ଭୁବନେଶ୍ୱର: ଚଳିତ ପଞ୍ଚାୟତ ନିର୍ବାଚନରେ ବିଜେପିକୁ ବଡ ଝଟକା ଲାଗିଛି । ପ୍ରଥମ ୨ ଦିନର ଗଣତିରେ ଯଥେଷ୍ଟ ପଛରେ ଥିବା ବିଜେପି ତୃତୀୟ ଦିନର ଗଣତିରେ ବି ସମଦଶା ଭୋଗିଛି । ୨୦୧୭ ତୁଳନାରେ ବିଜେପିର ଏଭଳି ସ୍ଥିତି ପଛର କାରଣ ଖୋଜା ଚାଲିଥିବା ବେଳେ ବଡ ବୟାନ ଦେଇଛନ୍ତି ଦଳର ବରିଷ୍ଠ ନେତା ଖାରବେଳ ସ୍ୱାଇଁ । ପଞ୍ଚାୟତରେ ଏଭଳି ଶୋଚନୀୟ ପ୍ରଦର୍ଶନ ପଛର କାରଣ କହିବା ପରେ ରାଜନୈତିକ ମହଲରେ ଆରମ୍ଭ ହୋଇଛି ଚର୍ଚ୍ଚା ।
ନେତୃତ୍ୱ ସଙ୍କଟ ପାଇଁ ହିଁ ବିଜେପିର ଏଭଳି ଶୋଚନୀୟ ପ୍ରଦର୍ଶନ ହୋଇଛି କହି ରାଜନୈତିକ ମାହୋଲକୁ ସରଗରମ କରିଛନ୍ତି ଖାରବେଳ । ବିଜେପିରେ ନେତୃତ୍ୱ ସଙ୍କଟ ରହିଛି, ସେଥିପାଇଁ ଦଳ ଏତେ ଖରାପ ପ୍ରଦର୍ଶନ କରିଛି । ବିଜେଡିକୁ ଚ୍ୟାଲେଞ୍ଜ ଦେବାକୁ ହେଲେ ଜଣେ ନିର୍ଦ୍ଦିଷ୍ଟ ଚେହେରାଙ୍କୁ ଓଡ଼ିଶାରେ ବିଜେପିର ଶୀର୍ଷ ନେତୃତ୍ୱ ସାମ୍ନାକୁ ଆଣିବା ଦରକାର । ସ୍ଥାନୀୟ ନେତୃତ୍ୱଙ୍କୁ ତିଆରି ନକଲେ ଦଳ ଉଠି ପାରିବନି । ଏଭଳି କହି ବିଜେପିର ରାଜ୍ୟ ନେତୃତ୍ୱଙ୍କ ଦକ୍ଷତା ଉପରେ ପ୍ରଶ୍ନ ଚିହ୍ନ ଛିଡା କରିଛନ୍ତି ଖାରବେଳ ।

 ପଞ୍ଚାୟତ ନିର୍ବାଚନରେ ବିଜୟ ମୁହାଁ ହେଉଛି ବିଜେଡି । ପ୍ରଥମ ଓ ଦ୍ବିତୀୟ ରାଉଣ୍ଡ ସୁଦ୍ଧା ପ୍ରାୟ ଅଧିକାଂଶ ଆସନରେ ବିଜେଡି ଲିଡ୍‌ କରୁଛି । ପ୍ରଥମ ପର୍ୟ୍ୟାୟ ଭୋଟ ଗଣତିରେ ୩୧୫ ଜିଲ୍ଲା ପରିଷଦ ଆସନ ମଧ୍ୟରୁ ବିଜେଡି ୨୮୨ରେ ବିଜୟୀ ହୋଇଛି । ତା ପଛକୁ ବିଜେପି ୧୫ଟି ଆସନ ହାତେଇଥିବା ବେଳେ କଂଗ୍ରସ ୧୪ଟି ଆସନ ହାତେଇଛି । ପ୍ରଥମ ପର୍ୟ୍ୟାୟ ଭୋଟ ଗଣତି ପରେ ଅଧିକାଂଶ ଆସନରେ ବିଜେଡି ବିଜୟୀ ହୋଇଥିବା ଜଣାପଡ଼ିଥିଲା ।

ସେହିପରି ଦ୍ବିତୀୟ ପର୍ୟ୍ୟାୟ ଭୋଟ ଗଣତିରେ ମୋଟ ୩୦୬ଟି ଆସନ ମଧ୍ୟରୁ ୨୩୬ଟି ଆସନରେ ବିଜୟୀ ହୋଇଛି । ତା ପଛକୁ ବିଜେପି ୧୬ଟି ଆସନ ହାତେଇଥିବା ବେଳେ କଂଗ୍ରସ ୧୫ଟି ଏବଂ ଅନ୍ୟାନ୍ୟ ଦଳ ବା ସ୍ବାଧୀନ ପ୍ରାର୍ଥୀ ୨ଟି ଆସନରେ ବିଜୟୀ ହୋଇଛି ।ଆଜି ଶେଷ ପର୍ୟ୍ୟାୟରେ ୨୩୦ ଜୋନରେ ଭୋଟ ଗଣତି ହେଉଛି । ସକାଳ ୮ଟା ସମୟରୁ ଏହି ଗଣତି ପ୍ରକ୍ରିୟା ଆରମ୍ଭ ହୋଇଛି । ଗତଥର ବିଜେପି ଭଲ ପ୍ରଦର୍ଶନ କରିଥିବା ବେଳେ ଏଥର ପଛରେ ପଡ଼ିଯାଇଥିବା ଦେଖା ଦେଇଛି । ଚଳିତ ନିର୍ବାଚନରେ ସେହି ଅଙ୍କ ପୁଣି ଅକ୍ତିଆର କରିବାରେ ବିଜେପି ଫେଲ ମାରିଛି ।

Powered by Froala Editor