦ୍ଧାର  କରିଥିଲେ । ଅଗ୍ନିଶମ ବାହିନୀ ଗାଡ଼ି ଯୋଗେ ଯୁବକଙ୍କୁ ଖଲ୍ଲିକୋଟ ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ରକୁ ସ୍ଥାନାନ୍ତର କରାଯାଇଥିଲା। ସେଠାରେ ଡାକ୍ତର ଯୁବକକୁ ମୃତ ଘୋଷଣା କରିଥିଲେ।

Powered by Froala Editor