ଢେଙ୍କାନାଳରେ ପ୍ରତିଷ୍ଠା ହେବ ସୈନିକ ସ୍କୁଲ
ନୂଆଦିଲ୍ଲୀ: ଆସନ୍ତା ଶିକ୍ଷାବର୍ଷରେ ଢେଙ୍କାନାଳରେ ସୈନିକ ସ୍କୁଲ ପ୍ରତିଷ୍ଠା ହେବ । ଏଥିପାଇଁ ପ୍ରତିରକ୍ଷା ମନ୍ତ୍ରଣାଳୟ ଅନୁମୋଦନ ପ୍ରଦାନ କରିଛନ୍ତି । ଓଡିଶାର ଢେଙ୍କାନାଳ ସହ ଦେଶର ୨୧ଟି ରାଜ୍ୟରେ ୨୧ଟି ନୂଆ ସୈନିକ ସ୍କୁଲ ମଧ୍ୟ ଆସନ୍ତା ଶିକ୍ଷାବର୍ଷରୁ କାର୍ଯ୍ୟ ଆରମ୍ଭ କରିବ । ଏହିସବୁ ସୈନିକ ସ୍କୁଲ ବିଭିନ୍ନ ଏନଜିଓ, ଘରୋଇ ଓ ସରକାରୀ ସ୍କୁଲ ସହଭାଗିତାରେ ପ୍ରତିଷ୍ଠା ହେବ ।
ପ୍ରତିରକ୍ଷା ମନ୍ତ୍ରଣାଳୟର ସୂଚନା ଅନୁସାରେ ଢେଙ୍କାନାଳରେ ପ୍ରସ୍ତାବିତ ନୂଆ ସୈନିକ ସ୍କୁଲ ‘ସଂସ୍କାର ପବ୍ଲିକ୍ ସ୍କୁଲ’ (ଅବକାଶ ଫାଉଣ୍ଡେସନ୍) ନାମରେ ଚାଲିବ । ଦେଶର ପୂରୁଣା ସୈନିକ ସ୍କୁଲଠାରୁ ନୂଆ ସୈନିକ ସ୍କୁଲ ଭିନ୍ନ ହେବ । ଏହା ମାଧ୍ୟମରେ ବିଦ୍ୟାର୍ଥୀମାନଙ୍କୁ ନୂତନ ଶିକ୍ଷାନୀତି ଆଧାରରେ ଗୁଣାତ୍ମକ ଶିକ୍ଷା ପ୍ରଦାନ ସହ ଉତ୍ତମ କ୍ୟାରିୟରର ସୁଯୋଗ ଓ ସେନାବାହିନୀ ପାଇଁ ଆବଶ୍ୟକ ହେଉଥିବା ଜ୍ଞାନ ପ୍ରଶିକ୍ଷଣ ପ୍ରଦାନ କରାଯିବ । ସୈନିକ ସ୍କୁଲ ସୋସାଇଟି ତତ୍ତ୍ୱାବଧାନରେ ଏହି ସବୁ ସ୍କୁଲ ଚାଲିବ । ଦେଶରେ ୧୦୦ଟି ନୂଆ ସୈନିକ ସ୍କୁଲ ଖୋଲିବା ପାଇଁ କେନ୍ଦ୍ର ସରକାରଙ୍କ ଯୋଜନା ଥିବାବେଳେ, ବର୍ତ୍ତମାନ ୨୧ଟି ଖୋଲିବାକୁ ଅନୁମୋଦନ ମିଳିଛି ।
Powered by Froala Editor
