ଭୁବନେଶ୍ୱର : ଆଜି ହେଉଛି ଛେନାପୋଡ଼ ଦିବସ  । ଚଳିତ ବର୍ଷ ଠାରୁ ଅପ୍ରେଲ ୧୧କୁ ନୟାଗଡ଼ର କିଛି ଉଦୀୟମାନ ଯୁବକଙ୍କ ଦ୍ୱାରା ଛେନାପୋଡ଼ ଦିବସ ପାଳନ କରାଯାଇଛି  । ଏହି ପରିପ୍ରେକ୍ଷୀରେ ଯୁବ ଲେଖକ ଶୁଭ୍ରାଂଶୁ ପଣ୍ଡା ଛେନାପୋଡ଼ର ଉତ୍ପତି ସମ୍ପର୍କରେ ଦେଇଥିବା ତଥ୍ୟର ଅବତାରଣା କରାଯାଇପାରେ  ।

ଶ୍ରୀ ପଣ୍ଡା ସମ୍ବାଦରେ ଏନେଇ ଏକ ଆଲେଖ୍ୟ ଲେଖିଛନ୍ତି  । ନୟାଗଡ଼ର ପ୍ରତିଷ୍ଠିତ ମିଷ୍ଟାନ୍ନ ବ୍ୟବସାୟୀ ସୁଦର୍ଶନ ସାହୁ ୧୯୩୦ ମସିହା ଅପ୍ରେଲ ୧୧ ତାରିଖରେ ଜନ୍ମଗ୍ରହଣ କରିଥିଲେ  । ମାତ୍ର ୧୭ ବର୍ଷ ବୟସରେ ନୟାଗଡ଼ର ଦଶପଲ୍ଲା ବଜାରରେ ଏକ ଛୋଟ ଜଳଖିଆ ଦୋକାନ ଆରମ୍ଭ କରିଥିଲେ  । ଯାହାପରେ ନୟାଗଡ଼କୁ ସ୍ଥାନାନ୍ତରିତ ହୋଇଥିଲା  । ନିଜ ଅଜାଣତରେ ସେ ଆକସ୍ମିକ ଭାବେ ଛେନାପୋଡ଼ର ଉଦ୍ଭାବନ କରିଥିଲେ  । ଦିନେ ମିଠା ପାଇଁ ବ୍ୟବହୃତ କିଛି ବଳକା ଛେନା ନଷ୍ଟ ନହେବା ପାଇଁ ସେ ଗୁଡ଼ ଗୋଳାଇ ଚୁଲି ଉପରେ ବସାଇ ଦେଇଥିଲେ  । ମୂଷା, ଅସରପା ଆଦିଙ୍କ ହାବୁଡ଼ରୁ ରକ୍ଷା କରିବା ପାଇଁ ସେ ଛେନାକୁ ଶାଳପତ୍ରରେ ଗୁଡ଼ାଇ ପାତ୍ର ଭିତରେ ରଖି ଢାଙ୍କୁଣୀ ଘୋଡ଼ାଇ ଦେଇଥିଲେ  । ଉପରେ ଅଧାଜଳା କାଠଖଣ୍ଡେ ଥୋଇ ଦେଇଥିଲେ  । ପରଦିନ ସକାଳେ ଆସି ଦୋକାନ ଖୋଲିବା ବେଳକୁ ସୁଦର୍ଶନ ଦେଖିଲେ, ତଳୁ ଚୁଲି ପାଉଁଶ ନିଅାଁ ଓ ଉପରୁ ତତଲା ଢାଙ୍କୁଣୀର ଚାପରେ ଗୁଡ଼ଗୋଳା ଛେନାତକ ଦରପୋଡ଼ା ହୋଇଯାଇଛି  । ଛେନାତକ ନଷ୍ଟ ହେଲା ଭାବି ସେ ଫିଙ୍ଗିଦେବା ଆଗରୁ ଖଣ୍ଡେ ଆଣି ପାଟିରେ ଦେଇଦେଖନ୍ତି ତ ବେଶ ସୁଆଦିଆ ଲାଗୁଛି  ।

ଛେନାରୁ ଆକସ୍ମିକ ଭାବେ ପ୍ରସ୍ତୁତ ଏହି ମିଠା ପ୍ରତି ସୁଦର୍ଶନଙ୍କ ଆଗ୍ରହ ବଢ଼ିଲା  । ତା ପରଦିନ ଉପରେ ଓ ତଳେ ରଡ଼ନିଆଁ ଦେଇ ସେ ପୁଣି ଘରକୁ ଚାଲିଗଲେ  । ଏଥର ଆସିବା ବେଳକୁ ଛେନାପୋଡ଼ ସୁନ୍ଦର ଭାବେ ପ୍ରସ୍ତୁତ ହୋଇ ରହିଥିଲା  । ବାରମ୍ବାର ପରୀକ୍ଷା ନୀରିକ୍ଷା ପରେ ଶେଷରେ ଛେନାପୋଡ଼ ଗ୍ରାହକଙ୍କ ମନ ଜିଣି ନେଇଥିଲା  । 

Powered by Froala Editor